ISIHLOKO ESISEKUQALISENI—UMBUSO KANKULUNKULU—UNGAKUNCEDA NGANI?

UMbuso KaNkulunkulu Uzakunceda Ngani Wena?

Sithemba ukunanzelele ezihlokweni ezidlulileyo ukuthi oFakazi bakaJehova bayawuqakathekisa kakhulu uMbuso kaNkulunkulu. Kanti njalo sileqiniso ukuthi ukukholise kakhulu ukubala ngezibusiso ezinhle esizazithola lapho sekubusa uMbuso kaNkulunkulu. Kodwa uyakholwa yini ukuthi lokhu esikuthenjiswayo kuzakwenzakala sibili?

Kungaba kuhle nxa ungahlolisisa izinto ozitshelwayo, kulokuphonguvuma konke nje. (IZaga 14:15) Isibonelo samaBheriya asendulo singakunceda kakhulu.a Eqalisa ukuzwa izindaba ezinhle zoMbuso akwamukela lokho ayekutshelwa, kodwa ayisikho ukuthi ahle avuma ukuthi kuliqiniso. Ayeyihlolisisa iMibhalo ‘ukuze abone ukuthi lokhu uPhawuli ayekutsho kwakuliqiniso na.’ (ImiSebenzi 17:11) Ngamanye amazwi, amaBheriya ayesithi angezwa izindaba ezinhle aphinde ahlolisise eMibhalweni ukuthi lokhu ayekutshelwa kuliqiniso na. Ngokuya kwesikhathi ayengasathandabuzi ukuthi izindaba ezinhle ayezizwa zazivela khona kanye eLizwini likaNkulunkulu.

OFakazi bakaJehova bakucela ukuthi lawe wenze njengamaBheriya. Bafunda labantu iBhayibhili mahala. Yikho-ke nxa usufunda labo, ungahlolisisa ukuthi abakukholwayo mayelana loMbuso kaNkulunkulu kuyahambelana yini lalokho iBhayibhili elikutshoyo.

Awusoze ufunde ngoMbuso kaNkulunkulu kuphela. Kodwa ukufunda kwakho iBhayibhili kuzakunceda lokuthi uthole ezinye izimpendulo zemibuzo ehlupha abantu abanengi.

Savela ngaphi?
Kanti vele siphilelani?
Kungani uNkulunkulu evumela ukuthi sihlupheke?
Kwenzakalani kithi nxa singafa?
Kambe umhlaba uzatshabalaliswa?
Kuyini okungenza ukuthi imuli yakho ithokoze?

Ukufunda iBhayibhili kuzakunceda lokuthi ‘usondele phansi kukaNkulunkulu.’ (UJakhobe 4:8) Nxa ulokhu usondela phansi kukaNkulunkulu kuzaqhubeka kukucacela ukuthi uMbuso wakhe uzakwenzelani khathesi lakwelizayo. UJesu wathi ethandaza kuYise wathi: ‘Manje-ke yilokhu ukuphila okungapheliyo: ukuthi bakwazi wena, onguwe wedwa uNkulunkulu weqiniso, loJesu Khristu omthumileyo.’—UJohane 17:3.

OFakazi bakaJehova bangasebenzisa ibhuku leli ukuthi bafunde lawe iBhayibhili.

Nxa ulesifiso sokufunda iBhayibhili bacele kumbe uvule iWebhusayithi okuthiwa yi-www.jw.org ubusukhangela lapho okubhalwe khona ukuthi CELA UKUFUNDA IBHAYIBHILI, ugcwalise ifomu ozalithola khonapho.

a IBheriya kwakulidolobho leMakhedoniya yasendulo.

Kungani Ewuthanda Kakhulu uMbuso kaNkulunkulu?

Omunye unkazana okuthiwa nguFolake oleminyaka elitshumi wanikwa umsebenzi wokuthi abhale indatshana yokuzibumbela elesihloko esithi “Into Engiyithanda Kulazo Zonke Emhlabeni.” Wakhetha ukubhala ngokuthi kungani ethanda ukutshela abantu ngoMbuso kaNkulunkulu.

UFolake wathi: “UMbuso kaNkulunkulu nguhulumende okhona sibili. Kodwa awungeke uwubone ngamehlo lanxa ungaze ugqoke amangilazi!”

Waqhubekela phambili wabhala ngezibusiso akhangelele ukuzithola eMbusweni lo. Waphinda wabhala lezinye izinhlupho ozazisusa, wathi: “Ngizwa ubuhlungu nxa ngibona abantu behlala ezitaladini ngenxa yokuthi abalandawo yokuhlala, futhi nxa ngibona abantwana besifa ngenxa yendlala ezindaweni ezitshiyeneyo emhlabeni.” Wehla layo indaba wathi: “Kodwa ngiyathokoza kakhulu nxa ngibala u-Isaya 65:21.” Ivesi le ithembisa ukuthi abantu abazabuswa nguMbuso kaNkulunkulu “bazakwakha izindlu bahlale kuzo; bazahlanyela izivini badle izithelo zazo.”

Kanti njalo uFolake uthi usilindele ngabomvu isikhathi lapho uNkulunkulu azasebenzisa khona uMbuso wakhe ukuthi asuse konke ukugula. Endatshaneni yakhe wabhala amazwi akuSambulo 21:4 aveza ukuthi uNkulunkulu “uzazesula zonke izinyembezi emehlweni abo. Akusayikuba khona futhi ukufa loba ukulila loba ukukhala loba ubuhlungu.” Wathi eyiphetha indatshana yakhe waphinda ukuthi into ayithanda kulazo zonke emhlabeni yikukhuluma ngoJehova kanye loMbuso wakhe. Kuyakhanya sibili ukuthi umntwana lo uyawuthanda kakhulu uMbuso kaNkulunkulu.