ISIHLOKO ESISEKUQALISENI | UNGUMNGANE KANKULUNKULU YINI?
Ungumngane kaNkulunkulu Yini?
“Ukuba ngumngane kaNkulunkulu kwenza uzizwe usuthisekile, uhlalisekile njalo ungesabi lutho. Kwenza ubone lokuthi uNkulunkulu ukufisela okuhle kakhulu sonke isikhathi.”—UCHRISTOPHER, IJAHA ELIHLALA EGHANA.
“UNkulunkulu uyakubona nxa usekuhluphekeni abesekutshengisa ukuthi ulendaba lawe lokuthi uyakuthanda kakhulu.”—INTOMBAZANYANA ELEMINYAKA ENGU-13 OKUTHIWA NGUHANNAH EHLALA E-ALASKA, E-U.S.A.
“Akulanto emnandi njalo eqakatheke kakhulu ukwedlula ukwazi ukuthi ungumngane kaNkulunkulu!”—UMAMA OKUTHIWA NGU-GINA OLEMINYAKA ENGABA NGU-45 OHLALA EJAMAICA.
Emhlabeni wonke kulabantu abanengi abazizwa njengoChristopher, uHannah kanye loGina. Kabathandabuzi ukuthi uNkulunkulu ubabona bengabangane bakhe. Wena-ke? Ungumngane kaNkulunkulu yini? Uyafuna yini ukuba seduze laye? Nxa useduze laye, uyafuna yini ukuthi abe ngumngane wakho omkhulu? Mhlawumbe usuzibuza ukuthi, ‘Kambe kungenzakala yini ukuthi umuntu abe lobungane loNkulunkulu uSomandla? Nxa kungenzakala, kungenzakala njani?’
LAWE UNGABA NGUMNGANE KANKULUNKULU
IBhayibhili liyakuveza ukuthi ungaba seduze loNkulunkulu, ube ngumngane wakhe. Lithi uNkulunkulu wabiza u-Abhrahama ngokuthi ‘ngumngane wakhe.’ (U-Isaya 41:8) Kanti njalo uyakunxusa lokuthi usondele kuye ngoba uJakhobe 4:8 uthi: “Sondelani phansi kukaNkulunkulu laye uzasondela kini.” Yikho-ke kuyakhanya ukuthi lawe ungaba seduze loNkulunkulu, ube ngumngane wakhe sibili. Kodwa njengoba uNkulunkulu engabonakali, kungenzakala njani ukuthi ‘usondele phansi’ kwakhe ukuze abe ngumngane wakho omkhulu?
Impendulo yombuzo lo singayithola ngokukhangela ukuthi kuyini okwenzakalayo nxa abantu ababili besiba ngabangane. Izikhathi ezinengi baqala ngokutshelana amabizo. Besekusithi nxa behlala bexoxa, betshelana okusezinhliziyweni zabo lalokho abakucabangayo, ubungane babo buyakhula. Kanti njalo nxa behlala bencedisana ezintweni ezitshiyeneyo, bacina sebengamathe lolimi. Lokhu kuyahambelana lalokho okwenzakalayo nxa umuntu efuna ukuba ngumngane kaNkulunkulu. Zwana ukuthi kuhambelana njani.