ISIHLOKO ESISEKUQALISENI | UNGUMNGANE KANKULUNKULU YINI?
Ayikho Impilo Emnandi Njengale
Sesikhulume ngokuthi ungenzani ukuze usondele eduze loNkulunkulu. Ungenzani ukuze ube seduze kwakhe? Nanzi izinto okuthiwe ungazenza:
Kumele ulazi ibizo likaNkulunkulu elithi Jehova njalo ulisebenzise.
Kumele uhlale ukhuluma loNkulunkulu nsuku zonke ngokuthandaza langokutaditsha iLizwi lakhe iBhayibhili.
Kufanele uhlale usenza izinto ezithokozisa uJehova.
Sondela phansi kukaNkulunkulu ngokusebenzisa ibizo lakhe, ngokutaditsha iLizwi lakhe, langokwenza izinto ezimthokozisayo
Uyazenza yini izinto lezi ezintathu ezingakunceda ukuthi ube seduze loNkulunkulu? Yikuphi ofisa ukukwenza ngcono ezintweni lezi? Kumele sizame ngamandla onke sibili ngenxa yokuthi ukwenza njalo kungasinceda kakhulu.
Omunye owesifazana ohlala e-United States okuthiwa nguJennifer uthi, “Yonke imizamo esiyenzayo ukuze sibe seduze loNkulunkulu kayipheleli emoyeni. Ukuba seduze laye kwenza sithole izibusiso ezinengi: kwenza simthembe kakhulu uNkulunkulu, sizwisise ukuthi unjani, njalo okuhle kakhulu yikuthi kwenza simthande kakhulu. Ayikho impilo emnandi njengale!”
Nxa ulesifiso sokuba seduze loNkulunkulu, oFakazi bakaJehova bakhululeke kakhulu ukuthi bazokuncedisa. Bangahlela ukuthi bazofunda lawe iBhayibhili mahala. Kanti njalo kungaba kuhle ukuthi ubuye eWolu yethu yoMbuso lapho ozathola khona imfundo yeBhayibhili, njalo uzafika ukholise ukuba lobudlelwano labantu abaqakathekisa ukuba ngabangane bakaNkulunkulu.a Ungenza njalo uzezwa usukukholisa sibili ukuba seduze loNkulunkulu njengomhubi owathi: “Kodwa mina kimi kuhle ukuba seduze loNkulunkulu.”—IHubo 73:28.
a Nxa ufuna ukucela ukuthi othile azofunda lawe iBhayibhili kumbe nxa ufuna ukuya eWolu yoMbuso eseduze lalapho ohlala khona, tshela umuntu okunike imagazini le kumbe, ukhangele kuWebhusayithi yethu, i-www.jw.org. Nxa usuyivulile, khangela ngaphansi lapho okubhalwe khona ukuthi SITHINTE.