Zama Ukuba Ngumsizi Omuhle
1. Singasilingisela njani isibonelo somphostoli uPhawuli nxa sisebenza lomunye enkonzweni?
1 Umphostoli uPhawuli wayebona isikhathi ayesibalaso lalabo ayekhonza labo njengethuba ‘lokuqinisana.’ (Rom. 1:12) Nxa usebenza lomunye ummemezeli enkonzweni, uyasisebenzisa yini isikhathi leso ukuthi umkhuthaze njalo umsize? Ungaba ngumsizi omuhle ngokumxoxela ngalokho okukunceda ukuthi ube ngummemezeli ophumelelayo.
2. Singenzani okungenza esihamba laye ekutshumayeleni abe lesibindi, futhi kungani kuqakathekile lokhu?
2 Menze Abelesibindi: Abamemezeli abanengi abazithembi, lokhu kukhanya ebusweni babo kanye lendlela ilizwi labo eliphuma ngayo. Singabenza babelesibindi ngokubancoma okweqiniso. Yiziphi ezinye izindlela ezingenza omunye abelesibindi? Omunye umbonisi ohambelayo wandise ukutshela ahamba laye ngalokhu akwesabayo lokuthi uhlala ethandaza ecela amandla ukuze anqobe ukwesaba lokhu. Omunye umzalwane wathi okwamncedayo ukuthi abalesibindi yilokhu: “Kuqalisa ngokubobotheka. Kwezinye izikhathi kumele ngithandaze ngicela uncedo lokuthi ngenelise ukwenza khonokho.” Kukhona yini okwakuncedayo ukuthi ube lesibindi enkonzweni? Mxoxele ngakho lowo ohamba laye ekutshumayeleni.
3. Singamxoxelani esihamba laye okungamenza athuthuke enkonzweni?
3 Xoxa Ngezindlela Zokutshumayela: Kukhona yini okuthole kusebenza ensimini yenu ekuqaliseni ingxoxo, njengamazwi okuzethula kumbe umbuzo noma okunye okwenzakalayo emphakathini? Kukhona yini owakwenzayo okwathuthukisa enye intshumayelo eyisibonelo osekukunika impumela emihle? Mxoxele ohamba laye. (Zaga. 27:17) Nxa lisendleleni lisiya phindela, ungamxoxela lokho ofuna ukukwenza lokuthi uhlela ukukwenza njani. Ngemva kwesifundo seBhayibhili ungamtshela ukuthi kungani ukhethe omunye umcijo, umbhalo, kumbe indlela yokufundisa ukuze ufinyelele isidingo somfundi.
4. Kungani kumele sincede amaKhristu esisebenza lawo enkonzweni?
4 AmaKhristu ekhulu lokuqala ayengancedi abantu abangakholwayo kuphela. Babona ukuqakatheka kokuthi bakhuthazane futhi baqinisane njengabazalwane. (ImiSeb. 11:23; 15:32) Umphostoli uPawuli waqeqetsha uThimothi owayesakhula njalo wamkhuthaza ukuthi axoxele labanye lokhu ayesekufundile. (2 Tim. 2:2) Nxa sisenza okuhle kumaKhristu sisenkonzweni, siyabe sibenza bathuthuke njalo bathokoze kanti njalo okuhle kakhulu yikuthi siyabe sithokozisa uBaba wethu.—Heb. 13:15, 16.