Ukuthuthukisa Indlela Esitshumayela Ngayo—Ukuncedisa Ohamba Laye
Okwenza Kuqakatheke: UJesu wakubona ukuqakatheka kokubalomsizi ekutshumayeleni. Yikho ngesikhathi ethuma abalandeli bakhe abangu-70 ukuthi bayetshumayela, wabagaba ngababili. (Lukha. 10:1, The Holy Bible in Ndebele) Umsizi angancedisa ngesikhathi ummemezeli ehlangana lesimo esinzima kumbe nxa engela qiniso lokuthi aphendule njani. (UmTshu. 4:9, 10) Angaxoxa ngalokho ahlangana lakho enkonzweni njalo lapha lalaphayana atshele lowo asebenza laye amacebo okuthi angathuthuka njani enkonzweni. (Zaga. 27:17) Kanti njalo angamkhuthaza ngesikhathi besiya endlini elandelayo.—Flp. 4:8.
Indlela Yokukwenza:
• Lalelisisa ngesikhathi omunye wakho etshumayela. (Jak. 1:19) Nxa kubalwa iBhayibhili lawe vula elakho uhambisane labo. Lokhu kuzakwenza kube lula ukuthi uncedise nxa kufanele wenze njalo.
• Ukukhangelisisa umumo kuzenza ubekwazi ukuthi ungangenela nini engxoxweni. (Zaga. 25:11) Nxa uhamba lomunye ummemezeli eSifundweni, imicijo yakho ingaba lusizo lapha lalaphayana. Kodwa nxa lisendlini ngendlu lowo ohamba laye angafisa ukuzikhulumela nxa kulithuba lakhe. Liqiniso ukuthi nxa engummemezeli omutsha kumbe engela qiniso lokuthi aphendule njani umbuzo,angajabula nxa ungamsiza. Kodwa nxa uhamba lommemezeli kungaba sendlini ngendlu, ezimpindelweni, kumbe ezifundweni ungagami omunye esakhuluma besekusiba nguwe okhulumayo, futhi ungaqalisi udaba olutsha.
• Mxoxele ohlangane lakho. Lapha lalaphayana, ungatshela ohamba laye amacebo okuthi angathuthuka njani enkonzweni. (Zaga. 3:27) Ngesikhathi esifaneleyo, ungaqalisa ngokuthi: “Ucabanga ukuthi ingxoxo leyana uyiqhube njani?” kumbe “Ngingakutshela icebo elithile?” kumbe “Mina ngandise ukwenza lokhu.” Khumbula ukuthi lanxa abanye besamukela iseluleko lapha lalaphayana, ukuveza amaphutha abo zikhathi zonke kungabaqeda amandla.
Zama Ukwenza Okulandelayo Kulinyanga:
• Nxa selitshayisile enkonzweni, tshela obuhamba laye okuhle akwenzileyo kumbe akukhulumileyo okumenze wabangumsizi omuhle.