Ukunika Umuntu Amamagazini Inyanga Yinye Ngayinye—Kuyanceda Ukuthi Uqale Isifundo seBhayibhili
1. Kungani inhlanganiso kaJehova ihlala ikhuthaza abamemezeli ukuthi kube lomuntu abahlala bemnika amamagazini inyanga yinye ngayinye?
1 Abantu abanengi abakuthandi ukufunda lathi iBhayibhili, kodwa bayakuthanda ukufunda amamagazini ethu. Yikho-ke inhlanganiso kaJehova isilesikhathi yakhuthaza abamemezeli ukuthi babe labantu ababanika amamagazini inyanga yinye ngayinye. Njengoba abantu beqhubeka befunda izingwalo zethu bacina sebesiba lesifiso sokufunda iLizwi likaNkulunkulu. (1 Phet. 2:2) Ngemva kwesikhathi bangacina sebebala okunye okungabakhanga bacine sebevuma ukufunda lathi iBhayibhili.
2. Singasithuthukisa njani isifiso somuntu sokufunda esijayele ukumtshiyela amamagazini?
2 ‘Thelela’ Inhlanyelo Yeqiniso: Kulokuthi uphongutshiya amamagazini ubusuhamba, zama ukuqala ingxoxo laye wenze ubungane. Lokhu kuzakwenza ukuthi uzazi izimo akuzo, wazi akuthandayo kanye lakukholwayo, okuzakunceda ukuthi ukhulume laye ngokuhlakanipha. (Zaga. 16:23) Zama ukulungiselela isikhathi sinye ngasinye usiyambona. Nxa kusenza khanyisa umcijo othile kanye lombhalo ophakathi kwemagazini. Ngokwenza lokhu uyabe uthelela inhlanyelo yeqiniso esenhliziyweni yakhe. (1 Khor. 3:6) Bhala phansi ilanga linye ngalinye owamtshiyela ngalo amamagazini, lamamagazini owamtshiyela wona kanye lezihloko lemibhalo elaxoxa ngayo.
3. Kumele sibuyele kangaki ebantwini esijayele ukubanika amamagazini?
3 Kumele Ubuyele Kangaki? Kumele ubuyele kanye ngenyanga lamamagazini amatsha ebantwini obaphathela amamagazini inyanga ngayinye. Kodwa kusiya ngezimo zakho kanye lesifiso salowo muntu, ungakhetha ukumvakatshela kanengana. Ngokwesibonelo, ngemva kweviki noma amabili ungabuyela bese usithi, “Ngithe ngidlule lapha ngikutshengisa umcijo othile ophakathi kwemagazini engakutshiyela yona.” Lokhu kuzakhulisa isifiso sakhe sokubala isihloko esikhulume ngaso. Nxa esesibalile isihloko leso, ungamcela atsho ukuthi yena ucabangani ngesihloko leso beselixoxa ngaso kafitshane. Okunye ongakwenza nxa umuntu lo ethanda ukubala izingwalo zethu yikubuyela kuye bese umnika iphetshana, ibhukwana kumbe ibhuku eliyabe lihanjiswa kuleyo nyanga.
4. Kuyini okumele sihlale sikwenza ukuze sibone ukuthi abantu esijayele ukubaphathela amamagazini balesifiso yini sokufunda iBhayibhili?
4 Ungameleli umninimuzi aze akucele ukuthi ufunde laye iBhayibhili. Mcele wena. Kungelani lokuthi wake wayala ukufunda iBhayibhili, ungamtshengisa isihloko esithi “Imibuzo yeBhayibhili Iyaphendulwa” esiku-Nqabayokulinda ubusubona ukuthi angavuma yini ukuxoxa lawe. Mhlawumbe ungahle uqalise laye isifundo seBhayibhili umi emnyango. Lanxa ungaphumeleli ukuqalisa isifundo seBhayibhili, kumele uqhubeke umphathela amamagazini ukuze uthuthukise isifiso sakhe sokufunda.