Ukuthuthukisa Indlela Esitshumayela Ngayo—Ukuqalisa Isifundo Lomuntu Esimnika Amamagazini Nyanga Zonke

Kungani Kuqakathekile?: Abantu abathanda ukubala amamagazini ethu abafuni ukufunda lathi iBhayibhili. Mhlawumbe balesonto abayingenayo kumbe bacabanga ukuthi kabalaso isikhathi sokufunda. Kodwa nxa beqhubeka bebala amamagazini ethu, isifiso sokufunda iLizwi likaNkulunkulu singakhula. (1 Phet. 2:⁠2) Isihloko esithile singabathinta kwamancane, kumbe izimo zabo zingantshintsha. Ukuqhubeka sibavakatshela okwesikhathi esifitshane kungenza ukuthi basijayele besekusenza sazi abakuthandayo lokubahluphayo. Ngokuhamba kwesikhathi bangacina bevuma ukufunda iBhayibhili.

Indlela Yokukwenza:

Mphathele i-Nqabayokulinda le-Awake! inyanga ngayinye. Ungamvakatshela langezinye izikhathi ukuze ukhulise isifiso sakhe sokufunda amamagazini owamtshiyela wona kumbe ukuyamtshiyela ibhuku elihanjiswayo ngaleyo nyanga. Bhala phansi omtshiyele khona.—⁠Khangela i-Nkonzo Yethu YoMbuso ka-January 2014 ikhasi 3.
Lungiselela lapho usiyabona umuntu munye ngamunye. Kulokuthi uphongumtshiyela amamagazini, xoxa laye njalo uzame ukwakha ubungane ukuze wenelise ukukhulisa isifiso sakhe.
Dinga amathuba okuqalisa isifundo. Nxa omunye walabo ojayele ukubanika amamagazini elombuzo ngendaba eseBhayibhilini, mphathele ibhuku eliphendula umbuzo lowo beselixoxa ngawo. Ungakasuki mbuze umbuzo ohambelana lalokho ebelixoxa ngakho ukuze libuye lixoxa ngawo esikhathini esilandelayo. Nxa lisiba lezingxoxo ezimfitshane kanti njalo likwenza zikhathi zonke lisebenzisa iBhayibhili, kuyabe sokuyisifundo. Usumnikile yini ibhukwana elithi Izindaba Ezinhle njalo wamtshengisa ngamafitshane indlela esifunda ngayo iBhayibhili? Usumtshengisile yini ividiyo ethi Kungani Kumele Ulifunde iBhayibhili? lethi Kwenzakalani Esifundweni SeBhayibhili? Lanxa ekuqaliseni wayengafuni ukuthi lifunde, kumele ukhumbule ukuthi izimo ziyamntshintsha umuntu. Yikho kungaba kuhle ukuthi uphinde ubuyele kuye.

Zama Ukwenza Okulandelayo Kulinyanga:

Bhala phansi amabizo alabo ofuna ukubanika amamagazini inyanga yinye ngayinye. Banike amamagazini aleyonyanga ubusubatshela ukuthi uzabaphathela awenyanga ezayo.