Singabasiza Njani Labo Abangenelisi Ukubala Kuhle?

1. Kuyini okungaba nzima nxa sifundisa abantu abangenelisiyo ukubala kuhle?

¹ Abangenelisi ukubala kuhle bangabe belesifiso sokufunda ngoNkulunkulu kodwa kube nzima ukuthi babale iBhayibhili kanye lamanye amabhuku ethu. Ukunika abantu abanjalo ibhuku elithi Okufundiswa liBhayibhili siqalisa ukuhlangana labo kungabaqeda uthando ngezindaba ezinhle. Singabancedisa njani-ke ukuthi bafunde ngoNkulunkulu? Sabuza abamemezeli abasemazweni adlula angu-20 asebelesikhathi eside enkonzweni ukuthi bona bakwenza njani. Nanku abakutshoyo.

2. Yiwaphi amabhuku angasetshenziswa nxa kufundwa lomuntu ongenelisi ukubala kuhle?

² Nxa umuntu ofunda laye ebala nzima kumbe engenelisi ukubala, ungaqalisa ngebhukwana elithi Lalela uNkulunkulu kumbe elithi Lalela uNkulunkulu Uphile Kuze Kube Nini Lanini. Elinye iphayona lase-United States lijayele ukutshengisa umninimuzi amabhukwana la beselimbuza ukuthi ufuna liphi. Iwofisi legatsha laseKenya lilandisa ukuthi amabhukwana la ayasebenza kakhulu kubo, ngoba mdabuko wabo abantu be-Afrika bajayele ukufunda ngokuxoxelwa izindaba kulokubuzwa imibuzo. Lanxa kungaba lula emuntwini ofundileyo ukuthi abale abesebuzwa imibuzo, lokhu kungaba lukhuni emuntwini ongafundanga kakhulu. Nxa ofundayo esenelisa kancane ukubala, abamemezeli abanengi bajayele ukuqala ngebhukwana elithi Izindaba Ezinhle Ezivela kuNkulunkulu! kumbe elithi Ungaba Ngumngane kaNkulunkulu! kumbe ibhuku elithi IBhuku Lami leZindaba zeBhayibhili.

3. Kuyini okumele sikwazi ukuze senelise ukufundisa labo abangenelisi ukubala?

³ Bancome: Labo abangenelisi ukubala kungabayangisa njalo kubenze bazikhangelele phansi. Ngakho nxa ufuna ukubafundisa iqiniso kumele uqale ubenze bakhululeke. Abantu abanengi abangenelisi ukubala bakhaliphile futhi bayafundiseka. Bahloniphe futhi ubaphathe kuhle. (1 Phet. 3:​15) Nxa bengabona impumela yalokho abakwenzayo, bazakuba lesibindi sokuqhubeka bethuthuka ekukhonzeni. Yikho kumele kube yinjayelo ukubancoma.

4. Singabakhuthaza njani abangenelisi ukubala kuhle ukuthi balungiselele isifundo sesikhathi esizayo?

⁴ Lanxa umfundi engenelisi ukubala kuhle, mkhuthaze ukuthi alungiselele isifundo. Abanye abamemezeli eSouth Africa bakhuthaza abafunda labo ukuthi bacele isihlobo kumbe umngane owenelisa ukubala ukuthi abancedise. Omunye ummemezeli eBritain ukhuthaza afunda labo ukuthi balungiselele ngokubavumela ukuthi basebenzise ibhuku lakhe elidwetshwe izimpendulo. Lokhu ukwenza ngesikhathi befunda izindima ezithile ukuze babone ukuthi kulula kangakanani ukuthola izimpendulo nxa zidwetshiwe. Omunye umzalwane e-India ukhuthaza afunda labo ukuthi bakhangele imifanekiso yesifundo esizayo futhi bacangisise ngayo kuseselesikhathi.

5. Singatshengisa njani ukuthi silesineke ngesikhathi sifunda?

⁵ Bekezela: Kuloba yiliphi ibhuku elilifundayo, kuhle ukuthi libe leqiniso lokuthi imicijo eqakathekileyo iyakhanya ukuze umfundi azwisise. Ngamalanga okuqala kungaba kuhle ukuthi lixoxe okwemizuzu engu-10 kusiya kwengu-15. Ungagijimeli ukuqeda ibhuku kodwa fundani izindima ezilutshwana ilanga ngalinye. Woba lesineke nxa ethatha isikhathi eside ebala. Kuzakuba lula ukuthi athuthukise indlela abala ngayo nxa esemthanda kakhulu uJehova. Ukuze umncedise enelise ukukwenza lokhu, kungcono ukuthi uhle umnxuse liqalisa ukubonana ukuthi aze emihlanganweni yethu.

6. Singabancedisa njani abantu ukuthi bafunde ukubala?

⁶ Nxa abafundi beBhayibhili bangafunda ukubala bazathuthuka masinyane. (Hubo. 1:​1-⁠3) Abantu abanengi sebencede abafunda labo ngokusebenzisa ibhuku elithi Apply Yourself to Reading and Writing okwemizuzu emilutshwana ngemva kwesifundo. Nxa kungenzakala ukuthi umfundi uselahla ithemba ungamenza abe lesibindi sokuqhubeka ngokumkhumbuza izinto asesenelisa ukuzenza. Mqinisekise ukuthi uJehova uzayibusisa imizamo yakhe njalo mkhuthaze ukuthi akhuleke ukuze athole usizo. (Zaga. 16:⁠3; 1 Joh. 5:​14, 15) Abanye abamemezeli eBritain bakhuthaza abafunda labo ukuthi bazimisele ukwenza lokhu okulandelayo: ukwazi i-alphabet, ukudinga lokubala imibhalo ethile kanye lokubala amabhuku alula akhuluma ngeBhayibhili. Ukufundisa abantu ukubala kugoqela ukukhulisa isifiso sokuthi bafune ukubala kulokubatshengisa kuphela ukuthi kwenziwa njani.

7. Kungani kungamelanga sidonde ukubafundisa iqiniso abalemfundo ephansi?

⁷ UJehova kabeyisi labo abalemfundo ephansi. (Jobe. 34:​19) Uhlola izinhliziyo zabantu. (1 ImiLan. 28:⁠9) Yikho lathi kufanele sizame ngamandla ukubafundisa iqiniso labo abangenelisi ukubala. Manengi amabhuku esingawasebenzisa nxa sibafundisa. Ngokuhamba kwesikhathi singaqalisa ukusebenzisa ibhuku elithi Okufundiswa liBhayibhili ukuze bayizwisise kuhle iMibhalo.