Lingisela Intshiseko KaJehova LoJesu Ngesikhathi SeSikhumbuzo
1. Yiwuphi umzamo omkhulu owenziwa ngoFakazi bakaJehova ngesikhathi seSikhumbuzo?
1 UJehova uyakutshisekela ukugcwalisa injongo yakhe. Nxa u-Isaya 9:7 ekhuluma ngezinye izibusiso ezizalethwa nguMbuso kaNkulunkulu uthi: “Ukutshisekela kukaJehova uSomandla kuzakufeza lokhu.” Njengoba udiwo lufuze imbiza, iNdodana kaNkulunkulu layo yatshengisa ukuthi iyakutshisekela ukukhonza kweqiniso ngesikhathi isemhlabeni. (Joh. 2:13-17; 4:34) Izigidi zabamemezeli emhlabeni wonke zenza umzamo omkhulu wokulingisela intshiseko kaJehova loJesu. Lokhu zikwenza ngokwengezelela inkonzo yazo ngesikhathi seSikhumbuzo. Lawe uzakwenza okufananayo yini?
2. Ukuba lentshiseko kuzasinceda ukuthi senzeni kusukela mhlaka-7 March?
2 Umkhankaso WeSikhumbuzo: Lonyaka umkhankaso wokunxusela abantu eSikhumbuzweni uzaqalisa ngoMgqibelo mhlaka 7 March. Lungiselela khathesi ukuze wenelise ukuhlanganyela enkonzweni ngentshiseko. Amabandla azabe eledlabuzane elikhulu kakhulu lokunxusa abantu njalo azakwenza konke okusemandleni awo ukuze aqede insimu yawo. Kasizimiseleni ukusebenza gadalala ukuze simeme izifundo zethu, esisebenza labo, izihlobo, esifunda labo esikolo kanye lezimpindelo. Lokhu singakwenza sisebenzisa isimemo kumbe i-jw.org.
3. Kuyini okungasinceda ukuthi senze okunengi enkonzweni yethu ngo-March lango-April?
3 Ukuba LiPhayona Elisizayo: Intshiseko izasenza sengezelele inkonzo yethu. Akubuzwa ukuthi abamemezeli abanengi bazakuba ngamaphayona asizayo ngo-March lango-April njengoba kuzabe kulohlelo lokuthi amaphayona asizayo abike amahora angu-30. Thandazani ngokuthi lingayingezelela njani inkonzo yenu. Lokhu lingakwenza ngesikhathi sokukhonza kwemuli kumbe ngesikhathi ufunda uwedwa. (Zaga. 15:22) Njengoba insimbi ilola eyinye insimbi, intshiseko yakho ingakhuthaza labanye ukuthi bengezelele inkonzo yabo. Nxa ungahlela ukuthi wenze okunengi enkonzweni yakho uyabe ulingisela intshiseko kaJesu.—UMakho 6:31-34.
4. Yiziphi izibusiso esizazithola nxa singalingisela intshiseko kaJehova loJesu?
4 Sizathola izibusiso ezinengi nxa singalingisela intshiseko kaJehova loJesu ngesikhathi seSikhumbuzo. Lokhu kuzakwenza ukuthi abantu abanengi bazwe izindaba ezinhle. Kanti njalo sizanambitha injabulo yokukhonza uJehova kanye leyokupha. (ImiSeb. 20:35) Kukho konke, okuqakatheke kakhulu yikuthi sizajabulisa uNkulunkulu wethu otshisekayo kanye leNdodana yakhe.