Wasebenziseni Ngokupheleleyo Amathuba Wonke Enkonzweni
Ngomnyaka wenkonzo ka-2014, oFakazi bakaJehova batshumayela amahola angu-1 945 487 604. Lokhu kutshengisa ukuthi sizimisele sibili ukuhlala sikhuthele emsebenzini kaJehova! (Hubo. 110:3; 1 Khor. 15:58) Njengoba sekusele ‘isikhathi esifitshane,’ kufanele sisisebenzise kuhle isikhathi esiba laso enkonzweni ukuze sitshumayeze abantu abanengi.—1 Khor. 7:29.
Kufanele sibe ngabantu abahambelana lezimo ukuze sisisebenzise kuhle isikhathi sethu enkonzweni. Ngokwesibonelo nxa sihlala sisenza umhlobo wenkonzo owodwa kodwa sithola ukuthi kuyedlula ihola kumbe amabili singaxoxanga lomuntu, kungaba kuhle ukuthi senze untshintsho ukuze senelise ukuthola abantu abanengi bokuxoxa labo. Izimo ziyatshiyana kusiya ngendawo. Lanxa kunjalo, amacebo alandelayo angakunceda ukuthi uwasebenzise kuhle wonke amathuba enkonzweni ukuze ‘unganqindi umoya.’—1 Khor. 9:26.
Ukutshumayela Endlini Ngendlu: Sekuyiminyaka eminengi abamemezeli beqalisa inkonzo yabo ngokutshumayela endlini ngendlu. Kodwa kungaba ngcono ukwenza inkonzo yendlu ngendlu ngezikhathi zantambama njengoba abantu abanengi bayabe sebetshayisile emsebenzini njalo bengasabambekanga. Kusukela ekuseni kusiya emini, ukutshumayela emigwaqweni lasensimini elamabhizimusi kungaba lempumela emihle kakhulu.
Ukutshumayela Obala: Amatafula lezinqola zamabhuku kufanele kubekwe ezindaweni eziphithizelayo ezisensimini yebandla lenu. (Khangela Inkonzo Yethu Yombuso ka-July 2013, ikhasi 5.) Nxa indawo eyabe ikhethwe libandla ingasaphithizeli, Ikhomithi Yenkonzo Yebandla ingakhetha ukuthi itafula kumbe inqola yamabhuku kuntshintshwe kuyefakwa kwenye indawo ephithizelayo.
Izimpindela Lezifundo ZeBhayibhili: Nxa singabatholi abantu ngesikhathi sisenza umhlobo othile wenkonzo, kungaba kuhle ukuthi siyebona izimpindela lezifundo zeBhayibhili. Ngokwesibonelo nxa abantu abanengi bandise ukutholakala ngeMigqibelo ekuseni, kungaba ngcono ukuthi inkonzo yendlu ngendlu liyenze ngaleso sikhathi beselisiyabona izimpindela kanye lezifundo emini kumbe ntambama. Ukuze benze okunengi enkonzweni, abamemezeli abagatshwe bonke bangahlela ukuthi bahle bayephindela ebantwini abahlala eduzeduze ngasikhathi sinye.
Lanxa kukuhle ukubika isikhathi esisitshumayelileyo, okuqakathekileyo lokusithokozisayo yikutshumayeza abantu abanengi. Nxa ungabona umhlobo othile wenkonzo ungaphumeleli ngesikhathi esithile, kuhle ukuthi uzame omunye. Thandaza kuJehova “iNkosi yokuvuna,” ukuze akuncedise uwasebenzise ngokupheleleyo amathuba wonke enkonzweni!—Mat. 9:38.