Kuyini Esingakufunda Kulabo Asebelesikhathi Eside Bengabamemezeli?

Sonke siyabathanda kakhulu abamemezeli asebekhulile esilabo emabandleni. Abanye sebeleminyaka eminengi bekhonza uJehova njalo bethembekile kuye. Kanti abanye babo lanxa belesikhathi eside kungenzakala ukuthi eminyakeni esanda kwedlula bafunde ukuba lobuciko enkonzweni. Abamemezeli laba bazibonele ngawabo ukuthi uJesu nguye kanye okhokhela ibandla lobuKhristu njengoba kulokhu kusiba lentuthuko emangalisayo emsebenzini wokutshumayela kulezinsuku zokucina. (Mat. 28:19, 20) UJehova nguye obelokhu ebapha ‘amandla amakhulukazi’ ukuze benze inkonzo yakhe. (2 Khor. 4:7) Lokhu kubancede lokuthi balwisane lobunzima obehlukeneyo ekuphileni kwabo. Kunengi kakhulu esingakufunda kubamemezeli laba abazingcitshi. Kuyabathokozisa kakhulu ukuchathekela abanye ulwazi abalalo. (Hubo. 71:18) Yikho-ke, kumele sizame ukufunda okunengi kubo. Pho singakwenza njani lokhu?

Enkonzweni. Labo abasanda kuba ngabamemezeli kufanele baqeqetshwe ukuze baphumelele enkonzweni. Phela asingeke sikubale sikuqede esingakufunda kubamemezeli asebelesikhathi eside betshumayela. (Khangela isihloko esithi “Hlala Ukhuthele Enkonzweni,” esiku-Nqabayokulinda ka-February 1, 2015 indima yokuqala ekhasini 29.) Wena kukuncede njani ukusebenza labamemezeli laba enkonzweni?

Kungaba kuhle ukuthi ucele ummemezeli owenza kuhle enkonzweni ukuthi litshumayele ndawonye. Nxa ummemezeli lowo engaphilanga kuhle, ungahlela ukuthi kwezinye izikhathi uyefunda lesifundo sakho emzini wakhe. Nxa seliqedile ukufunda ungamcela ukuthi akuphe amacebo athile ngalokho ayabe ekubonile ukuze uqhubeke uthuthuka.

Zama Ukubazi Ngcono: Kufanele uzame sibili ukubazi ngcono abamemezeli laba. Lokhu ungakwenza ngokuchitha isikhathi ulabo. Nxa lilokukhonza kwemuli, linganxusa oyedwa bese limbuza konke eliyabe lifisa ukukwazi. Nxa engaphilanga kuhle, lingenzela ukukhonza kwemuli emzini wakhe. Kanti njalo lingambuza imibuzo le: Walithola njani iqiniso? Yiziphi izibusiso osuke wazinambitha? Yiyiphi intuthuko oyibone isibakhona enkonzweni kwelakini? Ukukhonza uJehova kukulethele injabulo engakanani?

Kunengi kakhulu abamemezeli laba abangasinceda ngakho, kodwa lokhu akutsho ukuthi bakwazi konke. Abamemezeli asebelesikhathi eside labo baleziphiwo ezitshiyeneyo njengathi. (Rom. 12:6-8) Abanye babo bangabe sebeleminyaka eminengi kakhulu njalo lokhu kungabangela ukuthi bangenelisi ukuchitha isikhathi esinengi lathi. Lanxa kunjalo, lunengi kakhulu ulwazi esingaluthapha kubo nanko phela kunengi abahlangane lakho bekhonza uJehova ngokwethembeka.