Amathuluzi Esiwasebenzisa Ekufundiseni
1. Yikuphi ukuhambelana okukhona phakathi komKhristu lombazi oyingcitshi?
1 Umbazi oyingcitshi usebenzisa amathuluzi atshiyeneyo. Amanye amathuluzi uwasebenzisa gqo ikanti amanye uhlala ewasebenzisa. Amathuluzi ahlala ewasebenzisa awaswelakali ebhokisini lakhe njalo uyakwazi ukuwasebenzisa kuhle. IBhayibhili likhuthaza amaKhristu ukuba enze okungcono enkonzweni njalo abe ‘yizisebenzi okungaswelekiyo ukuba zibe lenhloni.’ (2 Tim. 2:15) Ithuluzi eliyisiqokoqela esilisebenzisayo ukuze ‘senze abafundi’ yiLizwi likaNkulunkulu. (Mat. 28:19, 20) Yikho-ke kumele sizame ukuba zintshantshu ‘eziliphatha kuhle ilizwi leqiniso.’ Kanti njalo silungiselelwe amanye amathuluzi amahle okumele sifunde ukuwasebenzisa ngobuciko ukuze sifundise abantu iqiniso.—Zaga. 22:29.
2. Yiwaphi amathuluzi esiwasebenzisa nxa sifundisa?
2 Amathuluzi Esijayele Ukuwasebenzisa: Yiwaphi amanye amathuluzi esingawasebenzisa? Ithuluzi esilisebenzisa kakhulu nxa sifundisa abantu iqiniso eliseBhayibhilini libhuku elithi Lifundisani iBhayibhili Sibili? Nxa umuntu esifunda laye angaqeda ibhuku leli, sifunda laye elithi “Zigcineni Lisethandweni LukaNkulunkulu” ukuze afunde ukusebenzisa izimiso zeBhayibhili ekuphileni kwakhe. Ngakho kumele sibe zingqungquthela sibili ekuwasebenziseni amabhuku la. Amabhukwana ngamanye amathuluzi esingawasebenzisa nxa sifundisa. Ibhukwana elithi Izindaba Ezinhle Ezivela KuNkulunkulu! yilo esilisebenzisa kakhulu ukuze siqalise izifundo zeBhayibhili. Nxa singahlangana lomuntu ongenelisi ukubala kuhle singasebenzisa ibhukwana elithi Lalela UNkulunkulu loba elithi Lalela UNkulunkulu Uphile Kuze Kube Nini Lanini. Kanti njalo amabhukwana la singawasebenzisa nxa singelawo amabhuku olimi olukhulunywa ngumuntu esiyabe sihlangane laye. Ibhukwana esilisebenzisa ukusiza izifundo ukuthi zibuye enhlanganisweni ngelithi Ngobani Abenza Intando kaJehova Lamuhla? Amanye amathuluzi okumele sifunde ukuwasebenzisa kuhle ukuze senze abafundi ngamavidiyo athi Kungani Kumele Ulifunde iBhayibhili?, Kuyini Okwenzakala EWolu LoMbuso? lethi Does God Have a Name? (UNkulunkulu Ulebizo Yini?) etholakala kuwebhusayithi yesiNgisi.
3. Zizasinceda ngani iNkonzo zoMbuso ezizayo?
3 INkonzo zoMbuso ezizayo zizabe zilezihloko ezizasisiza ukuthi sisebenzise amathuluzi esilawo ngobugagu obukhulu kakhulu. Nxa sizama ukusebenzisa kuhle amathuluzi ethu siyabe silalela iseluleko esiseBhayibhilini esithi: “Qaphela kakhulu ukuphila kwakho kanye lemfundiso. Bambelela kuzo, ngoba uma usenza njalo, uzazisindisa wena ngokwakho kanye labakuzwayo.”—1 Tim 4:16.