Singakusebenzisa Njani Okurekhodiweyo?
1. Yikuphi okunye okusincedayo ngaphandle kwamabhuku esilawo?
1 Abantu abanengi bayakuthanda ukusebenzisa iwebhusayithi yethu i-jw.org ukuze babale amabhuku ethu. Akubuzwa ukuthi amabhuku la asekelwe eBhayibhili ayakhwabitheka okwamagama. (UmTshu. 12:10) Kodwa sewake wazisebenzisa yini izinto ezirekhodiweyo? Kufanele sizame ukuzisebenzisa ngoba zenza kube lula ukuthi silalele okunengi okutholakala kuwebhusayithi yethu.
2. Ungakusebenzisa njani okurekhodiweyo nxa ufunda uwedwa loba lemuli yakho?
2 Nxa Ufunda Uwedwa Loba Lemuli: Ukulalela ukubalwa kweBhayibhili okurekhodiweyo, amabhuku kumbe amamagazini ngesikhathi uphakathi kohambo loba nxa uphatheke emisebenzini yansuku zonke kungakunceda ukuthi usisebenzise kuhle isikhathi sakho. (Efe. 5:15, 16) Ukulalela ukubalwa kwebhuku elithile ngapha omunye lomunye ephethe elakhe kungenza ukukhonza kwemuli kuhlabuse. Okurekhodiweyo kungakunceda nxa ubala uwedwa ukuthi uthuthukise indlela obala ngayo kumbe ufunde olunye ulimi.
3. Ngobani ensimini yethu abangancedwa yikulalela okurekhodiweyo?
3 Nxa Usenkonzweni: Abantu abaswela isikhathi sokubala bangakubona kungcono ukulalela okurekhodiweyo. Kanti njalo singahlangana lomuntu okhuluma olunye ulimi, kungenzeka ukuthi abelesifiso sokufunda okunengi nxa singamdlalela okuthile okurekhodwe ‘ngolimi lwakhe.’ (ImiSeb. 2:6-8) Kwamanye amazwe abantu bafunda izinto ngokuxoxelwa. Ngokwesibonelo abantu okuthiwa ngama-Hmong bafunda imbali yakubo ngokulandiselwa njalo okumangalisayo yikuthi bayakubamba phose konke abakuxoxelwayo. Kanti njalo emazweni amanengi ase-Africa abantu bafunda ngokulandiselwa.
4. Ungabanceda njani abantu abasensimini?
4 Bakhona yini ensimini yenu abangancedakala nxa ungabadlalela okurekhodiweyo ngolimi lwabo? Ukhona yini ongancedakala nxa ungamthumezela ibhuku elirekhodiweyo nge e-mail kumbe ngezinye izinto zempucuko? Okunye ongakwenza nxa ungathola umuntu olesifiso sokufunda yikumnika ibhuku eliprintiweyo kanye le-CD yebhuku elirekhodiweyo. Kumele ubike loba yiliphi ibhuku, ibhukwana, iphetshana kumbe imagazini erekhodiweyo oyabe ukunike umuntu enkonzweni. Okurekhodiweyo kwenzelwe ukuthi sihlanyele iLizwi likaNkulunkulu ezinhliziyweni zalabo esibatshumayezayo kanye lokuthi kusincede nxa sifunda sisodwa.—1 Khor. 3:6.