Ukuthuthukisa Indlela Esitshumayela Ngayo​—Ukuncedisa Esibafundisa IBhayibhili Ukuthi Bazinikele Futhi Babhaphathizwe

KUNGANI KUQAKATHEKILE: Ukuze esibafundisa iBhayibhili bamukelwe nguJehova kumele bazinikele kuye futhi babhaphathizwe. (1 Phe 3:21) Bangaqhubeka bezinikele bazathola isivikelo kuloba yini engazama ukubalimaza ekukhonzeni. (Hu 91:1, 2) UmKhristu kufanele azinikele kuJehova hatshi komunye umuntu kumbe emsebenzini loba kweyinye inhlanganiso. Yikho-ke kumele bamthande ngenhliziyo yonke uNkulunkulu futhi bambonge.​—Ro 14:7, 8.

INDLELA YOKUKWENZA:

• Xoxani ngokuthi lokhu elifunda ngakho kumtshelani ngoJehova. Mkhuthaze ukuthi afunde iBhayibhili nsuku zonke njalo akhuleke kuJehova “kokuphela.”​—1The 5:17; Jak 4:8

• Mkhuthaze ukuthi acabange ngokuzinikela kanye lokubhaphathizwa. Okunye ongamncedisa ngakho yikuthi aphendule nxa esemhlanganweni futhi atshumayeze omakhelwana labantu asebenza labo. Ungakhohlwa ukuthi uJehova kabambi muntu ngamandla ukuthi amkhonze. Umuntu ngamunye uyazikhethela ukuthi azinikele kuJehova.​—Dut 30:19, 20

• Ncedisa omfundisayo ukuthi aphile ngendlela ethokozisa uJehova ukuze enelise ukubhaphathizwa. (Zag 27:11) Phela obunye ubuntu leminye imikhuba kuyabe sekumile impande yikho kumele siqhubeke simncedisa ukuthi akhiphe ubuntu bakhe obudala abesefaka obutsha. (Ef 4:22-24) Mtshengise loba lixoxe ngezihloko ezihlala ziphuma ku-Nqabayokulinda ezithi “IBhayibhili Liyakuntshintsha Ukuphila”

• Mxoxele ngokuthi ukukhonza uJehova kukuncede njani.​—Isay 48:17, 18