Umkhankaso Oqakathekileyo Wokuqalisa Izifundo ZeBhayibhili NgoSeptember

NgoSeptember sizasebenza nzima sibili sizama ukuqalisa izifundo zeBhayibhili labantu bonke esibatshumayezayo, sisebenzisa ibhukwana elithi Ungathokoza Kuze Kube Nini Lanini! Abamemezeli abafisa ukuphayona ngenyanga le bazazikhethela ukuthi bafuna ukufikisa amahora angu-50 loba angu-30. Sizawenza njani umkhankaso lo oqakathekileyo?

• Nxa Uqala Ukufika: Sebenzisa ikhasi elisemuva kwebhukwana ukuze wenze omtshumayezayo afise ukufunda, ubusumtshengisa ukuthi isifundo seBhayibhili senziwa njani. Kwenze lokhu lakulabo oke waxoxa labo batshengisa ukuthi bayafuna ukufunda, kuhlanganise lalabo okumele uphindele kubo. Labake bala ukuthi ufunde labo kungenzeka bafune ukufunda khathesi njengoba sesisebenzisa indlela entsha yokufundisa lebhukwana elitsha. Amabhukwana akumelanga atshiywe lapho esingatholanga khona abantu kumbe afakwe ezincwadini kuthunyelwa labo abangazange batshengise ukuthi bayafuna ukufunda. IKhomithi Yenkonzo Yebandla ingahlela ukuthi kube lemihlangano yokuya ekutshumayeleni eminengana ngenyanga leyo.

• Amanye Amathuba: Nxa ibandla lenu lilenqola zamabhuku, fakani ibhukwana elithi Ungathokoza Kuze Kube Nini Lanini! kuzo. Tshelani labo abalifunayo ibhukwana leli ukuthi bangafundiswa leBhayibhili mahala. Lingabatshengisa kafitshane nje ukuthi isifundo senziwa njani kumbe lihlele ukukwenza lokho ngesinye isikhathi. Umbonisi wenkonzo angahlela ukuthi abanye abamemezeli bahambe endaweni yamabhizimusi ensimini yenu ukuze bacele ukufunda labantu iBhayibhili. Lingacela lokufunda iBhayibhili lalabo elisebenza labo kumbe elifunda labo kumbe elixoxa labo ngezindaba ezinhle lingekho ekutshumayeleni.

UJesu wasilaya ukuthi ‘senze abantu babe ngabafundi njalo sibafundise.’ (Mat 28:19, 20) Sengathi umkhankaso lo oqakathekileyo ungasinceda ukuthi sikwenze lokhu sisebenzisa ibhukwana elithi Ungathokoza Kuze Kube Nini Lanini!