Kungani Kulokuzondana Okungaka?

Kungani kulokuzondana okungaka? Okungasinceda sazi isizatho salokho yikuqala sizwisise ukuthi kutshoni ukuba lenzondo, iqalisa njani futhi imemetheke njani.

Kutshoni Ukuba Lenzondo?

Inzondo yikuzwa uzonda omunye umuntu loba iqembu labantu futhi lokhu akutsho ukuphonguzondela umuntu okwesikhatshana nje kodwa yinto eqhubeka ikhona.

INZONDO IQALISA NJANI?

Zinengi izizatho ezingenza abantu bazonde abanye. Izikhathi ezinengi abantu bangazonda umhlobo othile wabantu lanxa abantu labo bengenzanga lutho olubi. Okungenza babazonde yikucabanga ukuthi benza izinto ezimbi, bayingozi kumbe ukuthi ngeke batshintshe. Bangabe bebakhangelela phansi kumbe bebona angani bazabalimaza loba bebona angani bangabadalela inhlupho. Nxa umuntu wake wahlukuluzwa kumbe waphathwa kubi angaqalisa ukuzonda abanye abantu.

INZONDO IMEMETHEKA NJANI?

Kungenzeka ukuthi umuntu aphonguzonda umuntu angakaze ambone. Ngokwesibonelo umuntu angaqalisa ukuzonda umhlobo othile wabantu ngenxa nje yokuthi izihlobo kumbe abangane bakhe bayawuzonda. Lokhu kubangela ukuthi inzondo imemetheke masinyane.

Ukwazi ukuthi inzondo imemetheka masinyane kangakanani kwenza sizwisise ukuthi yindaba emhlabeni kugcwele ukuzondana. Kodwa kulesinye isizatho esenza kube labantu abanengi kakhulu abazonda abanye. Okungasinceda sazi isizatho leso yikuqala sibone ukuthi vele inzondo yaqalisa njani. IBhayibhili kalisifihleli lokho.

IBHAYIBHILI LIYASITSHELA UKUTHI INZONDO YAQALISA NJANI

Ama-arrow amabili ashengisa okwenzakalayo endabeni yokuzondana kwabantu. 1. Ukutshelwa izinto ezingamanga ngabangane kumbe izihlobo loba ngabezindaba. 2. Ukungazi isiko labanye abantu, umhlobo wabo kumbe lokho abakukholwayo. 3. Ukwesaba utshintsho, ukulahlekelwa kumbe okungenzakala. 4. Inzondo okugoqela ukubandlulula lodlakela.

INZONDO AYIQALISANGA EMHLABENI. Yaqalisa ezulwini, ngesikhathi ingilosi eyacina ibizwa kuthiwa nguSathane uDeveli ihlamukela uNkulunkulu. UDeveli waba ‘ngumbulali kusukela eqalisa’ ukuhlamuka. Njengoba ‘engusomangase futhi enguyise wamanga’ uqhubeka esenza ukuthi kube lokuzondana kanye lodlakela emhlabeni. (UJohane 8:44; 1 UJohane 3:11, 12) IBhayibhili lithi uthukuthele kakhulu futhi ulodlakela.—UJobe 2:7; ISambulo 12:9, 12, 17.

KULULA UKUTHI ABANTU BAZONDANE NGOBA SONKE SILESONO. Umuntu wokuqala u-Adamu laye wahlamuka njengoSathane. Lokhu kwenza ukuthi bonke abantu babe lesono. (KwabaseRoma 5:12) Indodana ka-Adamu yokuqala okuthiwa nguKhayini yabulala umfowabo u-Abela ngenxa yenzondo. (1 UJohane 3:12) Kuliqiniso ukuthi bakhona abantu abalothando futhi abalozwelo. Kodwa isono esilaso senza kube lula ukuthi abantu abanengi bangazihluphi ngalokho okufunwa ngabanye, babe lomhawu futhi bazigqaje. Izinto lezi yizo ezibangela ukuthi kube lokuzondana.—2 KuThimothi 3:1-5.

OMUNYE UMUNTU ANGAZONDA ABANYE NGENXA NJE YOKUTHI BATSHIYENE LAYE. Izinto ezenzakala emhlabeni lo zenza kube lula ukuthi abantu bazondane. Emhlabeni kugcwele ubandlululo, ukuthethisana, ukuhlukuluzwa kanye lokubhidlizwa kwezakhiwo ngenxa yokuthi “umhlaba wonke ungaphansi kwamandla omubi,” uSathane uDeveli.—1 UJohane 5:19.

IBhayibhili alipheleli ekusitsheleni kuphela ukuthi inzondo yaqalisa njani, kodwa liyasitshela lokuthi singayinqoba njani.