Kungani Abantu Bezondana Kangaka?—IBhayibhili Lithini?

Kulezinsuku izindaba zigcwele imibiko yokuzondana kwabantu, ukubulalana, udlakela kanye lezimpi ezibangelwa yinzondo.

• “Impi ese-Israel leGaza isibangele ukuthi abantu abanengi bakhulume izinto ezitshengisa ukuthi balenzondo.”—The New York Times, November 15, 2023.

• “Kusukela mhlaka 7 October amacala abangelwa yikuzondana kwabantu asemanengi kakhulu.”—UDennis Francis, umongameli we-United Nations General Assembly, November 3, 2023.

Amazwi ahlabayo, udlakela kanye lezimpi akuqalisanga lamuhla. IBhayibhili liveza ukuthi lakudala babekhona abantu ababekhuluma ‘amazwi ayegwaza njengemitshoko’ futhi bethanda udlakela lokulwa. (IHubo 64:3; 120:7; 140:1) Liphinda litshengise ukuthi indlela abantu abazondana ngayo khathesi igcwalisa isiphrofetho.

Ukuzondana kutshengisa ukuthi siphila ezinsukwini zokucina

IBhayibhili lisitshela ngezizatho ezimbili ezenza abantu bazondane.

1. 1. Lathi kuzakuba lesikhathi lapho ‘uthando lwabanengi oluzaphola’ khona. (UMathewu 24:12) Kulokuthi abantu bathandane, sebesenza izinto ezibangela ukuthi bazondane.—2 KuThimothi 3:1-5.

2. 2. Indlela abantu abazondana ngayo lamuhla itshengisa ukuthi umhlaba ubuswa ngumbusi olesihluku uSathane uDeveli. IBhayibhili lithi “umhlaba wonke ungaphansi kwamandla omubi.”—1 UJohane 5:19, amabala angaphansi; ISambulo 12:9, 12.

IBhayibhili lisithembisa ukuthi sekuseduze ukuthi uNkulunkulu aqede konke okubangela ukuthi abantu bazondane. Kanti njalo uzalungisa wonke umonakalo obangelwe yikuzondana kwabantu. Lithi:

• UNkulunkulu “uzakwesula zonke izinyembezi emehlweni abo. Ukufa akusoze kuphinde kubekhona, loba ukulila loba ukukhala loba ubuhlungu ngeke kusabakhona. Izinto ebezisenzakala sezidlulile.”—ISambulo 21:4.