SINGAKUNQOBA NJANI UKUZONDANA?

1 | Ungakhethi

Okufundiswa LiBhayibhili:

“UNkulunkulu kakhethi, kodwa kuzo zonke izizwe uyamemukela [wonke] umuntu omesabayo njalo owenza okulungileyo.”—IMISEBENZI 10:34, 35.

Ivesi Le Itshoni:

UJehovaa uNkulunkulu kakhangeli ukuthi sivela kuliphi ilizwe, singumhlobo bani, singabantu abamnyama kumbe singabamhlophe, loba ukuthi amasiko ethu anjani. Kodwa ukhangela lokho esikufisayo lesikucabangayo. IBhayibhili lithi: “Abantu bakhangela isimo somuntu, kodwa uJehova ukhangela inhliziyo.”—1 USamuyeli 16:7.

Ivesi Le Ingakunceda Njani?

Thina abantu asenelisi ukubona okusenhliziyweni, lanxa kunjalo singazama ukulingisela uNkulunkulu ngokungakhethi. Zama ukungahluleli umuntu ngokuthi uvela ngaphi kumbe ungumhlobo bani. Nxa ungananzelela ukuthi awubathandi abanye mhlawumbe ngenxa yomhlobo wabo kumbe ukuthi bavela kuliphi ilizwe, thandaza kuNkulunkulu umcele akuncedise ukuthi ukhiphe imizwa enjalo. (IHubo 139:23, 24) Nxa ungathandaza kuJehova ngenhliziyo yonke umcela ukuthi akuncedise ukuthi ungabandlululi, uzawuzwa umthandazo wakho.—1 UPhetro 3:12.

a IBhayibhili lithi ibizo likaNkulunkulu nguJehova.—IHubo 83:18.

“Ngangingakaze ngihlale phansi lomuntu omhlophe sixoxe . . . Khathesi ngasengiphakathi kwemuli elothando sibili.”—UTITUS

Okwake Kwenzakala Komunye:—UTITUS

Wanqoba Inzondo

UTitus wayelilunga leqembu elalilodlakela futhi lingayithandi imithetho eyayisehlukanisa abantu kusiya ngomhlobo wabo. Uthi: “Sasijayele ukuya ezindaweni lapho abantu abamnyama ababengavunyelwa khona, njengasemaweteleni lasemabhawa, ukuze nje siyeqala abamhlophe besesisilwa labo.” UTitus uyavuma ukuthi lokhu wayekwenza ngenxa yokuthi wayebazonda abamhlophe. Uqhubeka esithi: “Kwakusithi nxa ngingaqalisa ukuphikisana lomunye umuntu, kungelani lokuthi ngoyindoda kumbe ngowesifazana, ngangihle ngiqalise mina ukuphosa inqindi.”

UTitus waqala ukutshintsha lapho esefunda iBhayibhili laboFakazi bakaJehova. Ukubala iBhayibhili kwamnceda ukuthi acabangisise ngempilo yakhe. Okwenza watshintshe yisithembiso esithi “ukufa ngeke kusabakhona, loba ukulila loba ukukhala loba ubuhlungu, ngeke kusabakhona.”—ISambulo 21:3, 4.

Ekuqaliseni kwakunzima kuTitus ukuthi ayekele ukuzonda abanye. Uthi: “Kwakunzima kakhulu ukuthi ngitshintshe indlela engangicabanga ngayo lengangisenza ngayo.” Kodwa wancedwa yilokho akufunda kumiSebenzi 10:34, 35 okhuluma ngokuthi uNkulunkulu kakhethi.

Kwaphetha ngani? UTitus uthi: “Ngaba leqiniso lokuthi oFakazi bakaJehova bayinkolo yeqiniso lapho ngibona indlela ababethandana ngayo kungelani lokuthi ngabamnyama kumbe ngabamhlophe. Ngikhumbula ngesikhathi ngingakabhabhathizwa omunye uFakazi omhlophe esasingena laye ebandleni wanginxusa emzini wakhe ukuthi sizokudla sonke. Kwakungani ngiyaphupha. Ngangingakaze ngihlale phansi lomuntu omhlophe sixoxe, singasayiphathi eyokuthi ngidle laye emzini wakhe. Khathesi ngasengiphakathi kwemuli elothando sibili.”