SINGAKUNQOBA NJANI UKUZONDANA?

2 | Ungaphindiseli

Okufundiswa LiBhayibhili:

“Lowo oliphatha kubi lingambuyiseli ngokubi. . . . Nxa kungenzeka futhi kusemandleni enu, hlalani ngokuthula labantu bonke. Lingaziphindiseleli, . . . ngoba kubhaliwe ukuthi: ‘“Ukuphindisela ngokwami; ngizabuyisela mina,” kutsho uJehova.’”—KWABASEROMA 12:17-19.

Ivesi Le Itshoni?

Sijayele ukuzonda nxa umuntu angasiphambanisa, lanxa kunjalo uNkulunkulu kafuni siphindisele. Ufuna sibekezele ngoba usithembisa ukuthi sekuseduze ukuthi aqede konke ukuphathwa kubi.—IHubo 37:7, 10.

Ivesi Le Ingakunceda Njani?

Ukuphindisela kwenza inzondano iqhubeke ikhula. Yikho nxa kulomuntu okucaphulileyo ungaphindiseli. Zibambe futhi wenze ukuthi kube lokuthula. Kwezinye izikhathi kungabangcono ukuthi ukhohlwe ngalokho okwenzakeleyo. (IZaga 19:11) Kodwa kwezinye izikhathi ungakhetha ukuyidlulisela phambili indaba. Ngokwesibonelo kulokunye okungadingeka ukuthi uyekubika emapholiseni loba utshele ezinye iziphathamandla.

Ukuphindisela akuncedi ngalutho

Kodwa ungenzani nxa kungelandlela engcono yokulungisa indaba, kumbe nxa sewenze konke okusemandleni akho ukuthi uzame ukuyilungisa? Lanxa kunjalo ungaphindiseli ngoba lokho kungenza izinto zibe zimbi ngamandla. Nxa ungayekela ukuphindisela uyabe wenze ukuthi ukuzondana kungaqhubekeli phambili. Ungaba leqiniso lokuthi uNkulunkulu uzayilungisa kuhle indaba. IBhayibhili lithi: “Themba kuye, yena uzakwenzela lokhu.”—IHubo 37:3-5.

Okwake Kwenzakala Komunye:—U-ADRIÁN

Wanqoba Isifiso Sokuphindisela

Esakhula, u-Adrián wayesilwa emgwaqweni efuna ukuphindisela kulabo ababemphambanisile. Uthi “Ngangijayele ukulwa ngemibhobho futhi izikhathi ezinengi ngangisala ngithe daca emgwaqweni ngigcwele igazi.”

U-Adrián waqalisa ukufunda iBhayibhili eleminyaka engu-16. Uthi: “Njengoba ngangilokhu ngiqhubeka ngifunda iBhayibhili, ngabona ukuthi kwakumele ngitshintshe ubuntu bami.” Kwakumele ayekele ukuba lenzondo lodlakela. Wancedwa kakhulu yilokho akubala kuRoma 12:17-19 mayelana lokungaphindiseli. Uthi: “Ngakwamukela ukuthi uJehova nguye kuphela ozaqeda ukuphathwa kubi ngesikhathi sakhe esifaneleyo langendlela yakhe. Kancane kancane, ngacina ngitshiya ukuba lodlakela.”

Ngelinye ilanga kuntambama, u-Adrián wahlaselwa liqembu ababejayele ukulwa lalo. Umkhokheli weqembu lelo wathi: “Asilwe ndoda!” U-Adrián uthi: “Ngezwa kuqubuka olunye ulutho kusithi ngilwe.” Kodwa kulokuthi alwe wathandaza kuJehova wasesuka wahamba.

U-Adrián uqhubeka esithi: “Ngelanga elilandelayo ngahlangana lomkhokheli weqembu lelo ehamba yedwa. Ngezwa ngifuthelana kusithi ngiphindisele kodwa ngaphinda ngenza umthandazo omfitshane kuJehova ngimcela ukuthi angincedise ngizibambe. Ngangicabanga ukuthi umkhokheli weqembu lelo laye uzondile kodwa ngamangala lapho engilanda futhi esithi: ‘Ngicela ungixolele ngokwenzakale izolo ntambama. Iqiniso yikuthi lami ngiyafuna ukuba njengawe. Ngifuna ukufunda iBhayibhili.’ Ngathokoza ukuthi ngangenelisile ukuzibamba ngoba lokho kwenza ngaqalisa ukufunda laye iBhayibhili.”