SINGAKUNQOBA NJANI UKUZONDANA?

3 | Khipha Inzondo Engqondweni Yakho

Okufundiswa LiBhayibhili:

“Guqulwani lintshintshe indlela elicabanga ngayo ukuze lihlolisise lizibonele intando kaNkulunkulu enhle, eyamukelekayo futhi epheleleyo.”—KWABASEROMA 12:2.

Ivesi Le Itshoni:

Lokho esikucabangayo kuqakathekile kuNkulunkulu. (UJeremiya 17:10) Kumele sibalekele ukukhuluma loba ukwenza izinto ezitshengisa ukuthi siyabazonda abanye. Kodwa kulokunye futhi okumele sikwenze. Phela izinto esijayele ukuzenza loba ukuzitsho zisuka enhliziyweni lasengqondweni. Yikho kumele siphangise sikhiphe loba yiwuphi umcabango ongasenza sizonde abanye. Nxa singenza njalo siyabe ‘sesiguquliwe’ futhi sesiyinqobile inzondo.

Ivesi Le Ingakunceda Njani?

Zihlole ubone ukuthi ucabangani futhi uzwa njani ngabanye abantu ikakhulu abomunye umhlobo kumbe abavela kwamanye amazwe. Zibuze: ‘Ngibabona njani? Indlela engibabona ngayo isekelwe kulokho engazibonela khona ngawami yini kumbe kulokho engakuzwa ngabanye abantu?’ Ungabukeli futhi ungabali izinto ku-inthanethi ezingakwenza ucine usuzonda abanye kumbe usulodlakela.

ILizwi likaNkulunkulu lingasinceda ukuthi sisuse inzondo enhliziyweni lasengqondweni zethu

Izikhathi ezinengi siyazithethelela nxa sekubuya endleleni esicabanga ngayo kumbe esizwa ngayo. Kodwa iLizwi likaNkulunkulu lingasinceda ukuthi “siqedisise imicabango lenhloso zenhliziyo.” (KumaHebheru 4:12) Yikho qhubeka ulibala iBhayibhili. Qathanisa lokho elikufundisayo lalokho wena okucabangayo futhi uzame ngazo zonke izindlela ukwenza ukuthi lokho okucabangayo kuhambelane lalokho elikutshoyo. ILizwi likaNkulunkulu lingasinceda ukuthi sinqobe inzondo ‘eqine njengezinqaba’ engabe isengqondweni kumbe enhliziyweni zethu.—2 KwabaseKhorinte 10:4, 5.

Okwake Kwenzakala Komunye:—USTEPHEN

Watshintsha Indlela Ayecabanga Ngayo

UStephen labangakibo babewazonda amakhiwa. Ngenxa yalokho wayelalela lokho okwakutshiwo ngelinye iqembu lezombusazwe elalilwela amalungelo abantu. Ngokuhamba kwesikhathi laye waqalisa ukwenza izinto ezazitshengisa ukuthi uyabazonda abanye. UStephen uthi: “Kwezinye izikhathi mina labangane bami sasibukela amafilimu atshengisa indlela abantu abamnyama ababehlupheka ngayo beyizigqili e-United States. Ngelinye ilanga sibukele enye yamafilimu la, saqalisa ukutshaya abanye abantwana abangamakhiwa ababekhonapho esasibukele khona. Sisuka khonapho saya endaweni ezazihlala amakhiwa sidinga abanye abantu esasingabatshaya.”

Indlela uStephen ayecabanga ngayo yatshintsha lapho eqalisa ukufunda iBhayibhili laboFakazi bakaJehova. Uthi: “Njengoba ngasengijayele ukubona ubandlululo olwalukhona phakathi kwamakhiwa labantu abamnyama, ngamangala kakhulu ukubona lokho okwakusenziwa ngoFakazi bakaJehova. Ngokwesibonelo, lapho omunye uFakazi olikhiwa esiyavakatsha kwelinye ilizwe, watshiya abantwabakhe lenye imuli yabantu abamnyama. Kanti futhi amanye amakhiwa angoFakazi athatha elinye ijaha elingumuntu omnyama elalingelandawo yokuhlala ahlala lalo.” Lokhu kwenza uStephen wangathandabuzi ukuthi oFakazi bakaJehova balothando lweqiniso uJesu ayethe lwaluzakuba khona phakathi kwamaKhristu eqiniso.—UJohane 13:35.

Kuyini okwanceda uStephen ukuthi ayekele udlakela kanye lokuzonda abanye? Wancedwa ngumbhalo kaRoma 12:2. UStephen uthi: “Ngananzelela ukuthi kwakumele ngitshintshe indlela engangicabanga ngayo. Kwakumele ngiguqule ingqondo yami ukuze ngingabi lodlakela futhi ngifunde ukuthi ukuba lokuthula yindlela engcono kakhulu yokuphila.” Sekuleminyaka edlula 40 uStephen enqobe inzondo.