1 | —Ukuthandaza ‘Phosela Kuye Konke Okukukhathazayo’

IBHAYIBHILI LITHI: “Liphosele kuye konke okulikhathazayo ngoba yena ulendaba lani.”—1 UPHETRO 5:7.

Okutshiwo Yivesi Le

UJehova uNkulunkulu ufuna umtshele loba yini engabe ikukhathaza. (IHubo 55:22) Ufuna umtshele konke kungelani lokuthi kuncane kumbe kukhulu. Nxa kuqakathekile kuwe woba leqiniso lokuthi kuqakathekile lakuJehova ngoba yena ulendaba lawe lendlela ozizwa ngayo. Ukuthandaza kuqakathekile ngoba kuzakwenza uhlaliseke.—KwabaseFiliphi 4:6, 7.

Ukuthandaza Kuzakunceda Njani?

Nxa uyake ukhathazeke kakhulu kumbe ulomkhuhlane ohlasela ingqondo ungabona angani akulamuntu olendaba lawe. Phela labanye abantu bangabe bengayizwisisi indlela ozizwa ngayo. (IZaga 14:10) Kodwa uJehova uyazwisisa yikho nxa ungathandaza kuye umtshele konke okukukhathazayo uzakulalela. Uyakubona konke okwenzakala kuwe okuhlanganisa lobuhlungu obuzwayo yikho esithi uthandaze kuye.—2 ImiLando 6:29, 30.

Ukuthandaza kuJehova kuzakwenza ungathandabuzi ukuthi ulendaba lawe. Uzazizwa njengomhubi owathandaza wathi: “Ukubonile ukuhlupheka kwami; uyakwazi okungikhathazayo enhliziyweni yami.” (IHubo 31:7) Ukwazi ukuthi uJehova uyabubona bonke ubunzima ophakathi kwabo kuzakunceda ukuthi uqhubeke ubekezela. Kodwa kapheleli ekuboneni ubunzima okubo. Uyakuncedisa njalo akududuze esebenzisa iBhayibhili.

IBhayibhili Limnceda Njani UJulian?

Ukukhathazeka Kungithwalise Nzima

“Ukukhathazeka kungithwalisa nzima njalo ngilomkhuhlane ohlasela ingqondo okuthiwa yi-obsessive compulsive disorder (OCD). Ukukhathazeka kungifikela loba nini. Ngiyabe ngithokoza besekuphonguthi phendu ngiqalise ukukhathazeka. Ngijayele ukukhathazeka ikakhulu nxa ngiphakathi kwabantu, ngiyabe ngizihlupha ngokuthi bangibona njani.

“Abangane bami bayalwazi uhlupho engilalo njalo bayangincedisa kakhulu. Kodwa kwezinye izikhathi bayake bakhulume izinto engibona zingangincedi kangako. Engikubongayo yikuthi bayabe bezamile ukungincedisa.

“Imikhuhlane le engilayo yenza kube nzima ukuthi ngithandaze ngezinye izikhathi. Kuyabe kungalula ukuthi ngihlaliseke ngikhulume loJehova. Imicabango eminenginengi iyabe ilokhu igijima engqondweni yami ngize ngisale ngingasakwazi lokuthi ngithini. Nxa sokunjalo kuyabe sokunzima ukuthi ngimtshele uJehova engikucabangayo lendlela engizizwa ngayo.”

IBhayibhili Liyanginceda Kakhulu

“Ukutaditsha iBhayibhili kungincede ngakwazi ukuthi uNkulunkulu kakhangelelanga ukuthi imithandazo yethu ibe mide kumbe ukuthi sibe zingcitshi zokukhuluma ukuze sithandaze kuye. Kwezinye izikhathi nxa ngisehluleka ukutshela uJehova ukuthi ngizwa njani, ngiyaphonguthi: ‘Jehova ngicela ungincede.’ Lanxa ngiyabe ngikhulume amazwi amalutshwane, ngiyazibonela ukuthi uJehova uyabe engizwile wasengincedisa ngokunginika engikudingayo ngalesosikhathi. Okunye engakwenzayo yikuyabona odokotela. Konke lokhu kungincedile sibili ngoba khathesi sengingcono kakhulu. Lanxa kuyabe kunzima ngezinye izikhathi ukuthi ngithandaze kuJehova ngimtshele indlela engizizwa ngayo, ngiyazama ukukwenza lokhu ngoba ngiyakwazi ukuthi uyangithanda lokuthi uzangincedisa.”