2 | ‘IMibhalo Iyasiduduza’

IBHAYIBHILI LITHI: “Zonke izinto ezabhalwa kudala zabhalelwa ukuthi kufundiswe thina. Lokho kwenza sibe lethemba ngoba iMibhalo le isinceda ukuthi siqinisele njalo iyasiduduza.”—KWABASEROMA 15:4.

Okutshiwo Yivesi Le

IBhayibhili lilamazwi aduduzayo angakunceda ukuthi ube lamandla njalo uqinisele nxa uthwaliswe nzima yimicabango ekukhathazayo. IBhayibhili lizaphinda likwenze ube lethemba lokuthi bonke ubuhlungu ongabe ubuzwa khathesi buzaphela.

IBhayibhili Lizakunceda Njani?

Sonke siyake sikhathazeke ngezinye izikhathi kodwa umehluko yikuthi labo abalomkhuhlane wokuhlulukelwa kumbe owokukhathazeka kakhulu bona balwisana lakho nsuku zonke. Manje iBhayibhili lingabanceda njani abantu abanjalo?

Ukubala iBhayibhili kuzakunceda ukuthi ube lemicabango emihle. (KwabaseFiliphi 4:8) Ukulibala kuzakwenza ugcwalise ingqondo yakho ngemicabango eduduzayo okuzakunceda ukuthi ulwisane lemicabango ekukhathazayo.—IHubo 94:18, 19.
IBhayibhili lizakunceda ukuthi ungacabangi ukuthi awuqakathekanga.—ULukha 12:6, 7.
Kulamavesi amanengi eBhayibhilini azakunceda ubone ukuthi uNkulunkulu wethu owasidalayo ulawe lokuthi uyazwisisa indlela ozwa ngayo.—IHubo 34:18; 1 UJohane 3:19, 20.
IBhayibhili lithi uNkulunkulu uzayisusa yonke imicabango esenza sidane. (U-Isaya 65:17; Isambulo 21:4) Yikho nxa kulemicabango esihluphayo, ukukhumbula isithembiso lesi kuzasenza sibe lamandla okuqinisela.

IBhayibhili Limnceda Njani UJessica?

Ukuhlulukelwa Kungithwalise Nzima

“Ngathi ngileminyaka engu-25, ngaqalisa ukukhathazeka kakhulu ngaze ngacina ngibanjwa umkhuhlane wokuhlulukelwa. Ngasengiphongukufikelwa yimicabango yezinto ezibuhlungu ezenzakala kimi kudala. Odokotela bangitshela ukuthi ukuhlulukelwa kwami kubangelwa yikuthi ngicabanga kakhulu ngezinto ezibuhlungu ezenzakala kimi. Banginika amaphilisi bangikhuthaza lokuthi ngiye ku-counselling ukuze ngilungisise indlela engicabanga ngayo.”

Ukubala IBhayibhili Kuyanginceda Kakhulu

“Nxa ukuhlulukelwa kungaqalisa ngiyakhathazeka kakhulu ngizizwe ngisesaba njalo kuyabe sokunzima ukuthi ngilale. Izikhathi ezinengi ngifikelwa yimicabango eyethusayo ebusuku engenza ngingahlaliseki. IHubo 94:19 liyanginceda kakhulu ngoba litshengisa ukuthi uNkulunkulu angangiduduza njalo angiqinise nxa sengikhulelwa yikukhathazeka. Ngijayele ukufaka iBhayibhili lami kanye lebhuku engibhalela kulo amanotsi eduze kombheda wami. Nxa sengisehluleka ukulala ngenxa yemicabango engikhathazayo ngiyavuka ngibale iBhayibhili futhi imicabango kaNkulunkulu iyangiduduza.

“IBhayibhili lisikhuthaza ukuthi silahle imicabango ephikisana lalokho esikwaziyo ngoNkulunkulu. Kudala ngangizitshela ukuthi angiqakathekanga, akulamuntu ongangithanda lokuthi angilancedo. Kodwa sengafunda ukuthi imicabango enjalo ayihambelani lalokho okutshiwo liBhayibhili ngoba lona lithi uNkulunkulu ungubaba olothando lesihawu njalo olendaba lomuntu ngamunye. Ngaqalisa kancane kancane ukungavumeli ukuthi imicabango yami ingibuse kodwa kube yimi engiyiqondisayo. Khathesi sengizibona ngendlela uNkulunkulu angibona ngayo futhi lokhu kungincede kakhulu ukuthi ngingazikhangeleli phansi.

“Ngisilindele ngabomvu isikhathi lapho okuzasuswa khona yonke imicabango ebuhlungu lesikhathazayo. Ngiyakwazi ukuthi sizafika isikhathi lapho yonke imikhuhlane ehlasela ingqondo eyabe ingasekho khona. Ukwazi lokhu kuyanginceda ukuthi ngiqinisele lokuthi ngihlale ngilethemba lokuthi ukuhlulukelwa kwami kuzaphela.”