3 | Izibonelo EziseBhayibhilini Zizakunceda

IBHAYIBHILI LISITSHELA . . . Ngamadoda labesifazana ababethembekile kuNkulunkulu ‘ababelemizwa enjengeyethu.’—UJAKHOBE 5:17.

Okutshiwo Yivesi Le

EBhayibhilini kulezindaba ezinengi zamadoda labesifazana ababezizwa ngendlela esiyake sizizwe ngayo lathi ngezinye izikhathi. Ukubala ngabo kuzakwenza ubone ukuthi ayisuwe wedwa oyake uzizwe ngalindlela.

Ukubala Izindaba Lezi Kuzakunceda Njani?

Sonke nje siyafuna ukuthi abantu basizwisise, kodwa abafuna kakhulu ukuzwisiswa yilabo abalohlupho lokukhathazeka. Nxa ungabala ngabantu abatshiyeneyo okukhulunywa ngabo eBhayibhilini, uzabona ukuthi bakhona abake bazizwa ngendlela ongabe uzizwa ngayo lawe. Lokhu kuzakunceda unanzelele ukuthi awuwedwa ngoba kulabanye abake bakhathazeka njengawe.

IBhayibhili lilamazwi akhulunywa ngabantu abake bazibona bengelancedo njalo bengakwazi lokuthi baphilelani. Wena uyake ukhathazeke kakhulu yini uze ucine ubona angani awusenelisi ukuqhubeka uphila? Lokhu kwake kwenzakala kuMosi, lo-Elija loDavida.—AmaNani 11:14; 1 AmaKhosi 19:4; IHubo 55:4.
IBhayibhili lisitshela ngowesifazana okuthiwa nguHana owayesizwa ubuhlungu ngoba wayengelamntwana ngapha lonyanewabo emthwalise nzima.—1 USamuyeli 1:6, 10.
IBhayibhili lisitshela ngokwenzakala kweyinye indoda okuthiwa nguJobe. Lanxa wayelokholo oluqinileyo kuJehova, kulesikhathi lapho akhathazeka khona kakhulu waze wathi: “Sengidiniwe ngempilo yami; angisafuni ukuphila.”—UJobe 7:16.

Nxa ungabala ngabantu okukhulunywa ngabo eBhayibhilini abalwisana lemicabango eyayibenza bakhathazeke, uzaba lamandla okulwisana lokwakho ukukhathazeka.

IBhayibhili Limnceda Njani UKevin?

Umkhuhlane We-Bipolar Ungithwalise Nzima

“Ngabanjwa umkhuhlane we-bipolar sengisiyafikisa iminyaka engu-50. Kwezinye izikhathi ngiyabe ngisizwa angani akulanto engangehlula empilweni. Ikanti kwezinye ngiyabe ngizibuza ukuthi ngiphilelani.”

Izibonelo EziseBhayibhilini Ziyanginceda Kakhulu

“Eyinye indaba eseBhayibhilini enginceda kakhulu ngekaPhetro. Wenza amaphutha abangela ukuthi azibone engumuntu ongelancedo. Kodwa kulokuthi ahlale ecabanga ngaleyondlela, uPhetro wazinika isikhathi sokuba labangane ababelendaba laye. Nxa lami ungihlasele kakhulu umkhuhlane lo, ngiyabe sengicabanga ukuthi angilancedo ngitsho ngenxa yamaphutha engiwenzileyo. Lami njengoPhetro, sengafunda ukuthi kuqakathekile ukuhlala ngiseduze labangane abazimiseleyo ukungincedisa ukuthi ngiqhubeke ngempilo.

“Omunye okukhulunywa ngaye eBhayibhilini ongenza ngiduduzeke yiNkosi uDavida. Wayeke akhathazeke ngezinto ezazisenzakala empilweni yakhe langamaphutha ayewenzile. Ngiyamzwisisa sibili ngoba lami ngezinye izikhathi ngiyake ngenze kumbe ngikhulume into engicina ngizisola ngayo. Amazwi kaDavida akuHubo 51 ayangiduduza kakhulu. Kuvesi 3 wathi: “Ngizazi mhlophe iziphambeko zami lesono sami sihlezi siphambi kwami.” Amazwi la aveza yona kanye indlela engiyabe ngisizwa ngayo nxa umkhuhlane lo ungihlasele kakhulu ngoba ngiyabe ngicabanga ukuthi akulanto engiyenza kuhle. Ngithanda lamazwi kaDavida akuvesi 10 athi: “Yenza inhliziyo yami ibe msulwa, awu Nkulunkulu, ungenze ngitshintshe indlela engicabanga ngayo ukuze ngibe qotho.” Lami ngiyake ngithandaze njengoDavida ngicela uNkulunkulu ukuthi angincedise ngingabi lemicabango yokuzeyisa. Ivesi 17 layo iyangiduduza. Ithi: “Inhliziyo edabukileyo futhi esebuhlungwini awusoze uyilahle, awu Nkulunkulu.” Ivesi le ingenza ngingathandabuzi ukuthi uNkulunkulu uyangithanda.

“Ukucabangisisa ngezibonelo eziseBhayibhilini kanye lendlela uJehova angincedisa ngayo khathesi kwenza ngibe lethemba eliqinileyo. Angizithandabuzi izithembiso eziseBhayibhilini futhi lokhu kwenza ngiqhubeke ngithokoza.”