IMIBUZO EBUZWA NGABASAKHULAYO
Ungakhulelwa Yimizwa Yakho
“Kwezinye izikhathi ngiyabe ngithabile sibili kodwa kwezinye ngiyabe ngidane kakhulu.” Izinto ebengisenelisa ukulwisana lazo izolo, lamuhla sezinzima kakhulu.”—UCarissa.
Uyake uhlutshwe yikuntshintshantshintsha kwemizwa yakho yini?a Nxa kunjalo, isihloko lesi sizakunceda kakhulu.
Kungani uzizwa njalo?
Uhlupho lokuntshintshantshintsha kwemizwa lujayele ukuhlasela abasakhulayo abaleminyaka engu-13 kusiya kwengu-19. Mhlawumbe lawe ulalo uhlupho lolu futhi luyakumangalisa.
Nxa ukhathazwa yikuthi kungani imizwa yakho intshintshantshintsha, khumbula ukuthi izikhathi ezinengi kwenziwa yikukhula. Kodwa okuhle yikuthi ungenelisa ukulwisana lemizwa yakho.
Iqiniso: Nxa ungalwisana lemizwa yakho usakhula kuzakunceda nxa usukhulile.
Ukuhlutshwa yimizwa kunjengamagodi asemgwaqweni. Umtshayeli oyingcitshi uyawavika amagodi anjalo
Izinto ezintathu ongazenza
Khuluma. IBhayibhili lithi: “Umngane ulothando ngezikhathi zonke, lomzalwane uzalelwa izikhathi zenhlupheko.”—IZaga 17:17.
“Kulomunye umngane wami engimbona njengobabakazi. Uyangilalela sibili nxa ngimtshela okusenhliziyweni yami. Nxa ngingakhuluma into eqondileyo uyangincoma kodwa nxa ngingakhuluma okungaqondanga uyangiqondisa.”—UYolanda.
Okungakunceda: Ungakhulumi labatsha kuphela ngoba labo kungenzeka bahlutshwa yimizwa efananayo, kodwa khuluma lomzali wakho kumbe umuntu omdala omthembayo.
Bhala. Ngesikhathi uJobe ephakathi kosizi wathi: “Ngakho sengizasola ngingasathikazi ngithulule ubuhlungu bomphefumulo wami.” (UJobe 10:1) Eyinye indlela ongaveza ngayo imizwa yakho yikubhala phansi.
“Ngihlala ngithwele okulibhukwana kwami. Nxa kungenzakala into engiphatha kubi ngihle ngiyibhale phansi. Ukubhala phansi kuyanginceda sibili.”—U-Iliana.
Okungakunceda: Gcina ibhuku ozabhala kulo indlela ozizwa ngayo, imbangela yakhona lendlela ongakunqoba ngayo. Itshathi elihambisana lesihloko lesi lizakunceda ukuthi wenze njalo.
Thandaza. IBhayibhili lithi: “Yethula iziswelo zakho kuJehova yena uzakusekela; akazukuyekela abalungileyo bawe.”—IHubo 55:22.
“Ngiyathandaza kokuphela kuJehova nxa ngikhathazekile. Nxa ngingamtshela indlela engizizwa ngayo ngiyakhululeka kakhulu.”—UJasmine.
Okungakunceda: Kungelani lokuthi ukhathazeke kangakanani bhala izinto ezintathu ofuna ukubonga uJehova ngazo. Nxa usuthandaza mcele akusize kodwa ungakhohlwa ukumbonga ngezibusiso akunike zona.
a Isihloko lesi sikhuluma ngemizwa ehlupha abasakhulayo lamuhla. Nxa uyake uhlulukelwe khangela isihloko esithi “How Can I Deal With Depression?”