4 | IBhayibhili Lilamacebo Azakunceda

Okutshiwo Yivesi Le

Lanxa iBhayibhili lingayisilo bhuku lezempilakahle, amacebo akulo ayanceda sibili. Amacebo la angamnceda kakhulu umuntu olomkhuhlane ohlasela ingqondo. Nanka amanye akhona.

Amacebo AseBhayibhilini Azakunceda Njani?

“Abantu abaphilileyo abamdingi udokotela, abagulayo yibo abamdingayo.”—UMATHEWU 9:12.

IBhayibhili litshengisa ukuthi kwezinye izikhathi kungadingeka ukuthi siyedinga uncedo kwabezempilakahle. Abanengi abalemikhuhlane ehlasela ingqondo bancedwe yikudingisisa okunengi ngemikhuhlane yabo lokuyabona odokotela.

“Ukuqeqetsha umzimba kuyawunceda.”—1 KUTHIMOTHI 4:8, Contemporary English Version.

Ukwenza izinto ezenza umzimba uhlale uqinile kuzakunceda ukuthi uhlaliseke engqondweni. Izinto lezi zigoqela ukuba lohlelo lokuqeqetsha umzimba, ukudla ukudla okwakha umzimba kanye lokuzinika isikhathi eseneleyo sokulala.

“Inhliziyo ethokozayo ingumuthi, kodwa ukudabuka emoyeni kuqeda amandla.”—IZAGA 17:22.

Ukubala indaba ezikhuthazayo eziseBhayibhilini kanye lokuhlela ukwenza izinto ozenelisayo kuzakunceda ukuthi uhlale uthokoza. Ukuhlala ucabanga ngezinto ezinhle lokuba lethemba lokuthi izinto zizalunga esikhathini esizayo kuzakunceda ukuthi ulwisane laloba yiwuphi umkhuhlane ohlasela ingqondo.

“Ukuhlakanipha ngokwabazithobayo.”—IZAGA 11:2.

Kwesinye isikhathi ungehluleka ukwenza ezinye izinto, yikho vuma ukuthi abanye bakuncedise. Abangane bakho labangakini bangabe befuna ukukuncedisa kodwa bengakwazi ukuthi bakuncedise njani. Batshele ukuthi ufuna bakuncedise njani kodwa ungakhangeleli ukuthi benze okungaphezu kwamandla abo njalo bonga loba yini abakwenzele yona.

IBhayibhili Libancede Njani Abanye?

“Ngangibona ukuthi kulento engahambi kuhle, yikho ngayabona udokotela wasengitshela ukuthi uhlupho lungaphi. Lokhu kwanginceda ukuthi ngizwisise uhlupho engilalo lokuthi ngibezazi indlela zokwelatshwa ezikhona.”—UNicole,a olomkhuhlane we-bipolar.

“Sengananzelela ukuthi ukubala iBhayibhili lomkami nsuku zonke ekuseni kuyanginceda ukuthi ngibe lemicabango emihle. Kwezinye insuku nxa ukuhlulukelwa sokungikhulela ngiyakhumbula ivesi eduduzayo engake ngayibala.”—UPeter, othwaliswe nzima yikuhlulukelwa.

“Kwakunzima ukuthi ngitshele abanye ngohlupho lwami ngoba lwalungiyangisa. Kodwa ngacina ngitshela umngane wami wasengilalelisisa futhi wazama ukuzwisisa isimo engangikuso. Wangenza ngazizwa ngingcono futhi ngabona lokuthi angingedwa.”—UJi-yoo, olohlupho lokungadli kuhle.

“IBhayibhili lingincedile ukuthi ngibe leqiniso lokuthi ngilesikhathi eseneleyo sokusebenza lesokuphumula. Inhlakanipho ekulo ingisizile ukuthi ngenelise ukulwisana lokukhathazeka engiba lakho.”—UTimothy, ohlutshwa yi-obsessive-compulsive disorder.