Imikhuhlane Ehlasela Ingqondo Isibhahile Emhlabeni Wonke
“Ngihlala ngiphonguzizwa ngikhathazekile nxa ngingedwa endlini.”
“Nxa ngingathaba kakhulu ngihle ngikwazi ukuthi kukhona okungahambi kuhle. Okulandelayo yikudana kuphela.”
“Ngiyazama ukukhangela okwenzakala usuku ngalunye kodwa kwezinye izikhathi ngisuka ngikhathazeke kakhulu ngenhlupho engilazo.”
Kuyake kwenzakale kuwe yini lokhu okukhulunywe phezulu? Kulomuntu omaziyo yini othwele nzima ngakho?
Nxa kunjalo woba leqiniso lokuthi awuwedwa. Imikhuhlane yengqondo ihlupha abantu abanengi.
Kuyazicacela sibili ukuthi siphila ‘ezinsukwini zokucina okunzima ukuphila kuzo.’ (2 KuThimothi 3:1) Okunye ukuchwayisisa okwenziwayo kutshengisa ukuthi emhlabeni wonke umuntu oyedwa kwabangu-8 uthwele nzima ngenxa yomkhuhlane ohlasela ingqondo. Ngo-2020 umkhuhlane we-COVID-19 wabangela ukuthi inani labantu abahlutshwa yikukhathazeka liqanse ngamaphesenti angu-26 ikanti elalabo abahlulukelweyo laqansa ngamaphesenti angu-28.
Kuqakathekile sibili ukwazi ukuthi banengi kangakanani abantu abahlaselwe yikukhathazeka lokuhlulukelwa. Kodwa okuqakatheke kakhulu yikwazi ukuthi singabancedisa njani abantu abanjalo.
Kutshoni ukuba lengqondo ephilileyo?
Umuntu ongelamkhuhlane ohlasela ingqondo uyenelisa ukwenza kuhle izinto. Kahlali ekhathazekile, usebenza kuhle futhi uyasuthiseka ngempilo yakhe.
Nxa ulomkhuhlane ohlasela ingqondo . . .
AKUTSHO ukuthi kulento embi oyenzileyo.
KODWA KUTSHO ukuthi ingqondo yakho iyabe isiphambanisekile okokuthi uyabe usuhlala ukhathazeke kakhulu.
Imikhuhlane ehlasela ingqondo ingenza umuntu ehluleke ukuba labangane futhi ehluleke lokwenza izinto okumele azenze nsuku zonke.
Ayikhethi ukuthi umuntu ungakanani, ungumhlobo bani, uvela ngaphi, ungena yiphi isonto, ufunde kangakanani loba ukuthi unothe kangakanani.
Kuyini Ongakwenza Nxa Ulomkhuhlane Ohlasela Ingqondo?
Kungaba kuhle ukuthi lihle lidinge uncedo kwabezempilakahle nxa wena kumbe omunye emulini eselempawu lezi ezilandelayo: Nxa eselala kakhulu kumbe engasalali, esidla kakhulu kumbe engasadli, esehlala ekhathazekile loba edanile. Kodwa ungaluthola ngaphi usizo?
UJesu wathi: “Abantu abaphilileyo abamdingi udokotela, abagulayo yibo abamdingayo.” (UMathewu 9:12) Umuntu olomkhuhlane ohlasela ingqondo kumele ahle adinge usizo lwabezempilakahle kungakabi kubi kakhulu.a Lokhu kungabanceda ukuthi imikhuhlane ingabathwalisi nzima kakhulu.
Lanxa iBhayibhili lingayisilo bhuku lezempilakahle, elikutshoyo kungakunceda kakhulu. Sicela ubale izihloko ezilandelayo ukuze ubone ukuthi iBhayibhili lingabanceda njani labo abalemikhuhlane ehlasela ingqondo.
a INqabayokulinda kayifaki mthetho wokuthi umkhuhlane lo ungelatshwa njani. Umuntu ngamunye kumele aqale adingisise ukuthi yiziphi indlela zokwelatshwa ezikhona abesekhetha ukuthi uzakwelatshwa njani.