Kuyini Okuzakwenziwa NguMbuso KaNkulunkulu Ngokugula?

“Lanxa umkhuhlane we-COVID-19 ungasamemetheki ngendlela owawumemetheka ngayo kuqala, lokhu akutsho ukuthi abantu abasekho engozini yokubanjwa ngumkhuhlane lo.. . . Kumele silungiselele khathesi ngoba kungaphinda kuhlasele umkhuhlane omemethekayo loba nini.”—UTedros Adhanom Ghebreyesus, unobhala jikelele weWorld Health Organization, May 22, 2023.

Abantu abanengi bathwele nzima ngemikhuhlane etshiyeneyo kanye lokukhathazeka okubangelwe yikumemetheka komkhuhlane we-COVID-19. Ohulumende kanye lalabo ababona ngezempilakahle bazabe belungiselele yini nxa kungaba lomunye umkhuhlane omemethekayo? Bayenelisa yini ukuqeda imikhuhlane ekhona khathesi?

IBhayibhili lisitshela ngohulumende ozaqeda konke ukugula. Lithi: “UNkulunkulu osezulwini uzabeka umbuso” kumbe uhulumende. (UDanyeli 2:44) Nxa sesibuswa nguhulumende lo “akulamuntu ohlala khona ozakuthi: ‘Ngiyagula.’” (U-Isaya 33:24) Ngalesosikhathi wonke umuntu uzabe eseqine saka.—UJobe 33:25.