“Ukusondela KuNkulunkulu” Kuzahlala Kusinceda

1-2. (a) Kuyini okumele abantu bakwenze ukuze babe ngabangane? (b) Sizaxoxa ngani esihlokweni lesi?

USAKHUMBULA yini ukuthi kuyini okwenza wena lomngane wakho laba ngamathe lolimi? Engxenye yikutshona lonke ekulandisela okwenzakala empilweni yakhe waze wacina ususazi akuthandayo lalokho akuzondayo. Wananzelela ukuthi ulobuntu futhi uyafisa ukumlingisela. Lokhu kwenza wamthanda kakhulu.

² Nxa abantu befuna ukuba ngabangane kumele bazinike isikhathi sokuba ndawonye. Lathi nxa sifuna ukuba ngabangane bakaJehova kumele sizinike isikhathi sokufunda ngaye. Esihlokweni lesi sizabona ukuthi singenzani ukuze sisondele kuNkulunkulu lokuthi ukusondela kuye kuzasinceda ngani. Khathesi asixoxeni ngokuthi kungani kukuhle ukusondela kumngane wethu uJehova.

3. Kungani kumele sicabangisise ngokuthi ukusondela kuJehova kusinceda ngani?

³ Akulambuzo ukuthi lawe awuthandabuzi ukuthi ukusondela kuJehova kuyanceda kakhulu. Kodwa okuzakunceda ukuthi uqhubeke usondela kuJehova yikucabangisisa ngokuthi ukwenza njalo kuzakunceda ngani. (Hubo. 63:​6-8) Ngokwesibonelo, siyakwazi ukuthi ukudla ukudla okwakha umzimba lokuwuqeqetsha, ukuzinika isikhathi eseneleyo sokulala kanye lokunatha amanzi kuyasinceda kakhulu. Abanengi abakaze bazihluphe ngokuthi izinto lezi zibanceda njani. Bakhohliwe nje ngempilakahle yabo. Kodwa nxa singacabangisisa ngokuthi izinto lezi ziyinceda njani imizimba yethu sizazimisela ukuzenza. Kunjalo lokusondela kuJehova. Singabe sikwazi ukuthi kuyanceda sibili kodwa ukucabangisisa ngokuthi kunceda ngani yikho okuzasenza sizimisele ukuqhubeka sisondela kumngane wethu uJehova.—Hubo. 119:​27-30.

4. Umhubi wathini kuHubo 73:28?

⁴ Bala iHubo 73:28. Umlobi weHubo 73 wayengumLevi owayekhethwe ukuthi abe ngumhlabeleli ethempelini likaJehova. Kufanele ukuthi wayeselesikhathi sibili ekhonza uJehova. Lanxa kunjalo wayekubona kuqakathekile “ukusondela kuNkulunkulu” futhi wayekhumbuza labanye ukuthi benze njalo. Kusinceda ngani ukusondela kuNkulunkulu?

“UKUSONDELA KUNKULUNKULU” KUSENZA SITHOKOZE

5. (a) Kungani sisithi ukusondela kuJehova kuzasenza sithokoze? (b) Ukuhlakanipha esikuthola eLizwini likaNkulunkulu kusinceda njani? (Zaga 2:​6-16)

⁵ Nxa singasondela kakhulu kuJehova sizathokoza. (Hubo. 65:4) Zinengi izizatho ezenza sithokoze. Nxa singalandela lokhu okutshiwo liBhayibhili siyahlakanipha futhi ukuhlakanipha lokhu kuyasivikela ezintweni ezingasilimaza. (Bala iZaga 2:​6-16.) Yikho iBhayibhili lisithi: “Uyathokoza umuntu othola ukuhlakanipha, lomuntu ozuza ukuqedisisa.”—Zaga. 3:13.

6. Kungani umhubi wayengasathokozi?

⁶ Kuliqiniso ukuthi ngezinye izikhathi labangane bakaJehova bangadana baphele amandla. Kulesikhathi lapho umlobi weHubo 73 ayengasathokozi khona ngoba wayecabanga ukuthi impilo iyamphika ngenxa yokuthi ukhonza uJehova. Wayebona abantu abangamkhonziyo bephumelela, bephila impilo entofontofo. Wayebona abantu abalodlakela futhi abazikhukhumezayo benothile, beqine saka futhi konke kukhanya kutshelela empilweni yabo. Lokhu kwamcaphula waba lomhawu waqalisa ukufisa ukuthi ngabe laye ulakho lokho abalakho. (Hubo. 73:​3-7, 12) Umhubi lo wakhathazeka waze wacabanga ukuthi ukukhonza uJehova akuncedi ngalutho, yikho waze wathi: “Akungincedanga ngalutho ukugcina inhliziyo yami imsulwa, lokugeza izandla zami ngitshengisa ukuthi angilacala.”—Hubo. 73:13.

7. Singenzani ukuze siqhubeke sithokoza lanxa silenhlupho? (Khangela lomfanekiso ongaphandle.)

⁷ Umhubi kazange avume ukuthi ukudana lokhu kumqede amandla. Manje wenzani? ‘Wangena endaweni engcwele kaNkulunkulu.’ Lokhu kwamnceda ukuthi abone izinto ngendlela uJehova abona ngayo. (Hubo. 73:​17-19) UJehova umngane wethu omkhulu uyasibona nxa sidanile. Nxa singathandaza kuJehova simcele ukuthi asincedise futhi sikusebenzise lokho asitshela khona eLizwini lakhe lasebandleni sizakuba lamandla okuqhubeka simkhonza lanxa siphakathi kobunzima. Lanxa inhlupho zingaze zibuye zibhabhulene uJehova uzahlala esiduduza futhi asincede ukuthi sihlaliseke.—Hubo. 94:19.a

“UKUSONDELA KUNKULUNKULU” KWENZA SIKHOLISE IMPILO NJALO SIBE LETHEMBA

8. Ukusondela kuJehova kuphinda kusincede njani?

⁸ Ake sixoxe ngezinye izindlela ezimbili ukusondela kuNkulunkulu okusinceda ngazo. Okokuqala, nxa ungumngane kaNkulunkulu uyabe ukwazi ukuthi uphilelani. Okwesibili, kuyakunceda ungathandabuzi ukuthi izithembiso zikaJehova zizagcwaliseka. (Jer. 29:11) Asixoxeni kabanzi ngezizatho lezi.

9. Kungani kuyisibusiso esikhulu ukuba ngumngane kaJehova?

⁹ Ukuba ngabangane bakaJehova kuyasinceda sikwazi ukuthi siphilelani. Kulabantu abanengi abacabanga ukuthi uNkulunkulu kakho. Kabakwazi ukuthi abantu bavela ngaphi lokuthi baphilelani futhi bazitshela ukuthi ngelinye ilanga kuzavuka kungelamuntu emhlabeni. Kodwa esikubala eBhayibhilini kwenza singathandabuzi ukuthi uNkulunkulu “ukhona lokuthi uyabapha umvuzo labo abamdinga ngeqiniso.” (Heb. 11:6) Lakhathesi siyathokoza ngoba sikhonza uBaba wethu osezulwini futhi lokho yikho kanye asidalela khona.—Dute. 10:​12, 13.

10. UJehova ubathembisani labo abamthembayo? (Hubo 37:29)

¹⁰ Abantu abanengi abalathemba, abakwazi lokho uJehova akuthembisa abangane bakhe. Bazitshela ukuthi impilo yikuvukela emsebenzini, ukuba lemuli lokugcina imali ezabanceda nxa sebegugile. Kodwa abangane bakaJehova bayamthemba ngoba bayakwazi ukuthi nguye obanakekelayo. (Hubo. 25:​3-5; 1 Thim. 6:17) Simthemba ngenhliziyo yonke uNkulunkulu wethu lalokhu asithembise khona. Okusithokozisa kakhulu yikuthi sizamkhonza kuze kube nini lanini sesisepharadayisi.—Bala iHubo 37:29.

11. Kuyini okuzakwenzakala kithi nxa singabangane bakaNkulunkulu futhi uNkulunkulu uzakuzwa njani?

¹¹ Okunye okwenza sifise ukuhlala singabangane bakaNkulunkulu yikuthi uthembisa ukusithethelela nxa singaphenduka ngenhliziyo yonke. (Isaya. 1:18) Lokhu kuyasinceda kakhulu ukuthi singazithonisisi ngezono esazenza kudala. (Hubo. 32:​1-5) Nxa singenza izinto ezithokozisa uJehova lathi sizathokoza. (Zaga. 23:15) Iqiniso yikuthi ngeke sizibale siziqede izibusiso esizithola ngokuba ngabangane bakaJehova. Khathesi asixoxeni ngokuthi singenzani ukuze siqhubeke sisondela kuNkulunkulu.

ONGAKWENZA UKUZE UQHUBEKE ‘USONDELA KUNKULUNKULU’

12. Kuyini esikwenzileyo ukuze sisondele kuNkulunkulu?

¹² Singakabi ngoFakazi baJehova zinengi izinto esazenzayo ukuze sibe ngabangane bakhe. Saqalisa ngokufunda iqiniso ngoJehova uNkulunkulu langoJesu uKhristu, saphenduka ezonweni zethu, satshengisa ukuthi silokholo oluqinileyo kuNkulunkulu sasesizimisela ukwenza intando yakhe. Kodwa nxa sifuna ukuthi ubungane bethu loJehova buhlale buqinile kumele siqhubeke sisenza izinto zonalezi.—Kol. 2:6.

13. Yiziphi izinto ezintathu ezizasinceda ukuthi siqhubeke sisondela kuJehova?

¹³ Kuyini okuzasinceda ukuthi siqhubeke sisondela kuJehova? (1) Kumele siqhubeke sibala iBhayibhili. Kodwa leyi asondaba yokukha phezulu. Kumele sigebhe sijule eLizwini likaNkulunkulu ukuze sizwisise ukuthi iyini intando yakhe besesizimisela ukuyenza. (Efe. 5:​15-17) (2) Kumele sicabangisise ngendlela uJehova asithanda ngayo ukuze siqinise ukholo lwethu. (3) Kumele sizimisele ukuqhubeka sizonda izinto ezizondwa nguJehova futhi singalingiseli lokho okwenziwa ngabantu abangamthokozisiyo.—Hubo. 1:1; 101:3.

14. Yiziphi izinto esingazenza nsukuzonke ukuze sithokozise uJehova? (1 Khorinte 10:31) (Khangela lemifanekiso.)

¹⁴ Bala u-1 Khorinte 10:31. Kuqakatheke kakhulu ukuthi senze izinto esikwaziyo ukuthi zithokozisa uJehova. Akumelanga sisuthiseke ngokuya ekutshumayeleni lokungena imihlangano yebandla kuphela. Esikwenza nsuku zonke kumele kuthokozise uJehova. Ngokwesibonelo uJehova uyathokoza kakhulu nxa esibona sithembekile futhi sincedisa abanye. (2 Khor. 8:21; 9:7) Okunye akukhangelele kithi yikuthi siqakathekise isipho sokuphila asinike sona. Labo abafuna ukusondela kuJehova bayananzelela indlela abadla ngayo labanatha ngayo ngokungadlulisi amalawulo njalo benza konke abakwenelisayo ukuze bahlale beqinile emzimbeni. Nxa uJehova angabona sithembekile kukho konke esikwenzayo ngitsho lasezintweni ezincane uzasithanda kakhulu.—Luk. 16:10.

15. UJehova ufuna sibaphathe njani abanye?

¹⁵ UJehova ulomusa ebantwini abalungileyo labangalunganga. (Mat. 5:45) Ufuna lathi siphathe abanye ngendlela yena abaphatha ngayo. Ngokwesibonelo, uJehova utshela abangane bakhe ukuthi ‘bangakhulumi kubi ngaloba ngubani, bangathandi izingxabano kodwa babemnene kubo bonke abantu.’ (Thit. 3:2) Ngakho asibakhangeleli phansi abanye lanxa lokho abakukholwayo kungabe kutshiyene lalokhu thina esikukholwayo. (2 Thim. 2:​23-25) Nxa singahlala siphatha kuhle abanye futhi sitshengisa ukuthi silendaba labo sizasondela kakhulu kuJehova.

QHUBEKA ‘USONDELA KUNKULUNKULU’ LANXA USENZA AMAPHUTHA

16. Umlobi weHubo 73 wayesizwa njani?

¹⁶ Ngesinye isikhathi ungazitshela ukuthi akwenzi ukuthi usondele kuNkulunkulu ngenxa yamaphutha oyabe uwenzile. Lokhu kwake kwenzakala kumlobi weHubo 73. Wathi: “Mina kwasala kancane ukuthi ngiphambuke, ngaphosa ngatshelela.” (Hubo. 73:2) Umlobi lo wavuma ukuthi amaphutha akhe ayesemtshiye khatshana. Uthi ‘wayengasacabangi futhi engasazwisisi’ esenjengomuntu ongelangqondo njengenyamazana. (Hubo. 73:​21, 22) Kambe ukuthi umhubi lo wazitshela ukuthi amaphutha ayewenzile ayesenza uJehova engasamthandi futhi angamxoleli?

17. (a) Kuyini okwenziwa ngumhubi lanxa wayedanile? (b) Sifundani kuye? (Khangela lemifanekiso.)

¹⁷ Nxa kuyikuthi umhubi wake wacabanga ukuthi uJehova usemlahlile, engxenye umcabango lo waba ngowesikhatshana nje. Lanxa inhliziyo yakhe yayibuhlungu wayekwazi ukuthi kumele asondele kuNkulunkulu. Yikho wabhala wathi: “Kodwa khathesi sengihlala ngilawe, ungibambe isandla sokudla. Uyangeluleka ungiqondise. Ngemva kwalokho uzangipha inkazimulo.” (Hubo. 73:​23, 24) Lathi nxa kuyikuthi amaphutha esiwenzileyo asesiqeda amandla kumele sicele uJehova asiqinise. (Hubo. 73:26; 94:18) Nxa singenza amaphutha akumelanga sihle sibhazalale kodwa kumele sikhumbule ukuthi uJehova ‘uzimisele ukusithethelela.’ (Hubo. 86:5) Nxa sidanile kumele silwise kakhulu ukuthi sisondele kuNkulunkulu.—Hubo. 103:​13, 14.

‘SIZAQHUBEKA SISONDELA KUNKULUNKULU’ KUZE KUBE NINI LANINI

18. Kungani kuzamele siqhubeke sisondela kuJehova?

¹⁸ Sizaqhubeka sisondela kuJehova kuze kube nini lanini ngoba kuzahlala kulezinto ezintsha esizifundayo ngaye. IBhayibhili lithi: “Ngeke sizazi zonke” izindlela zikaJehova, ukuhlakanipha kwakhe kanye lolwazi alalo.—Rom. 11:33.

19. Amazwi akumaHubo asinceda ngani?

¹⁹ IHubo 79:13 lithi: “Lapho-ke thina abantu bakho, umhlambi wakho osemadlelweni akho, sizakubonga kuze kube nini lanini, sikudumise isizukulwane ngesizukulwane.” Nxa ungaqhubeka usondela kuNkulunkulu uzakunika izibusiso ozazikholisa kuze kube nini lanini. Kwangathi lathi singatsho njengomhubi sithi: “UNkulunkulu ulidwala lami, uvikela inhliziyo yami. Uyisabelo sami kuze kube phakade.”—Hubo. 73:26.