Kumele Senzeni Nxa Siphathwa Kubi?

1-2. Abantu bajayele ukwenzani nxa bebona abanye bephathwa kubi futhi sizaxoxa ngani esihlokweni lesi?

ABANTU abanengi emhlabeni jikelele baphathwa kubi. Abanye baphathwa kubi ngenxa yokuthi bangabayanga, bangumhlobo bani loba ukuthi ngabesilisa kumbe ngabesifazana. Okunye okwenza abantu bathwale nzima yikuthi iziphathamandla kanye labohulumende kabalandaba labantu, bazigijimisela abakufunayo. Nxa siphathwa kubi kumbe sibona abanye abantu behlukuluzwa sizwa ubuhlungu.

² Akulamuntu ofuna ukuphathwa kubi. Esikufunayo nje yikuzihlalela kuhle sikhululekile. Lokho kwenza sizwisise ukuthi yindaba abanye abantu bevuka ngolaka nxa bengaphathwa kubi kumbe bengabona abanye behlukuluzwa. Yikho izikhathi ezinengi sibona abantu begcwala imigwaqo betshaya itoyitoyi besithi izinto kumele zilungiswe. Abanye ngabajoyina izinhlanganiso ezikhankasela utshintsho emazweni abo, ikanti abanye basekela abakhokheli ababathembisa ukuthi bazatshintsha izinto. Kodwa abantu bakaJehova abazingeni lezi ngoba bona ‘abasibo bomhlaba’ futhi bayakwazi ukuthi nguMbuso kaNkulunkulu kuphela ozaqeda konke ukuhlupheka kwabantu. (Joh. 17:16) Lanxa kunjalo, kusizwisa ubuhlungu ukubona abantu bephathwa kubi kumbe behlukuluzwa. Pho-ke kumele senzeni nxa sibona abantu bephathwa kubi? Asiqaleni sixoxe ngokuthi uJehova loJesu bezwa njani ngokuphathwa kubi kwabantu.

UJEHOVA LOJESU BAYAKUZONDA UKUBONA ABANTU BEPHATHWA KUBI

3. Kungani sisizwa ubuhlungu nxa sibona abantu bephathwa kubi? (U-Isaya 5:7)

³ Kungani sisizwa ubuhlungu nxa sibona abantu bephathwa kubi? Kungenxa yokuthi sadalwa ngomfanekiso kaJehova, uNkulunkulu ‘othanda ukulunga lokwahlulela okuhle.’ (Hubo. 33:5; Gen. 1:26) UJehova kakaze abaphathe kubi abantu, yikho engafuni ukuthi lathi siphathane kubi. (Dute. 32:​3, 4; Mik. 6:8; Zek. 7:9) Ngokwesibonelo, uJehova wakuzwa ukukhala kwabantu bakhe ababephathwa kubi. (Bala u-Isaya 5:7.) Wathi esezwe ukukhala kwabo kazange agoqe izandla kodwa wabajezisa labo ababesephula imilayo yakhe futhi bephatha kubi abanye.—Isaya. 5:​5, 13.

4. UJesu uzwa njani nxa ebona abantu bephathwa kubi? (Khangela lomfanekiso.)

⁴ UJesu laye uyakuzonda ukubona abantu bephathwa kubi. Ngelinye ilanga kungeSabatha wabona indoda eyayigogeke isandla. UJesu wayizwela indoda le wayelapha kodwa abakhokheli benkolo bathi bekubona lokhu bazonda babila. Babeqina ngelokuthi uJesu wephule umthetho weSabatha okokuthi indoda le yayisisilisiwe babengakungeni. Lokhu akumphathanga ngitsho uJesu. IBhayibhili lithi: ‘Wabacaphukela futhi wezwa ubuhlungu ngenxa yokuthi babengelazwelo.’—Mak. 3:​1-6.

5. Kungani kungamelanga sihlale sizondile nxa sibona abantu bephathwa kubi?

⁵ Sesibonile ukuthi uJehova loJesu bayakuzonda ukubona abantu bephathwa kubi. Yikho lathi kusizwisa ubuhlungu ukuphathwa kubi kwabantu. (Efe. 4:26) Lanxa kunjalo kumele sikhumbule ukuthi singaze sizonde njani asisoze sikuqede ukuphathwa kubi kwabantu. Kanti futhi ukuhlala sizondile kungasidalela imikhuhlane. (Hubo. 37:​1, 8; Jak. 1:20) Manje senzeni nxa kuyikuthi thina kumbe abanye abantu baphathwa kubi? Asixoxeni ngalokho esingakufunda kuJesu.

UJESU WENZANI NGESIKHATHI EBONA ABANYE BEPHATHWA KUBI?

6. Abantu babephathwa njani ngesikhathi uJesu esasemhlabeni? (Khangela lomfanekiso.)

⁶ Ngesikhathi uJesu esemhlabeni wazibonela indlela abantu ababephathwa kubi ngayo. Abakhokheli benkolo babetshayela abantu imithetho engapheliyo eyayisenza ukuthi abantukazana bathwale nzima. (Mat. 23:​2-4) Wayekwazi mhlophe lokuthi iziphathamandla ezingamaRoma zazidlisa abantu imbuya ngoluthi. Yikho amaJuda amanengi ayengafuni ngitsho lakancane ukubuswa ngamaRoma. Amanye aze athwala izikhali aqalisa ukulwisana lamaRoma. Kodwa uJesu kazange awasekele amaqembu la. Lalapho abantu sebefuna ukumbeka ukuthi abe yinkosi kazange avume kodwa wahle wasuka khonapho.—Joh. 6:15.

7-8. Kungani uJesu engazange angene kwezombusazwe? (UJohane 18:36)

⁷ UJesu kazange asekele loba yiliphi iqembu lezombusazwe ezitshela ukuthi yilo elizaqeda ukuphathwa kubi kwabantu. Wayekwazi ukuthi abantu kabenelisi ukuqeda inhlupho ezikhona ezigoqela ukuphathwa kubi kwabantu. (Hubo. 146:3; Jer. 10:23) Umhlaba lo ubuswa nguSathane uDeveli yikho kungasimangalisi ukubona abantu abanengi bephathwa kubi kangaka. (Joh. 8:44; Efe. 2:2) Okunye okwenza abantu behluleke ukuphatha kuhle abanye yikuthi bonke balesono.—Umtshu. 7:20.

⁸ UJesu wayekwazi mhlophe ukuthi nguMbuso kaNkulunkulu kuphela ozaqeda konke ukuphathwa kubi kwabantu. Yikho wazimisela ‘ukutshumayela izindaba ezinhle zoMbuso kaNkulunkulu’ kulokutshona ekhankasela imibuso yabantu. (Luk. 8:1) Kumele ukuthi izindaba ezinhle ezazitshunyayelwa nguJesu zabaduduza labo ababekhala ezimathonsi ngenxa yokuphathwa kubi. (Mat. 5:6; Luk. 18:​7, 8) Akulaqembu lezombusazwe loba uhulumende ozaqeda ukuphathwa kubi kwabantu. Lokhu kuzakwenziwa nguMbuso kaNkulunkulu kuphela.—Bala uJohane 18:36.

LINGISELA UJESU

9. Kungani sisekela uMbuso kaNkulunkulu kuphela?

⁹ IBhayibhili lithi siphila ezinsukwini zokucina futhi lokhu yikho okwenza inhlupho zande ukwedlula ngesikhathi uJesu elapha emhlabeni. Lanxa kunjalo lokhe kunguSathane labantu abamlandelayo ababangela ukuthi abantu baphathwe kubi. (2 Thim. 3:​1-5, 13; Isam. 12:12) Lathi njengoJesu siyakwazi ukuthi nguMbuso kaNkulunkulu kuphela ozatshabalalisa uSathane labantu abenza okubi. Lokhu yikho okwenza singasekeli inhlanganiso ezithi zizaqeda ukuphathwa kubi kwabantu. Omunye udadewethu okuthiwa nguStacya wayejoyina amaqembu abantu ababetshaya itoyitoyi bekhankasela ukutshintsha izinto. Kodwa waqalisa ukuzibuza ukuthi imikhankaso yabo le yayizakuqeda yini ukuphathwa kubi kwabantu. Uthi: “Ngesikhathi ngisasekela amaqembu la ngangike ngizibuze ukuthi iqembu lonaleli engilisekelayo lizenelisa yini ukuqeda ukuhlupheka kwabantu. Khathesi sengisekela uMbuso kaNkulunkulu futhi ngiyakwazi ukuthi yiwo kuphela ozalungisa izinto.”—Hubo. 72:​1, 4.

10. Kungani kungamelanga silandele lokho okwenziwa ngabantu bomhlaba? (UMathewu 5:​43-48) (Khangela lomfanekiso.)

¹⁰ Abantu abanengi lamuhla basekela amaqembu ezombusazwe bezitshela ukuthi yiwo azaqeda inhlupho zabantu. Kodwa abantu abasemaqenjini la bacina sebelodlakela futhi besephula imithetho. (Efe. 4:31) Omunye umfowethu okuthiwa nguJeffrey uthi: “Lanxa abantu bayabe bezitshela ukuthi bazitshayela itoyitoyi bengalwi lomuntu, iqiniso yikuthi izikhathi ezinengi kucina sekuyiziphithiphithi abantu sebesilwa futhi abanye sebegqekeza.” Kodwa lokhu ayisikho esakufundiswa nguJesu. Yena wathi siphathe kuhle abanye okugoqela lalabo abayabe besiphikisa kumbe besihlukuluza. (Bala uMathewu 5:​43-48.) Lathi senza okusemandleni ethu ukuthi silingisele lokho okwakusenziwa nguJesu.

11. Kuyini okungenza kube nzima ukuthi silingisele uJesu?

¹¹ Lanxa sikwazi ukuthi uMbuso kaNkulunkulu yiwo wodwa ozaqeda ukuphathwa kubi kwabantu, kwezinye izikhathi kungaba nzima ukuthi silingisele uJesu ikakhulu nxa kuyithi esiphathwa kubi. Lokhu yikho okwenzakala komunye udadewethu okuthiwa nguJaniya. Uthi: “Abantu babekhuluma kubi ngathi futhi lokho kwangizwisa ubuhlungu njalo ngazonda ngaze ngafisa ukuthi ngabe abantu laba bayajeziswa. Yikho ngazimisela ukujoyina iqembu elalikhankasela ukuqeda ubandlululo lokuphathwa kubi kwabantu. Ngangicabanga ukuthi ukwenza njalo kuzaziqeda inhlupho zami.” Ngokuhamba kwesikhathi, uJaniya wananzelela ukuthi kwakumele atshintshe indlela ayecabanga ngayo. Uqhubeka esithi: “Ngananzelela ukuthi ngasengiphongulandela okwakutshiwo ngabantu kulokuthi ngithembe uJehova. Yikho ngaphuma ngaphela eqenjini lelo.” Lanxa ukuphathwa kubi kusizwisa ubuhlungu, akumelanga silingeke ukungena kwezombusazwe.—Joh. 15:19.

12. Kungani kungamelanga sithande ukulandelela imibiko ekhitshwa ngabezindaba?

¹² Kuyini okungasinceda ukuthi singavuki ngolaka nxa sibona abanye abantu bephathwa kubi kumbe thina siphathwa kubi? Kumele sinanzelele esikubalayo, esikubukelayo lesikulalelayo. Ezinye izindaba ezitholakala ku-inthanethi lakwezokuxhumana ziyabethusa abantu futhi zingenza abanye bacine bekhuluma kubi ngohulumende. Lokhu kubangelwa yikuthi izikhathi ezinengi intathelizindaba ziyabe zikhuluma imibono yazo kulokubika khona kanye okwenzakeleyo. Kwezinye izikhathi kuyabe kuliqiniso kodwa ukutshona sesikulandelela akusincedi ngalutho. Kungasiqedela isikhathi, kusicaphule kumbe kusidanise. (Zaga. 24:10) Okubi kakhulu yikuthi singacina sesikhohlwa ukuthi uMbuso kaNkulunkulu yiwo ozaqeda konke ukuphathwa kubi kwabantu.

13. Ukubala iBhayibhili nsuku zonke kuzasinceda njani?

¹³ Ukubala iBhayibhili nsuku zonke kanye lokucabangisisa ngalokho esiyabe sikubalile kuzasinceda nxa siphathwa kubi kumbe sibona abanye abantu bephathwa kubi. Omunye udadewethu okuthiwa ngu-Alia wayesizwa ubuhlungu nxa ebona abanye abantu bephathwa kubi. Kwakumdanisa ukubona iziphathamandla zingenzi lutho ngezigangi ezazithwalise abantu nzima. Uthi: “Ngananzelela ukuthi kwasekumele ngitshintshe indlela engicabanga ngayo, ngizikhumbuze ukuthi nguJehova kuphela ozaqeda zonke inhlupho zabantu. Ngabala uJobe 34:​22-29, ngasengicabangisisa ngamavesi lawo. Anginceda ngabona ukuthi akulamuntu ongacatshela uJehova. Phela uyakubona konke ukuphathwa kubi kwabantu futhi uzalungisa izinto ngesikhathi sakhe esifaneleyo ngoba yena uhlala esahlulela kuhle.” Kodwa kuyini esingakwenza njengoba sisalindele uMbuso kaNkulunkulu ukuthi uqede konke ukuphathwa kubi kwabantu?

KUYINI ESINGAKWENZA KHATHESI?

14. Kumele sibaphathe njani abanye? (UKholose 3:​10, 11)

¹⁴ Lanxa singelamandla okutshintsha indlela abantu abaphatha ngayo abanye, siyenelisa ukubaphatha kuhle. Siyazama ukuthanda lokuhlonipha wonke umuntu okugoqela lalabo abaphatha kubi abanye. (Mat. 7:12; Rom. 12:17) UJehova uyathokoza kakhulu nxa esibona singabandlululi futhi siphatha kuhle wonke umuntu.—Bala uKholose 3:​10, 11.

15. Ukufundisa abantu ngoJehova kuzabanceda njani?

¹⁵ Okunye esingakwenza ukuze sincede abantu yikubafundisa ngoJehova. “Ulwazi olumayelana loJehova” lungamtshintsha umuntu owayelesihluku futhi ephatha kubi abanye acine eselomusa njalo esebathanda abantu. (Isaya. 11:​6, 7, 9) Omunye umfowethu okuthiwa nguJemal owayeseqenjini elalilwisana lohulumende uthi: “Ukulwa labantu akuncedi ngalutho. Into engatshintsha abantu liBhayibhili. Phela lami ngatshintshwa yilo.” Yikho nxa singakhuthala emsebenzini wokufundisa abantu iqiniso eliseBhayibhilini siyabe sibanceda ukuthi babaphathe kuhle abanye.

16. Kungani kumele sitshele abantu ngoMbuso kaNkulunkulu?

¹⁶ Sizimisele ukufundisa abantu ngoMbuso kaNkulunkulu okuyiwo ozaqeda konke ukuphathwa kubi kwabantu. Nxa kuyikuthi abantu esibatshumayezayo bake baphathwa kubi sibatshiya belethemba lokuthi izinto zizalunga. (Jer. 29:11) Udadewethu okuthiwa nguStacy esike sakhuluma ngaye uthi: “Khathesi angisazikhathazi kakhulu nxa ngingaphathwa kubi kumbe ngingabona abanye abantu behlukuluzwa ngoba sengikwazi ukuthi uJehova uNkulunkulu wethu uzalungisa izinto ngelinye ilanga.” Kumele sizimisele ukududuza abantu sisebenzisa iLizwi likaNkulunkulu iBhayibhili. Sicela ukuthi ucabangisise ngamavesi esixoxe ngawo esihlokweni lesi ngoba azakunceda nxa indaba le ingavuka esikolo kumbe emsebenzini.b

17. Kuyini okumele sizimisele ukukwenza?

¹⁷ Abantu bazaqhubeka bephathwa kubi emhlabeni lo obuswa nguSathane kodwa lizamtshonela emini. (Joh. 12:31) Sikwazi mhlophe ukuthi uJehova uyakubona konke ukuphathwa kubi kwabantu lokuthi uyabazwela kakhulu. (Hubo. 34:​17-19) Sizimisele ukulingisela lokho okwenziwa nguJesu ngesikhathi ebona abantu bephathwa kubi. (2 Phet. 3:13) Kwangathi singazimisela ukuqhubeka sitshela abantu ngoMbuso kaNkulunkulu okuyiwo wodwa ozaqeda konke ukuphathwa kubi kwabantu.—Isaya. 9:7.