OFakazi BakaJehova Balemithetho Abayilandelayo Yini Endabeni Yokuthandana?

OFakazi BakaJehova bakholwa ukuthi nxa belandela izimiso lemithetho eseBhayibhilini, bangenza izinqumo ezibancedayo futhi ezithokozisa uNkulunkulu. (U-Isaya 48:17, 18) Asizibumbeli izimiso lemithetho le kodwa siphila ngayo. Ake sixoxe ngezinye izimiso esizilandelayo endabeni yokuthandana.

• Abantu abatshadileyo akumelanga behlukane kungelasizatho esiseMibhalweni. (UMathewu 19:6) Nxa oFakazi bakaJehova bethandana bayabe befuna ukubona ukuthi bazatshada yini, hatshi ukuphongudlala nje.

• Ukuthandana ngokwalabo asebekhule ngokwaneleyo ukuthi sebengatshada. Bayabe ‘sebedlule isikhathi lapho imizwa yabo yobutsha elamandla khona.’​—1 KwabaseKhorinte 7:​36.

• Abathandanayo kumele babe bevunyelwa yiMibhalo ukuthi batshade. Indoda lomkayo bengabe bedivose ngokusemthethweni, kodwa nxa kuyikuthi ukudivosa kwabo akubangelwanga yikuthi omunye ufebile, kuNkulunkulu abalalungelo lokuphinda batshade.​—UMathewu 19:9.

• UNkulunkulu uthi amaKhristu afuna ukutshada kumele akhethe umuntu wokutshada laye phakathi kwezikhonzi zakhe. (1 KwabaseKhorinte 7:​39) UFakazi kumele atshade loFakazi obhabhathiziweyo futhi olandela lokho okufunwa nguNkulunkulu hatshi umuntu ophonguvumelana lalokho esikukholwayo nje kuphela. (2 KwabaseKhorinte 6:​14) Kusukela kudala uNkulunkulu ubelokhu efuna ukuthi abamkhonzayo batshade lalabo abalokholo olufanana lolwabo. (UGenesisi 24:3; UMalakhi 2:​11) Ukulandela umthetho lo kuyanceda sibili futhi abahlola ngendaba zokuthathana bayakuvuma lokho.a

• Abantwana kumele balalele abazali babo. (IZaga 1:8; KwabaseKholose 3:​20) Nxa umntwana esahlala labazali bakhe kumele alandele imithetho abayifakileyo endabeni zokuthandana. Ngokwesibonelo, bafuna athandane lomunye umuntu eseleminyaka emingaki? Yiziphi izinto ababavumela ukuthi bazenze nxa kuyikuthi sebethandana?

• OFakazi bakaJehova ababanjwa ngamandla ukuthi bangene kwezothando njalo bayazikhethela ukuthi bazathandana lobani kodwa lokhu bakwenza belandela okuseMibhalweni. Lokhu kuvumelana lesimiso esithi: “Umuntu ngamunye uzazithwalela umthwalo wakhe.” (KwabaseGalathiya 6:5, amabala angaphansi) Lanxa kunjalo, abanengi bayacela ukucetshiswa ngamaKhristu athanda uJehova futhi afuna ukubabona bephumelela.​—IZaga 1:5.

• Ezinye izinto ezijayele ukwenziwa ngabanye abantu nxa bethandana ziyizono ezinkulu. Ngokwesibonelo, iBhayibhili lithi singafebi. Lokhu akutsho nje kuphela ukulala lomuntu kodwa kuhlanganisa lezinye izenzo ezingcolileyo ezinjengokuya emacansini lomuntu ongatshadanga laye usebenzisa isitho sokuya ngaphandle, loba ukumumuza kumbe ukuphulula izitho zakhe zensitha. (1 KwabaseKhorinte 6:​9-​11) Kanti njalo nxa abantu abangatshadanga besenza izinto ezivusa inkanuko zemacansini ezibatshiya sebefuna ukulala bonke, abayabe bekwenza kuyabe ‘kuyikungcola’ futhi akumthokozisi uNkulunkulu. (KwabaseGalathiya 5:​19-​21) IBhayibhili alivumelani lokuthi abathandanayo babe ‘lenkulumo ebolileyo’ egoqela ukuxoxa ngezemacansini ezingcolileyo.​—KwabaseKholose 3:8.

• Inhliziyo iyakhohlisa. (UJeremiya 17:9) Ingabangela ukuthi umuntu enze izinto akwaziyo ukuthi aziqondanga. Yikho abathandanayo bangazivikela ngokukhetha ukungabi bodwa endaweni ezingenza bacine beziphatha kubi. Ngokwesibonelo, bangakhetha ukuba phakathi kwabantu kumbe ukuba lomunye umuntu ongabaphelekezela. (IZaga 28:26) AmaKhristu kumele ananzelele ingozi yokudinga umuntu wokuthandana laye ku-inthanethi ngoba ayabe esazi okulutshwane ngaye.​—IHubo 26:4.