UKUCHASISWA KWAMAVESI ASEBHAYIBHILINI
UJeremiya 29:11—“Ngiyawazi Amacebo Engilawo Ngani”
“‘Ngikwazi kuhle lokho engikucabangayo ngani,’ kutsho uJehova,a ‘ngifuna libe lokuthula, hatshi ukuthi lehlelwe ngokubi, ngifuna ukulinika ithemba kanye lekusasa elihle.’”—UJeremiya 29:11, INguqulo Yomhlaba Omutsha.
“‘Ngiyawazi amacebo engilawo ngani,’ kutsho uJehova, ‘amacebo okuliphumelelisa hatshi ukulilimaza, amacebo okulinika ithemba kanye lesikhathi esizayo.’”—UJeremiya 29:11, Holy Bible in Ndebele.
Okutshiwo nguJeremiya 29:11
UJehova uNkulunkulu watshela abantu bakhe ukuthi wayebafisela impilo enhle elokuthula. Lanxa amazwi la abhalwa kudala, ayasebenza lakithi lamuhla. Phela yena ‘unguNkulunkulu onika ithemba.’ (KwabaseRoma 15:13) Okwenza wafaka izithembiso lezi eBhayibhilini yikuthi ufuna “sibe lethemba” ngesikhathi esizayo.—KwabaseRoma 15:4.
Amanye amavesi asinceda sizwisise uJeremiya 29:11
Amazwi la abhalelwa ama-Israyeli ayethunjiwe ahanjiswa eBhabhiloni.b (UJeremiya 29:1) UNkulunkulu watshela ama-Israyeli la ukuthi ayezahlala eBhabhiloni okwesikhathi eside yikho kwakumele akhe izindlu, alime izingadi njalo abe labantwana. (UJeremiya 29:4-9) Waqhubeka wathi: “Nxa isiphelile iminyaka engu-70 liseBhabhiloni, ngizalikhumbula ngigcwalise isithembiso sami, ngiliphendukise [eJerusalema].” (UJeremiya 29:10) Ngokukhuluma amazwi la, uNkulunkulu wayeqinisekisa abantu bakhe ukuthi wayengasoze abakhohlwe lokuthi babezabuyela eJerusalema loba sekutheni.—UJeremiya 31:16, 17.
UNkulunkulu wasigcina isithembiso ayesenze kuma-Israyeli. IBhabhiloni yanqotshwa yinkosi yePhesiya uKhoresi njengoba nje uJehova wayekhulumile. (U-Isaya 45:1, 2; UJeremiya 51:30-32) Ngemva kwalokho uKhoresi wavumela amaJuda ukuthi abuyele eJerusalema. Ayesehlale iminyaka engu-70 eBhabhiloni.—2 ImiLando 36:20-23; U-Ezra 3:1.
Ukugcwaliseka kwesithembiso sikaNkulunkulu esikuJeremiya 29:11 kuqinisekisa labantu bakaNkulunkulu lamuhla ukuthi uzagcwalisa zonke izithembiso zakhe. Esinye sezithembiso esizagcwaliseka ngesokuthi kuzakuba lokuthula emhlabeni wonke nxa sekubusa uJesu Khristu iNkosi yoMbuso kaNkulunkulu.—IHubo 37:10, 11, 29; U-Isaya 55:11; UMathewu 6:10.
Imibono Engaqondanga NgoJeremiya 29:11
Okungaqondanga: UNkulunkulu uhlelile ukuthi impilo yomuntu ngamunye izahamba njani.
Okuqondileyo: UNkulunkulu uyavumela ukuthi abantu bakhethe lokho abafuna ukukwenza. Amazwi akuJeremiya 29:11 ayeqondiswe kuma-Israyeli ayeseBhabhiloni hatshi umuntu oyedwa. UNkulunkulu wayethembisa ama-Israyeli la ukuthi wayefuna abe lekusasa elihle. (UJeremiya 29:4) Ngemva kokwenza isithembiso lesi kwasekusalele kum-Israyeli ngamunye ukuthi awakholwe amazwi la. (UDutheronomi 30:19, 20; UJeremiya 29:32) Labo ababezakuba lokholo kuNkulunkulu babezakhanya ngokuthandaza kuye ngenhliziyo yonke.—UJeremiya 29:12, 13.
Okungaqondanga: UNkulunkulu wenza abantu abamkhonzayo baphumelele ngokubanika inotho.
Okuqondileyo: Ibala elihunyutshwe emaBhayibhilini amanengi ngokuthi ‘ukuphumelelisa’ elikuJeremiya 29:11 ngesiHebheru litsho “ukuba lokuthula, impilakahle lokuhlaliseka.” Amanye amavesi asesahlukweni lesi atshengisa ukuthi uNkulunkulu wayengathembisi ama-Israyeli ayethunjiwe inotho kodwa wayewathembisa ukuthi azakuba lokuthula futhi angehlelwa ngokubi. Isizwe sabo sasingasoze sitshabalaliswe njalo ngelinye ilanga sasizaphinda sibuyele eJerusalema.—UJeremiya 29:4-10.
Bala uJeremiya isahluko 29 ku-Nguqulo Yomhlaba Omutsha yokutaditsha etholakala ngesiNgisi. IBhayibhili leli libhalwe ngendlela elula, lilemicijo echasisa amavesi, lilamapikitsha, liyakulayela kwamanye amavesi, lilamavidiyo lamamephu njalo ungakhetha ukulalela elirekhodiweyo.
a UJehova libizo likaNkulunkulu.—IHubo 83:18.
b Nxa ikhuluma ngoJeremiya 29:11, i-The Expositor’s Bible Commentary ithi: “Ivesi le iphakathi kwamalutshwana kakhulu akhuluma ngesithembiso sikaNkulunkulu mayelana labantu bakhe. Yenza kucace ukuthi uYahweh [uJehova] wayelesihawu ngabantu bakhe ababethunjiwe futhi wayengafuni balahle ithemba.”—Volume 7, ikhasi 360.