UKUCHASISWA KWAMAVESI ASEBHAYIBHILINI
UJeremiya 11:11—“Ngizabehlisela Okubi”
“Ngakho uJehova uthi, ‘Ngizabehlisela umonakalo abangasoze bawubalekele. Bazangibiza bacele uncedo, kodwa angisoze ngibalalele.’”—UJeremiya 11:11, INguqulo Yomhlaba Omutsha.
“Ngakhoke ngizabehlisela okubi, kabayikuphepha; lanxa bekhala kimi, kangiyikubalalela, kutsho iNkosi.”—UJeremiya 11:11, The Holy Bible in Ndebele.
Okutshiwo nguUJeremiya 11:11
UNkulunkulu wayekhuluma lamaJuda aphila ngesikhathi somphrofethi uJeremiya. UJehovaa wayengasoze awavikele kuloba yiwuphi umonakalo owawungawehlela ngoba ayengazange alalele imithetho yakhe elungileyo kumbe avume ukuqondiswa ngabaphrofethi.—IZaga 1:24-32.
“Ngakho uJehova uthi.” Ibala elithi “ngakho” elisevesini le litshengisa ukuthi amavesi andulela uvesi 11 alokhu ekhuluma ngendaba efananayo lalawo alandelayo. KuJeremiya 11:1-10 uJehova watshela abantu bakhe ukuthi basebesephulile isivumelwano ayesenze labokhokho babo. (U-Eksodusi 24:7) Kulokuthi bakhonze uMdali wabo, basebekhonza izithombe. Lokhu kwabangela lokuthi benze lezinye izinto ezimbi ezigoqela ukwenza imihlatshelo ngabantwababo.—UJeremiya 7:31.
“Ngizabehlisela umonakalo.” Ngezinye izikhathi iBhayibhili liyake lithi uNkulunkulu nguye owenze into ethile lanxa yena eyivumele nje kuphela. Lokhu kwenzakala njani kwabako-Israyeli? Ngesikhathi behlamukela imithetho kaJehova futhi sebekhonza izithombe, baqalisa ukwehlelwa yizinto ezimbi ngoba uJehova wayengasabavikeli. Isiphetho saba yikuthi inkosi yeBhabhiloni eyayiyisitha sabo esilamandla yanqoba iJerusalema yasithumba abantu yabasa eBhabhiloni. Onkulunkulu bamanga abasebebakhonza abazange babasindise.—UJeremiya 11:12; 25:8, 9.
UNkulunkulu wavumela ukuthi izinto lezi ezimbi zehlele abantu bakhe kodwa lokhu kwakungatsho ukuthi ulolunya. Phela uJakhobe 1:13 uthi: “UNkulunkulu ngeke alingwe ngezinto ezimbi njalo yena kalingi muntu.”
“Bazangibiza bacele uncedo, kodwa angisoze ngibalalele.” UJehova kayilaleli imithandazo yabantu ‘abalezandla ezigcwele igazi’ kumbe labo abathemba izithombe ukuthi zibakhulule ebunzimeni. (U-Isaya 1:15; 42:17) Kodwa uyabalalela labo abaphenduka ngenhliziyo yonke batshiye ukwenza okubi.—U-Isaya 1:16-19; 55:6, 7.
Amanye amavesi asinceda sizwisise UJeremiya 11:11
Ngomnyaka ka-647 B.C.E., uJehova wanika uJeremiya umsebenzi wokuthi abe ngumphrofethi. Okweminyaka engu-40 eyalandelayo, uJeremiya waxwayisa abantu bakoJuda ngesahlulelo sikaNkulunkulu kodwa abazange bamlalele. Kungalesosikhathi lapho umphrofethi abhala khona amazwi akuUJeremiya 11:11. Ngo-607 B.C.E., abaseBhabhiloni babhubhisa iJerusalema kwasekugcwaliseka amazwi kaJehova ayewakhulume esebenzisa uJeremiya.—UJeremiya 6:6-8; 39:1, 2, 8, 9.
Ibhuku likaJeremiya liphinda libe lamazwi ayenika abantu ithemba. UJehova wathi: “Nxa isiphelile iminyaka engu-70 liseBhabhiloni, ngizalikhumbula ngigcwalise isithembiso sami, ngiliphendukise endaweni le [elizweni lakoJuda].” (UJeremiya 29:10) UJehova ‘wasigcwalisa isithembiso’ sakhe ngo-537 B.C.E., ngesikhathi iBhabhiloni inqotshwa ngamaMede lamaPhesiya. Wavumela ukuthi abantu bakhe babuyele elizweni labo bayevuselela ukukhonza kweqiniso.—2 ImiLando 36:22, 23; UJeremiya 29:14.
Bukela ividiyo le emfitshane ukuze ubone okumunyethwe libhuku likaJeremiya.
a Bala isihloko esithi “Ngubani UJehova?” ukuze uthole ukuthi kungani amaBhayibhili amanengi esebenzisa ibizo lokuhlonipha elithi Nkosi kulokusebenzisa ibizo likaNkulunkulu elithi Jehova.