KwabaseRoma 12:12—“Thokozani Ekwethembeni, Libekezele Ekuhlukuluzweni, Libambelele Ekukhulekeni”

“Jabulani ngenxa yethemba lenu. Qiniselani ebunzimeni. Phikelelani ekuthandazeni.”—KwabaseRoma 12:12, INguqulo Yomhlaba Omutsha.

“Thokozani ekwethembeni, libekezele ekuhlukuluzweni, libambelele ekukhulekeni.”—KwabaseRoma 12:12, Holy Bible in Ndebele.

Okutshiwo nguRoma 12:12

Evesini le umphostoli uPhawuli wakhuthaza amaKhristu eRoma ukuthi enze izinto ezintathu ezazizawanceda ukuthi ahlale ethembekile lanxa ayehlukuluzwa futhi elezinye nje inhlupho.

“Jabulani ngenxa yethemba lenu.” AmaKhristu alethemba elihle lokuthola ukuphila okungapheliyo. Amanye azabe esezulwini njalo amanengi azaphila phakade khonapho emhlabeni. (IHubo 37:29; UJohane 3:16; ISambulo 14:1-4; 21:3, 4) Azabona uMbuso kaNkulunkulua ususa zonke izinto ezenza abantu bahlupheke lamuhla. (UDanyeli 2:44; UMathewu 6:10) Izinceku zikaNkulunkulu ziyathokoza lanxa lazo zilenhlupho ngoba azithandabuzi ukuthi uNkulunkulu uzazigcwalisa izithembiso zakhe lokuthi ukuqinisela kwazo kuyamthokozisa.—UMathewu 5:11, 12; KwabaseRoma 5:3-5.

“Qiniselani ebunzimeni.” EBhayibhilini ibala lesiGrikhi elihunyutshwe ngokuthi “qiniselani” lijayele ukusetshenziswa nxa kukhulunywa ngomuntu “oma aqine kulokuthi abaleke futhi ophikelelayo engabeki izikhali phansi.” Abalandeli bakaJesu bayakwazi ukuthi kuyadingeka ukuthi baqinisele lokuthi bazahlukuluzwa ngoba ‘abasibo bomhlaba.’b (UJohane 15:18-20; 2 KuThimothi 3:12) Nxa umKhristu eqhubeka ekhonza uNkulunkulu kumnyama kubomvu, ukholo lwakhe luyaqina ngoba uyabe engathandabuzi ukuthi uzamnika umvuzo. (UMathewu 24:13) Ukholo olunjalo luyamnceda ukuthi aqinisele ethokoza lanxa esebunzimeni.—KwabaseKholose 1:11.

“Phikelelani ekuthandazeni.” AmaKhristu ahlala ekhuthazwa ukuthi aqhubeke ethandaza ukuze ahlale ethembekile kuNkulunkulu. (ULukha 11:9; 18:1) Avumela ukuthi uNkulunkulu awakhokhele kukho konke akwenzayo. (KwabaseKholose 4:2; 1 KwabaseThesalonika 5:17) Awathandabuzi ukuthi uNkulunkulu uzayiphendula imithandazo yawo ngenxa yokuthi ayayilalela imilayo yakhe njalo enza konke okusemandleni awo ukuze amthokozise. (1 UJohane 3:22; 5:14) Ayakwazi lokuthi nxa angaphikelela ekuthandazeni, uNkulunkulu uzawapha amandla okuthi ahlale ethembekile kuye kungelani lezilingo eziwehlelayo.—KwabaseFiliphi 4:13.

Amanye amavesi asinceda sizwisise uRoma 12:12

UPhawuli wabhalela amaKhristu aseRoma incwadi le ngabo-56 C.E. Kusahluko 12 wakhuluma ngamacebo ayezawanceda ukuthi abe lobuntu obuhle, aphathe kuhle abanye futhi ahlale elokuthula nxa ehlukuluzwa. (KwabaseRoma 12:9-21) Amacebo la ayefike ngesikhathi esiyiso sibili ngoba amaKhristu aseRoma ayesezahlukuluzwa kabuhlungu.

Ngemva kweminyaka emilutshwana nje ngo-64 C.E., kwaba lomlilo omkhulu edolobheni leRoma njalo amahungahunga ayesithi uMbusi uNero nguye owayewubangele. UTacitus isazi sembali yeRoma uthi uNero wazama ukuzigeza esithi umlilo lo wawubangelwe ngamaKhristu. Kukhanya lokhu kwenza ukuthi amaKhristu ahlukuluzwe kabuhlungu. Ayekutshelwe nguPhawuli kwawanceda ukuthi aqinisele njalo aqhubeke elokholo oluqinileyo ngesikhathi behlukuluzwa. (1 KwabaseThesalonika 5:15; 1 UPhetro 3:9) Lathi singawalingisela amaKhristu la.

Bukela ividiyo le emfitshane ukuze ubone okumunyethwe libhuku labaseRoma.