KwabaseRoma 6:23—“Umvuzo Wesono Yikufa, Kodwa Isipho SikaNkulunkulu Siyikuphila Okungapheliyo”

“Imbadalo yesono yikufa kodwa isipho esisiphiwa nguNkulunkulu yikuphila okungapheliyo ngoKhristu uJesu iNkosi yethu.”—KwabaseRoma 6:23, INguqulo Yomhlaba Omutsha.

“Umvuzo wesono yikufa, kodwa isipho sikaNkulunkulu siyikuphila okungapheliyo kuKhristu uJesu iNkosi yethu.”—KwabaseRoma 6:23, Holy Bible in Ndebele.

Okutshiwo nguRoma 6:23

Amazwi la akhulunywa ngumphostoli uPhawuli aveza ukuthi okwenza abantu bafe yisono. Lanxa kunjalo uNkulunkulu uthembisa izinceku zakhe ezithembekileyo ukuthi uzazinika isipho sokuphila okungapheliyo.

“Imbadalo yesono yikufa.” Wonke umuntu uzalwa elesono okuyiso esibangela ukuthi simonele kanengi uNkulunkulu.a (IHubo 51:5; UmTshumayeli 7:20) Isono lesi siphinda sibangele ukuthi abantu baguge futhi bafe.—KwabaseRoma 5:12.

Ukuze acacise ukuthi isono silamandla kangakanani, uPhawuli wasifanisa lomqhatshi oholisa izisebenzi zakhe. Isisebenzi siyabe sikhangelele ukubhadalwa ngoba siyabe sisebenzile. Lathi imbadalo yethu yikufa ngoba silesono.

Lanxa kunjalo uPhawuli uthi umuntu “osefile usekhululiwe esonweni sakhe.” (KwabaseRoma 6:7) Nxa umuntu angafa uyabe esekhululiwe ezonweni zakhe. Yikho asingeke sithi umuntu ofileyo uyajeziswa endaweni ethile ngenxa yezono ayezenza esaphila. IBhayibhili likwenza kucace ukuthi nxa umuntu angafa uyabe engasacabangi njalo engasezwa lutho.—UmTshumayeli 9:5.

“Kodwa isipho esisiphiwa nguNkulunkulu yikuphila okungapheliyo ngoKhristu uJesu iNkosi yethu.” UNkulunkulu uthembisa ukusinika isipho sokuphila okungapheliyo. Ibala lesiGrikhi elihunyutshwe ngokuthi “isipho” lingahunyutshwa langokuthi “isipho esingasifanelanga” kumbe “isipho esimangalisayo.” Ibala leli litsho into ephiwa umuntu engayisebenzelanga. Akulamuntu ongathi yena ukufanele ukusindiswa lokuphiwa impilo engapheliyo ngoba sonke nje silesono. (IHubo 49:7, 8) Kodwa uNkulunkulu uthembisa ukunika wonke umuntu olokholo kuJesu isipho lesi esihle sokuphila phakade.—UJohane 3:16; KwabaseRoma 5:15, 18.

Amanye amavesi asinceda sizwisise uRoma 6:23

UPhawuli wabhalela amaKhristu ayeseRoma incwadi le ngabo-56 C.E. Kukhanya angani amanye amaKhristu la ayelemibono engaqondanga mayelana lesihawu sikaNkulunkulu futhi kungenzakala ukuthi lokhu kwakubangelwa yizimfundiso ezazilethwa yizikhwicamfundo ezingamaGrikhi. Ayekholwa ukuthi nxa angenza izono ezinengi lomusa omkhulu kaNkulunkulu uzakwanda. (KwabaseRoma 6:1) Amanye angabe ayecabanga ukuthi akukubi ukuthi aqhubeke esona njengoba engasekho ngaphansi koMthetho kaMosi. (KwabaseRoma 6:15) Yikho encwadini le, uPhawuli wagcizelela ukuthi uNkulunkulu kasoze awatshengise umusa wakhe omkhulu nxa angaqhubeka ebuswa yisono.—KwabaseRoma 6:12-14, 16.

Amazwi kaPhawuli enza labo abakhonza uNkulunkulu babe lethemba lanxa bezalelwe esonweni. Nxa bangaqhubeka belalela uNkulunkulu futhi bengalandeli izifiso zabo ezimbi, uzabanika ukuphila okungapheliyo esikhathini esizayo.—KwabaseRoma 6:22.

Bukela ividiyo le emfitshane ukuze ubone okumunyethwe libhuku labaseRoma.