UmTshumayeli 3:11—“Yonke Into Uyenze Yabanhle Ngesikhathi Sayo”

“Wenze into yonke yabanhle ngesikhathi sayo. Wenza lokuthi abantu babe lesifiso sokuphila kuze kube nini lanini kodwa abasoze bawuzwisise wonke umsebenzi owenziwe nguNkulunkulu weqiniso kusukela ekuqaliseni kuze kuyefika ekucineni.”—UmTshumayeli 3:11, INguqulo Yomhlaba Omutsha.

“Yonke into uyenze yabanhle ngesikhathi sayo. Wamupha umuntu iphakade enhliziyweni yakhe; kodwa abantu bangeke bafinyelele kulokho uNkulunkulu asakwenzayo kwasekuqaleni kusiya ekupheleni.”—UmTshumayeli 3:11, Holy Bible in Ndebele.

Okutshiwo ngumTshumayeli 3:11

“Wenze into yonke yabanhle ngesikhathi sayo.” Ibala lesiHebheru elihunyutshwe ngokuthi “yabanhle” alitsho into ebukeka kuhle nje kuphela kodwa lingatsho lento ‘ehlelwe kuhle’ kumbe ‘efaneleyo.’ (UmTshumayeli 3:11, amabala angaphansi) Imisebenzi kaNkulunkulu emihle ayipheleli ezintweni azidalileyo kuphela kodwa ihlanganisa lakho konke akwenzayo ukuze agcwalise inhloso yakhe.—UDanyeli 2:21; 2 UPhetro 3:8; ISambulo 4:11.

“Wenza lokuthi abantu babe lesifiso sokuphila kuze kube nini lanini.” UNkulunkulu wadala abantu efuna baphile kuze kube nini lanini. (IHubo 37:29) Lokhu kulengqondo sibili ngoba wahle wafaka lesifiso sokuphila phakade enhliziyweni zabo. Kodwa kuyadanisa ukuthi u-Adamu lo-Eva kabazange balalele uNkulunkulu njalo lokho kwabangela ukuthi bacine befile. Isono sabo yiso esenza labantwababo bafe. (UGenesisi 3:17-19; KwabaseRoma 5:12) Lanxa kunjalo uNkulunkulu uthembisa ‘ukusuthisa izifiso zakho konke okuphilayo,’ okuhlanganisa lesifiso abantu abalaso sokuphila phakade. (IHubo 145:16) IBhayibhili liyasitshela lokho uJehova asekwenzile ukuze abantu benelise ukuphila kuze kube nini lanini.—KwabaseRoma 6:23.

“Kodwa abasoze bawuzwisise wonke umsebenzi owenziwe nguNkulunkulu weqiniso kusukela ekuqaliseni kuze kuyefika ekucineni.” Ukuhlakanipha kukaNkulunkulu kujule kakhulu okokuthi ngeke ‘sikuzwisise ngokugcweleyo.’ (KwabaseRoma 11:33) Lanxa kunjalo uNkulunkulu uyabavezela inhloso yakhe labo abamthokozisayo.—U-Amosi 3:7.

Amanye amavesi asinceda sizwisise umTshumayeli 3:11

UmTshumayeli wabhalwa yinkosi yako-Israyeli uSolomoni futhi indoda le yayiphiwe ukuhlakanipha okumangalisayo nguNkulunkulu. Ibhuku leli lilamacebo asinceda sibone ukuthi kuyini okuqakathekileyo empilweni lalokho okungaqakathekanga. (UmTshumayeli 1:2, 3; 2:1, 17; 7:1; 12:1, 13) Kusahluko 3, uSolomoni ukhuluma ngezinto ezitshiyeneyo ezijayele ukwenziwa ngabantu empilweni. (UmTshumayeli 3:1-8, 10) UNkulunkulu unike abantu inkululeko yokuzikhethela ukuthi lezozinto bazazenza yini lokuthi bazazenza nini. (UDutheronomi 30:19, 20; UJoshuwa 24:15) USolomoni uthi abantu bazayikholisa imisebenzi le nxa bangasekela inhloso kaNkulunkulu njalo babambisane lesikhathi sakhe esifaneleyo sokwenza izinto. Uphinda athi lokhu “kuyisipho esivela kuNkulunkulu.”—UmTshumayeli 3:1, 12, 13.

Bukela ividiyo le emfitshane ukuze ubone okumunyethwe libhuku likamTshumayeli.