I-JW Satellite Channel Inceda Lasezindaweni Ezingela-inthanethi

Sihlala sikulindele ngabomvu ukubukela amavidiyo aphuma ku-JW Broadcasting nyanga zonke. Kodwa abafowethu labodadewethu abanengi e-Africa abenelisi ukubukela inhlelo lezi. Kubangelwa kuyini lokhu?

Ezindaweni ezinengi e-Africa kulohlupho lwe-inthanethi futhi lapho etholakala khona ayibambi kuhle njalo iyadula kakhulu. Ngokwesibonelo, omunye umbonisi wesiqinti eMadagascar wadawuniloda i-broadcasting eyodwa zwi kweyinye indawo ele-inthanethi bambhadalisa $16.a Imali le idlula umholo abanye abantu abawuthola ngeviki nje kuphela.

Kungelani lobunzima lobu, inengi labantu e-Africa selingabukela inhlelo ze-JW Broadcasting lanxa i-inthanethi ingekho.

Kusukela ngo-2017, abafowethu labodadewethu abakwamanye amazwe ase-Africa sebesenelisa ukubukela inhlelo ze-JW Broadcasting ku-satellite channel yaboFakazi bakaJehova. Itshaneli le itholakala ngezindimi ezingu-16 futhi ibukelwa mahala. Ikhipha inhlelo zethu okwama-awa angu-24 nsuku zonke.

Ukuze kusetshenziswe itshaneli le, oFakazi bakaJehova babhadala ikhampani esakaza inhlelo ezitshiyeneyo ku-satellite. Itshaneli le isetshenziswa ngabafowethu labodadewethu abasemazweni adlula 35 e-Africa futhi kubhadalwa imali edlula $12 000 inyanga ngayinye. Ngezinye izikhathi sibhadalela leyinye futhi itshaneli ukuze sisakaze ezinye inhlelo eziqakathekileyo ezinjengemihlangano emikhulu esiba layo kumbe ukuvakatsha kommeli wamawofisi ethu amakhulu.

OFakazi bakaJehova abanengi labanye abantu abangayisibo oFakazi bangabukela amatshaneli lawa besezindlini zabo. Kodwa abanye abafowethu labodadewethu kwamanye amazwe kabenelisi ukuthenga ama-satellite dish lama-TV. Ukuze abafowethu laba benelise ukubona inhlelo ze-Broadcasting kwafakwa ama-satellite dish emaWolu oMbuso adlula 3 670. Ukuthenga i-satellite dish le-decoder kungaba yi-$70. Kodwa nxa iWolu yoMbuso ingela-TV kumbe i-projector intengo yakhona ingacina isiyi-$530.

Abafowethu labodawethu bayabonga kakhulu ngohlelo lolu. Omunye umdala webandla oseCameroon uthi: “Mina lemuli yami sikubona kunjengokuthola imana sisenkangala.” Umfowethu okuthiwa ngu-Odebode ohlala eNigeria uthi: “Itshaneli le siyibukela kathathu ngeviki siyimuli kodwa langezinye izikhathi uyezwa abantwabethu becela ukuthi sitshintshe amanye amatshaneli sibuyele ku-JW channel. Bayakukholisa sibili ukubukela inhlelo lezo.” URose laye ohlala eNigeria uthi: “Ngiyathokoza kakhulu nge-JW channel ngoba kulokuthi ngitshonele ukubukela izindaba sengibukela yona. Ukubukela izindaba kwakungitshiya ngicaphukile izikhathi ezinengi, leBP yami isikhwelile. Kodwa ukubukela inhlelo ze-JW Broadcasting kuyangikhuthaza futhi kwenza ngihlaliseke. Ngiyayithanda kakhulu itshaneli le ngoba iyisipho esihle esisinikwe nguJehova.”

Omunye umbonisi wesiqinti oseMozambique uthi esiqintini sakhe amaWolu oMbuso aselemitshina yonke edingakalayo ukuze abafowethu babukele itshaneli le. Abafowethu abasebenzisa amaWolu la bafika kuseselesikhathi ukuthi imihlangano iqalise ukuze benelise ukubukela inhlelo ze-JW Broadcasting.

Itshaneli le yasetshenziswa ukusakaza umhlangano wezizwe owenzelwa eJohannesburg, eSouth Africa ngo-2019. Kwasakazwa ezinye inkulumo zomhlangano lo, okugoqela lenkulumo zelunga leQula Elibusayo futhi zasakazwa ezindaweni ezingu-9 ezitshiyeneyo. Omunye umfowethu okuthiwa nguSphumelele okudiphathimenti ye-Broadcasting egatsheni leSouth Africa uthi: “Kuqala sasisakaza izinkulumo lezi sisebenzisa i-inthanethi. Kodwa ukusebenzisa indlela le kudinga ukuthi abafowethu babe le-inthanethi ebamba kuhle njalo babe lemali yokubhadalela i-inthanethi leyo. Itshaneli ye-JW yona ayiduli futhi ibamba kuhle kakhulu.”

Iminikelo eyenziwa ngabazalwane ukuze basekele umsebenzi owenziwa emhlabeni wonke yiyo enceda abafowethu labodadewethu abanengi e-Africa ukuthi benelise ukubona inhlelo ze-JW Broadcasting ku-satellite. Siyalibonga kakhulu ngeminikelo eliyenzayo lisebenzisa izindlela ezitshiyeneyo ezitholakala ku-donate.jw.org.