Ibhokisi Elincane Elinceda Abantu Ukuthi Bathole Ukudla Okuqinisa Ukholo

Khathesi oFakazi bakaJehova sebethola amavidiyo lamabhuku ngezempucuko ukwedlula loba nini. Kodwa kwezinye indawo abafowethu labodadewethu abalamali yokungena ku-inthanethi. Abanye bahlala lapho okungela inthanethi khona, kuthi kwezinye indawo lanxa ikhona iyahlupha ukubamba.

Kungelani lenhlupho zonke lezi, abafowethu abanengi sebesenelisa ukudawuniloda amavidiyo lamabhuku kungela inthanethi. Bakwenza njani lokhu?

Basebenzisa i-JW Box eyenzelwe ukuncedisa amabandla alohlupho lwe-inthanethi. Ibhokisi leli lifakwa amabhuku lamavidiyo atholakala ku-jw.org njalo iqembu elibona ngokusebenza kwamakhompiyutha eBethel lafaka izinto ezenza abantu benelise ukudawuniloda okuyabe kuphakathi kwebhokisi leli. Ibhokisi elilodwa lingabiza $75 US.

EWolu yoMbuso abafowethu labodadewethu bayenelisa ukusebenzisa amafoni abo ukudawuniloda amabhuku lamavidiyo ayabe efakwe ebhokisini leli. Lalabo abasebenzisa amafoni amadala njalo angaduliyo njengawalezi insuku bayenelisa ukudawuniloda. Amabhuku lamavidiyo asanda kuphuma afakwa njani ku-JW Box nxa kuyikuthi ibandla kalila inthanethi? Igatsha liyadawuniloda amabhuku lamavidiyo amatsha ku-jw.org liwafake kuma-USB beseliwathumela emabandleni lapho afika khona afakwe ku-JW Box. I-USB ngayinye ingabiza $4 U.S.

I-JW BOX ibancede njani abafowethu? Ubaba okuthiwa nguNathan Adruandra ohlala eDemocratic Republic of Congo, uthi: “Kwasekulesikhathi eside ngizama ukudawuniloda idrama ethi ‘Ngithemba Kuwe . . . O Jehova’ lethi ‘Khumbula umkaLothi’. Kodwa kwakulokhu kusala futhi lokhu kwasekungiqeda uthando. Khathesi sengisenelisa ukuwadawuniloda ngefoni yami, futhi lokhu kuyasinceda thina abazali ukuthi senelise ukubafundisa ngcono abantwabethu.”

Omunye umzalwane oncedisa amabandla eNigeria ukufaka ama-JW Box emaWolu uthi: “Abafowethu bathi i-JW Box bayibona iyisipho esiligugu abasiphiwe nguJehova. Kuyabathokozisa kakhulu ukuthi sebesenelisa ukudawuniloda lula amavidiyo lamabhuku aseBhokisini Elilamathuluzi Okufundisa”

Sekuthunyelwe ama-JW Box edlula 1 700 kubafowethu abaseAfrica, e-Oceania kanye lase South America, njalo uhlelo lolu lusaqhubekela phambili ukuze amabhokisi la athunyelwe lakwamanye amabandla amanengi. Ivela ngaphi imali yokwenza lokhu? Ivela eminikelweni yokusekela umsebenzi womhlaba wonke, abanengi abayenza ku-donate.jw.org. Siyalibonga kakhulu ngokusekela kwenu ngeminikelo.