Ibhuku Elitsha Elincedisa Abantu Ukuzwisisa IBhayibhili

NgoJanuary 2021, iQula Elikhokhelayo lakhipha isaziso sokuthi sekulebhuku elitsha elizancedisa abantu ukuthi bazwisise iBhayibhili, elithi Ungathokoza Kuze Kube Nini Lanini!a Wezwa njani usizwa isaziso lesi? UMatthew ohlala eCanada uthi: “Ngajabula kakhulu futhi okwakulokhu kungithabisa kakhulu yikuzwa izinkulumo lamavidiyo kuchasiswa ukuthi kungani kwenziwa ibhuku leli kanye lendlela elahlolwa ngayo ukuthi liyasebenza sibili. Kwasekungiphuzele ukuthi ngilibone lokuthi ngiqalise ukulisebenzisa.”

Ibhuku elithi Ungathokoza Kuze Kube Nini Lanini! labuya lendlela entsha yokufundisa abantu iBhayibhili. Kodwa lokhu kayisikho kodwa okwenza ibhuku leli lingafanani lamanye ebesiwasebenzisa. Nxa uleliphrintiweyo uzananzelela ukuthi lizwakala lilomehluko esandleni nxa uliphethe. Ukuze ubone ukuthi kungani sisitsho njalo, kasihlolisiseni ukuthi lenziwe njani ibhuku leli.

Ibhuku Elitsha Elenziwa Ngendlela Entsha

Iphepha eliqatha. Kungani lenziwa ngephepha lelo? Ibhuku elithi Ungathokoza Kuze Kube Nini Lanini! lilamapikitsha edlula 600 alemibala emihle, okulinani eliphindwe phose ka-10 elamapikitsha asebhukwini elithi IBhayibhili Lisifundisani? Okunye yikuthi amapeji ebhuku leli elitsha alezindawo ezingelamabala loba imifanekiso. Kodwa uhlupho oluba khona yikuthi nxa iphepha lilula, imifanekiso engale kwepheji iyabe ikhanya lanxa kwesinye isikhathi ingabe ikhanyela khatshana. Ngakho ukuze kungabi njalo ebhukwini leli, abafowethu abasoHlangothini Olubona Ngokudindwa kwamabhuku ethu emhlabeni wonke abaseWallkill eNew York, e-U.S.A., baphrinta besebenzisa imihlobo emine yephepha esiyisebenzisa kwamanye amabhuku ethu ukuze kukhethwe elingcono. Ikhomithi Yokuloba yeQula Elikhokhelayo yahlolisisa indlela okwakuphrintwe ngayo emaphepheni la amane yasikhetha elingakhanyiseliyo. Lanxa umhlobo lo wephepha udula kulalelo esilisebenzisa emabhukwini ethu amanengi, linceda esifunda labo iBhayibhili ukuthi bakholise ukufunda okusephejini ngalinye lebhuku elithi Ungathokoza Kuze Kube Nini Lanini! bengaphanjaniswanga yimifanekiso engale kwalo.

Igwaliba elitshiyene lamanye. Igwaliba lebhuku leli elitsha litshiyene lamanye amagwaliba esijayele ukuwabona emabhukwini ethu ngoba lona lenziwe ngomhlobo wephepha ovikela ibhuku. Umhlobo wephepha leli elisetshenziswe egwalibeni awucazimuli njalo lokhu kwenza imidwebo yalo ikhanye kuhle kakhulu. Iphepha legwaliba leli liyavikela ibhuku ukuthi lingagugi kodwa lihlale lisesimeni esihle kungelani lokuthi selisetshenziswe kanengi kangakanani. Kodwa umhlobo lo wephepha okwenziwe ngalo igwaliba leli udula okuphindwe ka-5 nxa siqathanisa lomhlobo wegwaliba ocazimulayo esiwujayeleyo. Ngakho kwaba lamagatsha ahlanganisa amakhanda ukuze aphume lomhlobo wegwaliba ofunakalayo kodwa ongaduli kakhulu.

Kungani kwakhethwa ukusetshenziswa izinto ezidula kangaka? Umzalwane osebenza kuHlangothi Olubona Ngokudindwa kwamabhuku ethu uthi: “Sikhangelele ukuthi ibhuku leli lisetshenziswe kakhulu, ngakho sifuna liqhubeke libukeka njalo lilesithunzi ngitsho lanxa selisebenze okwesikhathi eside.” U-Eduardo osebenza ewofisini yezokuphrinta egatsheni laseBrazil uthi: “Kuyasithokozisa ukubona indlela inhlanganiso kaJehova esebenzise ngayo izinto ezilohlonzi ukuthi iphrinte ibhuku leli elihle, elingasoze liguge masinya njalo kuyasithokozisa ukuthi lanxa kwasetshenziswa izinto ezidulayo, iminikelo yabafowethu yasetshenziswa kuhle.”

Ukuphrinta Ngesikhathi Somkhuhlane weCOVID-19

Saqalisa ukuphrinta ibhuku elithi Ungathokoza Kuze Kube Nini Lanini! ngoMarch 2021. Kwakunzima kakhulu ngoba kwakuyisikhathi somkhuhlane weCOVID-19. Ngenxa yokuthi kwakungasavunyelwa ukungena lokuphuma eBhetheli, izisebenzi zaseBhetheli ezisebenza zisuka ngekhaya zazingasenelisi ukuzoncedisa emsebenzini wokuphrinta njalo kwakungavumi ukudinga abazalwane abatsha ukuthi bazosebenza eBhetheli. Ngakho ezinye indawo okuphrintelwa kuzo amabhuku ethu zazisiba lezisebenzi ezilutshwana, ezinye zakhona zavalwa okwesikhatshana ngenxa yemithetho kahulumende.

Banqotshwa njani ubunzima lobu? Kuthe indawo zokuphrintela seziqalisile ukusebenza, abafowethu labodadewethu abasebenza kwamanye amadiphathimenti eBhetheli bacelwa ukuthi bake bayencedisa ukuphrinta. UJoel osebenza kuHlangothi Olubona Ngokudindwa kwamabhuku ethu uthi, “Ukuzinikela kwabo lesifiso sabo sokufunda imisebenzi emitsha kwanceda kakhulu ukuthi umsebenzi lo uphumelele.”

Lanxa sahlangana lenhlupho ezinengi, sekuphrintwe amamiliyoni amabhuku alesihloko esithi Ungathokoza Kuze Kube Nini Lanini! Kufuneka izinto ezinengi ukuze enziwe, ezigoqela izinto zokudinda ezifakwa emtshineni, okuzasetshenziswa egwalibeni, iphepha, le-inki kanye lezinto zokubambanisa amapheji. Ngenyanga ezingu-5 nje zokuqala, kwasekusetshenziswe amadola eMelika edlula $2.3 miliyoni kuthengwa izinto ezifunekayo kuphela. Ukuze songe imali, siba leqiniso lokuthi siphrinta inani lamabhuku elifunwa ngamabandla kuphela.

“Libhuku Elenziwe Ngobuciko”

Abamemezeli boMbuso labafundi babo bathini ngebhuku leli elitsha elibancedisa ukuthi bazwisise iBhayibhili? Umfowethu okuthiwa nguPaul ose-Australia uthi: “Kumnandi ukusebenzisa ibhuku elithi Ungathokoza Kuze Kube Nini Lanini! okokuthi kuyabe sekungiphuzele ukuyaqhuba izifundo zeBhayibhili. Libhalwe ngendlela enza sikukholisa ukufunda njalo ekhuthaza ukuthi umuntu axoxe lomuntu amfundisayo. Libhalwe ngendlela ecacileyo, lilemibuzo ethinta inhliziyo, lilamavidiyo, lamapikitsha,lamatshathi, lalokho umfundi angahlela ukukwenza. Libhuku elenziwe ngobuciko elingikhuthaza ukuthi ngithuthukise indlela engifundisa ngayo.”

Omunye ofundiswa iBhayibhili e-United States uthi: “Ngiyalithanda kakhulu ibhuku leli elitsha. Imidwebo ekulo inginceda ukuthi ngizwisise imicijo eqakathekileyo. Amavidiyo ayangithinta inhliziyo njalo ayangikhuthaza ukuthi ngisebenzise engikufundileyo.” Umfundi lo ufunda kabili ngeviki njalo ukhuthele ukungena imihlangano yebandla.

Kuseselamamiliyoni amabhuku alesihloko esithi Ungathokoza Kuze Kube Nini Lanini! okusamele aphrintwe ngezindimi ezinengi. Sikhuluma nje iQula Elikhokhelayo selinike imvumo yokuthi ibhuku leli lidindwe ngezindimi ezingu-710, kodwa elithi IBhayibhili Lisifundisani? lalivunyelwe izindimi ezingu-370 kuphela!

Zivela ngaphi izimali zokuphrinta? Zivela eminikelweni yomsebenzi womhlaba wonke, eminengi yakhona eyenziwa kusetshenziswa u-donate.jw.org. Siyalibonga kakhulu ngokuphana kwenu okusinceda ukuthi silungise amabhuku ancedisa abantu abafuna ukufunda ngoJehova ukuthi bazwisise iBhayibhili njalo bathokoze kuze kube “nini lanini!”—IHubo 22:26.