Izinto Ezenziweyo Ezinceda Abazalwane Lezingonakalisi Umhlaba

Sekuseduze ukuthi uJehova uNkulunkulu alungise umonakalo obangelwa ngabantu abaphambanisa umhlaba. (ISambulo 11:18) Lanxa kunjalo, khathesi senza okusemandleni ethu ukuthi singonakalisi umhlaba. Ngokwesibonelo kulezinye izinto esesizilungisisa ezakhiweni zethu ezenza senelise ukulondoloza imvelo.

Izinto lezi zisincedile sibili ngoba sekulokunengi esingakwenza ukuze silondoloze imvelo. Ake sibone ukuthi yiziphi ezinye zakhona lokuthi ukuzisebenzisa kusincede njani ukuthi songe iminikelo yabazalwane.

Ukulungisiswa KweWolu Yemihlangano Emikhulu

IWolu Yemihlangano Emikhulu YaseMatola eMozambique yathi isakhiwa yafulelwa ngamazenge futhi yayivulekile emaceleni. Amazenge la ayesenza kutshise kakhulu eWolu le. Omunye umfowethu ohlala endaweni le wathi: “Sasiginqa sibe ngokunye ngenxa yokutshisa okwakulapho. Imihlangano yayisithi ingaphela, abafowethu labodadewethu bagijimele phandle ukuze babethwe ngumoya.” Manje senzani ukuze abazalwane bangenele endaweni enhle?

Sabona kungcono ukuthi silungisise uhlupho lolu ngokusebenzisa izinto ezazingasoze zonakalise umhlaba. Safaka ama-fan ephahleni ukuze kutshaye umoya, safaka lokunye okunceda ukuthi isikhudumezi sibe nganeno nxa sekuthe kwatshisa kakhulu. Ama-fan la awasebenzi ngamagetsi kodwa abhodiswa ngumoya njalo aletha umoya oqandayo enkundleni. I-fan ngayinye yayingaba yi-$50.a

Lokho kuncede ukuthi enkundleni le kutshaye umoya, abazalwane bangatshiselwa. Kuncede lokuthi isakhiwo lesi singabi lobumanzi obungasiphambanisa. Khathesi akusangeni i-carbon dioxide enengi kodwa sekungena umoya omnengi ohlanzekileyo, i-oxygen. Yikho abafowethu labodadewethu sebewulalela kuhle umhlangano. Umfowethu esike sakhuluma ngaye uthi: “Khathesi asisagijimeli ukuya phandle nxa imihlangano isiphelile kodwa siyazihlalela khonapho, sizidlele futhi sixoxe labangane. Nxa sihlezi eWolu le esilungisisiwe, kuyabe kungathi sihlezi ngaphansi komthunzi wesihlahla esikhulu, sitshaywa ngumoya.”

Ukusebenzisa Amasola

Lezinsuku sesifaka amasola ezakhiweni zethu ezisemazweni atshiyeneyo. Amasola la ayasinceda ukuthi sihlale silamagetsi ngoba asebenza ngelanga. Ukusebenzisa ilanga ukuthi sithole amagetsi yindlela enhle kakhulu esinceda ukuthi singangcolisi umhlaba. Phela ezinye indlela zokupheka amagetsi ezinjengamalahle legasi ziyawungcolisa umhlaba. Kodwa ukusebenzisa amasola akuwungcolisi futhi kusinceda ukuthi siyisebenzise kuhle iminikelo yabazalwane.

Ngo-2023 safaka amasola eBhetheli yeSlovenia. Okunengi kusebenza ngamagetsi eBhetheli le, besekusithi okunye nje okutshiyeneyo kusebenza ngesola. Nxa kungenzakala ukuthi amasola la apheke amagetsi amanengi ukwedlula lawo adingakalayo, ayasetshenziswa ngabanye emphakathini. Lanxa amasola la athengwa nge-$360 000, azehlisile sibili izindleko zokubhadala amagetsi. Wona angakhanya angani ayadula, kodwa okukhona yikuthi imali esiyabe siyonge ngemva kweminyaka emine ezayo ngenxa yokusebenzisa amasola la, iyabe isidlula leyo esayisebenzisa ukuwathenga.

Ngo-2024 kwafakwa amasola, kwathengwa le-battery elikhulu eBhetheli yeSri Lanka. Kwasetshenziswa imali engaba yi-3 miliyoni ukuze kwenziwe umsebenzi lo futhi amasola la apheka amagetsi ayi-70 phesenti. Kusiyafika iminyaka emithathu izabe isilondoloze imali eyedlula leyo eyasetshenziswa ukuthenga amasola. Ngalowomnyaka saphinda safaka amasola eBhetheli yeNetherlands. Wona aba yi-1,1 miliyoni futhi apheka amagetsi ayi-35 phesenti. Kusiyaphela iminyaka engu-9 siyabe sesonge imali elingana laleyo esayisebenzisa sithenga amasola.

Siphinde safaka lamasola emawofisini wokuhumutsha atshiyeneyo aseMexico. Ngokwesibonelo kulenye iwofisi yokuhumutsha yolimi lwesiTarahumara (Central) eseChihuahua. Ngesikhathi somqando kuyaqanda kakhulu kuze kufike ngaphansi kwe-0 degrees Celsius, ngesikhathi sokutshisa khona liyabe litshisa kakhulu likhipha inhlanzi emanzini. Kwezinye izikhathi ukutshisa lokhu kuyadlula i-40 degrees Celsius. Endaweni le abazalwane bebezama ukuthi bengasebenzisi ama-heater lama-fan ngenxa yokuthi amagetsi ayadula. Omunye umfowethu okuthiwa nguJonathan osebenza ewofisini le yokuhumutsha uthi: “Ngesikhathi somqando sasimbatha ingubo ezinengi futhi sigqoke lezigqoko ezikhudumalayo, besekusithi ngesikhathi sokutshisa sivule amawindi.”

Ngo-2024 kwafakwa amasola ewofisini le yokuhumutsha. Wona aba yi-$21 480 njalo kusiyaphela iminyaka emihlanu kuyabe sekulondolozwe imali elingana laleyo eyasetshenziswayo kuthengwa amasola la. Khathesi nxa kuqanda abafowethu sebengazisebenzisela ama-heater futhi nxa kutshisa basebenzise ama-fan. UJonathan esike sakhuluma ngaye uthi: “Sesiwukholisa umsebenzi wethu njalo sesiwenza kuhle kakhulu. Okunye okusithokozisayo yikuthi iminikelo yabazalwane isetshenziswa kuhle kakhulu langendlela engasoze yonakalise umhlaba.”

Ukusebenzisa Amanzi Ezulu

Kwamanye amaWolu oMbuso ase-Africa, abafowethu labodadewethu bathwala nzima ukuthi bathole amanzi ahlanzekileyo abangawasebenzisa. Yikho abanye bayahamba imango emide ukuze bayekukha amanzi. Kwamanye amaWolu, abafowethu bayathenga amanzi abeselethwa yiroli. Kodwa lokhu kuyadula kakhulu futhi kuyayiphambanisa imvelo.

Ukuze kuncediswe abafowethu labodadewethu abalohlupho lolu, sekufakwe amagatha emaWolu oMbuso amanengi e-Africa ukuze akhongozele amanzi ezulu abesegcinwa ematankeni amakhulu. Abafowethu abenza umsebenzi lo baqala bahlole indawo yakhona lokuthi umkhathi unjani besebebona ukuthi yiphi indlela engcono abangayisebenzisa ukuze bathole amanzi. Ukwenza izinto zonke lezi kungafuna imali engange-$600 kusiya ku-$3 000. Izikhathi ezinengi indlela le yehlisa izindleko zamaWolu oMbuso ngenxa yokuthi abazalwane bayabe bengasawathengi amanzi.

Ukusebenzisa amanzi ezulu kubancedile kakhulu abafowethu labodadewethu. Ngokwesibonelo, omunye udadewethu ohlala eMozambique okuthiwa nguNoemia uthi: “Kuqala sasihamba imango emide sisiyakukha amanzi. Lokhu kwakusenza ukuthi sifike eWolu yoMbuso sidinwe sifile. Kodwa sesiyikholisa imihlangano ngoba siyabe singadinwanga. Kanti njalo kwakunzima ukuthi abantu bageze izandla ngazo zonke izikhathi lokuthi indawo yethu ihlale ihlanzekile ngoba amanzi ayengatholakali lula. Kodwa khathesi loba ngubani nje angazigezela izandla ekhululekile. Siyabonga kakhulu.”

Inhlanganiso iyithatha ngaphi imali yokubhadalela zonke izinto lezi? Ivela eminikelweni yokusekela umsebenzi womhlaba wonke abanengi abayenza ku-donate.jw.org. Siyalibonga kakhulu ngeminikelo yenu.