Ibhokisi Lemibuzo
◼ Abamemezeli kumele basebenzise i-inthanethi yini ukuze batshumayeze abantu abangabaziyo abahlala kwamanye amazwe?
Abanye abamemezeli basebenzisa i-inthanethi ukuze bathole izifundo zeBhayibhili ezihlala lapho umsebenzi wethu ongavunyelwa khona kumbe lapho okulabamemezeli abalutshwana. Abanye kubancede kakhulu ukwenza lokhu futhi kwaba lempumela encomekayo. Kodwa abamemezeli kufanele balimuke ngoba kulezingozi eziba khona nxa bexoxa labantu abangabaziyo besebenzisa ama-email kumbe ezinye izindlela zokuthintana labo. (Khangela Inkonzo Yethu YoMbuso yesiZulu kaJuly 2007, ikhasi 3.) Kuliqiniso sibili ukuthi abamemezeli bayabe belesifiso sokutshumayela kodwa lokhu kungabangela ukuthi bacine besiba lobungane labantu abangalunganga kumbe abahlamuki. (1 Khor. 1:19-25; Kol. 2:8) Kanti njalo emazweni lapho umsebenzi wethu ongavunyelwa khona, iziphathamandla zingabe zisikhangele ngelokhozi. Ngakho ukuthintana labo kungafaka abafowethu labodadewethu abasemazweni lawo phakathi kwelitshe lembokodo. Yikho-ke, abamemezeli akufanelanga basebenzise i-inthanethi ukuze badinge abantu abahlala kwamanye amazwe abangaxoxa labo ngezindaba ezinhle.
Nxa singatshumayeza othile oyabe evakatshile evela kwelinye ilizwe singamtshengisa indlela yokusebenzisa i-jw.org kumbe simtshele athintane lewofisi yegatsha ekhangela ilizwe ahlala kulo. Akumelanga sizame ukuqhubeka sixoxa laye nxa esebuyele elizweni lakibo. Singaxoxa laye kuphela uma siphiwe imvumo yiwofisi yegatsha yelizwe lakithi. Kanti njalo singamkhuthaza lokuthi ayengena imihlangano eWolu YoMbuso eseduze lalapho ahlala khona. Kodwa kungenzakala ukuthi lapho ayabe evela khona kungabe kungelamaWolu oMbuso. Nxa efisa ukuvakatshelwa ngoFakazi singagcwalisa ifomu elithi Sicela Uyebona (S-43) besesilipha unobhala, yena abeselithumeza nge-jw.org. Iwofisi yegatsha yakulelo lizwe yiyo engenelisa ukumnceda njengoba iyabe ikwazi okwenzakala elizweni lelo.—Khangela INkonzo Yethu YoMbuso ka-June 2014, ikhasi 7, leyesiZulu eka-November 2011, ikhasi 2.
Nxa umuntu esifunda laye angathuthela kwelinye ilizwe kumbe nxa sifunda lothile esimazela ku-inthanethi kuphela kufanele silandele iziqondiso okukhulunywe ngazo. Kodwa singaqhubeka simchathekela okuthile aze athole ummemezeli ongamfundisa kulelo lizwe. Nxa ehlala elizweni lapho umsebenzi wethu ongavunyelwa khona kufanele sinanzelele sibili uma simtshumayeza ngefoni, ngokubhala incwadi kumbe ngezinye izindlela zokuthintana.—Mat. 10:16.