Qhubeka Uthuthuka Ekutshumayeleni
1. Yiziphi izibonelo zangekhulu lokuqala ezitshengisa ukuthi kumele sithuthuke ekutshumayeleni?
1 AmaKhristu kumele aqhubeke ethuthuka ekutshumayeleni. Yikho uJesu waqhubeka eqeqetsha abafundi bakhe ukuze bathuthuke ekutshumayeleni. (Luk. 9:1-5; 10:1-11) Lokhu yikho okwaqubula isifiso sokuthi u-Akhwila loPhrisila banxuse u-Apholo emzini wabo ukuze ‘bamchazele ngokugcweleyo indlela kaNkulunkulu.’ (ImiSeb. 18:24-26) UPhawuli laye wakhuthaza uThimothi ukuthi aqhubeke ethuthukisa indlela yakhe yokufundisa ukuze ‘umuntu wonke’ abone intuthuko yakhe. (1 Tim. 4:13-15) Kumele siqhubeke sithuthukisa indlela esifundisa ngayo kungelani lokuthi sesilesikhathi esingakanani singabamemezeli bezindaba ezinhle.
2. Singafunda njani kwabanye?
2 Funda Kwabanye: Okunye okungasenza sithuthuke endleleni esifundisa ngayo yikufunda kwabanye njengoba amaKhristu ekhulu lokuqala ayesenza. (Zaga. 27:17) Ngakho lalelisisa nxa abanye abamemezeli betshumayela. Cela amacebo kubamemezeli abafundisa kuhle futhi ukusebenzise lokho abazakutshela khona. (Zaga. 1:5) Kuyakunzimela yini ukuqalisa isifundo seBhayibhili, ukuphindela kumbe ukwenza ezinye izingxenye zenkonzo? Nxa kunjalo, cela umbonisi weqembu okulo kumbe ummemezeli oselesikhathi eside etshumayela ukuthi akuncedise. Khumbula futhi ukuthi umoya ongcwele kaJehova ungakuncedisa ukuthi uthuthuke, ngakho hlala uwuthandazela.—Luk. 11:13.
3. Kumele senzeni nxa singathola amacebo singawacelanga?
3 Ungacaphuki nxa ungaphiwa amacebo okuthi ungathuthuka njani ekutshumayeleni, futhi ungathikazi ukuwasebenzisa lanxa ungawacelanga. (UmTshu. 7:9) Njengo-Apholo, lwamukele ngokuthobeka uncedo olutholayo. Ungenza njalo uyabe utshengisa ukuthi uhlakaniphile.—Zaga. 12:15.
4. Yisiphi isizatho uJesu asinikayo sokuthi siqhubeke sithuthuka ekutshumayeleni?
4 Ukuthuthuka Kudumisa UNkulunkulu: Esebenzisa umzekeliso, uJesu wakhuthaza abalandeli bakhe ukuthi bathuthuke ekutshumayeleni. Wazifananisa levini kwathi abalandeli bakhe abagcotshiweyo wabafananisa lamagatsha alo. Wathi uYise uyawathena wonke amagatsha athelayo “ukuze athele okwandileyo.” (Joh. 15:2) Njengoba nje umnikazi wevini efisa ukuthi amagatsha evini lakhe athele kakhulu, uJehova laye ufuna ukuthi siqhubeke sithuthuka ekusebenziseni ‘izithelo zezindebe’ zethu. (Heb. 13:15) Yiwuphi umpumela othokozisayo obakhona nxa sithuthuka ekutshumayeleni? Impendulo siyithola emazwini kaJesu athi: “Lokhu kungokwenkazimulo kaBaba, ukuba lithele izithelo ezinengi.”—Joh. 15:8.