Sebenzisa Ibhukwana Elithi “Sifundani ELizwini LikaNkulunkulu?” Ukuze Uqalise Ingxoxo
1. Yiliphi ibhukwana esalithola emhlanganweni elingasisiza enkonzweni?
1 Ngomnyaka odlulileyo emhlanganweni weZizwe sathola ibhukwana elithi: “Sifundani ELizwini LikaNkulunkulu?” ngolimi lwesiNdebele lolwesiShona. Okusebhukwaneni leli kufanana lalokho okusemakhasini okuqala e-New World Translation yesiNgisi eguqulwe kutsha. Singalisebenzisa njani ibhukwana leli nxa silungiselela izintshumayelo? Indlela ibhukwana leli elibhalwe ngayo ifanana lendlela okubhalwe ngayo ibhuku elithi Ukubonisana, yikho-ke lingasisiza kakhulu ekuqaliseni ingxoxo enkonzweni njengoba izihlokwana ezilapho zilemibhalo.
2. Singalisebenzisa njani ekutshumayeleni ibhukwana elithi “Sifundani ELizwini LikaNkulunkulu?”
2 Mhlawumbe ungasebenzisa umbuzo 8, ubususithi: “Sivakatshela omakhelwana ukuze sixoxe ngombuzo othi, ‘UNkulunkulu nguye obangela ukuhlupheka kwabantu yini?’ [Kwezinye izindawo kungaba kuhle ukuthi unike umninimuzi ibhukwana azibalele umbuzo.] Wena ubona njani? [Melela impendulo.] IBhayibhili lisinika impendulo esuthisayo.” Bala njalo uxoxe lomninimuzi ngombhalo owodwa kumbe emibili efakwe lapho. Nxa umninimuzi elesifiso sokufunda, mtshengise imibuzo engu-20 esebhukwaneni lelo ubusumcela ukuthi akhethe afuna lixoxe ngawo esikhathini esizayo. Kumbe ungakhetha ukumupha ibhuku elimumethe okunengi mayelana lendaba ebelixoxa ngayo.
3. Singalisebenzisa njani ibhukwana elithi “Sifundani ELizwini LikaNkulunkulu?” ukuze siqalise ingxoxo labantu abangasiwo maKhristu?
3 Imibuzo 4 lo-13 kusiya ku-17 ingasisiza kakhulu nxa sitshumayela ezindaweni ezilabantu abangasiwo maKhristu. Ngokwesibonelo ungasebenzisa eminye imibhalo esembuzweni 17 ubususithi: “Silivakatshele ukuze sixoxisane ngalokho okutshiwo liBhayibhili ngezimuli. Uyavuma yini ukuthi izimuli zilezinhlupho ezinengi lamuhla? [Melela impendulo.] Izimuli ezinengi sezikunanzelela ukuthi amazwi athi: ‘Umfazi kumele ahloniphe indoda yakhe’ ayanceda kakhulu. [Kakulasidingo sokumtshela ukuthi amazwi la uwathethe ku-Efesu 5:33. Nxa ukhuluma lomuntu ongumama kungaba kuhle ukuthi utsho okuku-Efesu 5:28.] Ucabanga ukuthi ukusebenzisa iseluleko lesi kungayinceda yini imuli yakho?”
4. Ungayiphetha njani ingxoxo yakho lomuntu ongayisuye mKhristu?
4 Nxa selisiyaphetha ingxoxo yenu, hlelani ukuthi lizaphinda lixoxe nini futhi. Mhlawumbe lingahlela ukuthi lixoxe ngomunye umbhalo osembuzweni ebelixoxa ngawo. Ngokuhamba kwesikhathi, tshela umninimuzi ukuthi lokho ebelixoxa ngakho ukuthethe eBhayibhilini. Nika umninimuzi ibhuku ocabanga ukuthi lizamkhanga futhi libe ngelihambelana lalokho elake laxoxa ngakho.—Khangela amabhokisi asekhasini 4-6 aku-Nkonzo Yethu YoMbuso ka-December 2013.