ISIFUNDO 7

Fundisa Izinto Eziliqiniso

ULukha 1:3

OKUMELE UKWENZE: Sekela okutshoyo ngobufakazi obuliqiniso obuzanceda abakulaleleyo bafike esiphethweni esiyiso.

Sebenzisa imithombo yolwazi eqondileyo. Konke okufundisayo kuthathe eLizwini likaNkulunkulu futhi nxa kuvuma bala amavesi eBhayibhilini ngokwalo. Nxa uzasekela umcijo usebenzisa okwatshiwo ngabezesayensi, labezindaba kumbe uzalandisa indaba eyenzakalayo lokunye nje, qala uhlolisise ukuthi konke kuliqiniso lokuthi indlela okwakuchasiswe ngayo kuqala kayikantshintshi yini.
Yisebenzise kuhle imithombo yolwazi. Indlela ochasisa ngayo ivesi kufanele ivumelane lamavesi aseduze kwayo lalokho okumunyethwe liBhayibhili lilonke kanye lamabhuku esiwaphiwa ‘yinceku ethembekileyo lehlakaniphileyo.’ (Mat. 24:45) Nxa uzathatha amazwi ebhukwini elabhalwa ngomunye umuntu loba kwenye indawo, ungantshintshi okwatshiwo ngumlobi.

Ungasengi lezimithiyo nxa uqamba amanani loba uchasisa indaba. Lapho okubhalwe khona ukuthi “abanye abantu,” wena ungantshintshi uthi “abantu abanengi”; kungathiwa “kwezinye izikhathi,” ungathi “zonke izikhathi.” Nxa kuthiwa “engxenye” kumbe “mhlawumbe,” akutsho ukuthi lakanye kunjalo.
Bonisana labo. Ungabala umbhalo kumbe amanye amazwi, buza imibuzo ezavula abantu ingqondo kumbe usebenzise umzekeliso ozabanceda ukuthi bafike esiphethweni esiyiso.