Ukuvuswa Kwabafileyo Kutshengisa Ukuthi UNkulunkulu Ulothando, Uhlakaniphile Njalo Uyabekezela

1. Kuyini okwenza uJehova waqalisa ukudala?

UJEHOVA wake waba yedwa kodwa wayengelasizungu ngoba kadingi ukuthi kube lomunye umuntu ukuze athokoze. Lanxa kunjalo wayefuna abanye bakholise ukuphila yikho waqalisa ukudala ngenxa yokuthi ulothando.—Hubo. 36:9; 1 Joh. 4:19.

2. UJesu lezingilosi bezwa njani ngesikhathi uJehova esedale ezinye izinto?

² UJehova waqala ngokudala iNdodana yakhe uJesu. Kusetshenziswa yona ‘kwadalwa zonke ezinye izinto,’ okugoqela izingilosi. (Kol. 1:16) UJesu wayethokoza ukusebenza loYise. (Zaga. 8:30) Izingilosi lazo zathokoza ngesikhathi uJehova kanye lesisebenzi sakhe esiyingcitshi uJesu bedala amazulu lomhlaba. Zatshengisa njani ukuthi ziyathokoza? Zaqalisa ‘ukumemeza ngentokozo’ sekudalwe umhlaba futhi asithandabuzi ukuthi zaqhubeka zikwenza lokho lapho zibona zonke ezinye izinto sezidaliwe, ikakhulu abantu. (Jobe. 38:7; Zaga. 8:31) Izinto lezi uJehova azidalayo zaveza ukuthi ulothando njalo uhlakaniphile.—Hubo. 104:24; Rom. 1:20.

3. Ngokwalokho okutshiwo ku-1 Khorinte 15:21, 22, umhlatshelo kaJesu usinceda njani?

³ UJehova wayehlose ukuthi abantu baphile nini lanini emhlabeni omuhle ayewudalile. Kodwa u-Adamu lo-Eva bahlamukela uYise olothando yikho isono lokufa kwagubuzela umhlaba. (Rom. 5:12) Manje uJehova wenzani? Wahle watsho ukuthi uzabakhulula njani abantu. (Gen. 3:15) Wayezanikela ngeNdodana yakhe uJesu ukuthi ibe ngumhlatshelo ozakhulula abantwana baka-Adamu lo-Eva esonweni lasekufeni. Kanti njalo wayezanika loba ngubani okhetha ukumkhonza ukuphila okungapheliyo.—Joh. 3:16; Rom. 6:23; bala u-1 Khorinte 15:21, 22.

4. Yiphi imibuzo esizaxoxa ngayo esihlokweni lesi?

⁴ Kulemibuzo eminengi esingazibuza yona emayelana lesithembiso sikaNkulunkulu sokuvusa abantu abafileyo. Ngokwesibonelo, kuzakwenzakala njani ukuvuswa kwabafileyo? Sizenelisa yini ukubazi abangane bethu lezihlobo zethu nxa sezivusiwe? Ukuvuswa kwabafileyo kuzenza njani ukuthi sithokoze? Kanti njalo ukucabangisisa ngokuvuswa kwabafileyo kuzasinceda njani ukuthi sibonge uJehova ngothando lwakhe, ukuhlakanipha kanye lokubekezela? Asixoxeni ngemibuzo le.

KUZAKWENZAKALA NJANI UKUVUSWA KWABAFILEYO?

5. Kungani singakhangelelanga ukuthi abantu abafileyo bavuswe ngasikhathi sinye?

⁵ Nxa uJehova esevusa amamiliyoni abantu esebenzisa iNdodana yakhe, kasikhangelelanga ukuthi awavuse wonke ngasikhathi sinye. Phela kungaba lokuxokozela emhlabeni nxa lokhu kungenzakala. UJehova ngeke enze loba yini ngendlela engahlelekanga. Uyakwazi ukuthi izinto kumele zihleleke ukuze kuhlale kulokuthula. (1 Khor. 14:33) UJehova uNkulunkulu watshengisa ukuthi uhlakaniphile futhi uyabekezela lapho esebenza loJesu ukulungisa umhlaba ukuze abantu bahlale kuwo. UJesu laye uzatshengisa ukuthi uhlakaniphile futhi uyabekezela ngesikhathi sokubusa kwakhe kweminyaka eyinkulungwane. Lokhu kuzakhanya lapho esebenza labayabe besinde e-Amagedoni belungisa umhlaba ukuze abavusiweyo bathole izinto abazidingayo.

6. ImiSebenzi 24:15 ithi ngobani abanye abazavuswa?

⁶ Okuqakatheke kakhulu okuzakwenziwa ngabasinde e-Amagedoni yikufundisa abavusiweyo ngoMbuso kaNkulunkulu langalokho akhangelele ukuthi bakwenze. Kufanele babafundise ngoba inengi labantu abazavuswa ‘ngabangalunganga.’ (Bala imiSebenzi 24:15.) Abantu labo kuzamele batshintshe okunengi empilweni zabo ukuze bathole izibusiso ezilethwa yinhlawulo kaKhristu. Kumele ukuthi uzabe umkhulu sibili umsebenzi wokufundisa amamiliyoni abantu angazi lutho ngoJehova. Umuntu ngamunye uzaba lomuntu omfundisayo yini njengalokho esikwenzayo lamuhla nxa sifundisa abantu iBhayibhili? Abantu laba bazaphiwa amabandla abazangena lawo yini njalo baqeqetshwe ukuthi bafundise labo abazavuswa ngemva kwabo? Sizaphela sibone. Kodwa esikwaziyo yikuthi ekupheleni kokubusa kukaKhristu kweminyaka eyinkulungwane “umhlaba uzakuba usugcwele ulwazi lukaJehova.” (Isaya. 11:9) Mnengi sibili umsebenzi esizakholisa ukuwenza phakathi kweminyaka le eyinkulungwane!

7. Kuyini okuzakwenza abantu bakaNkulunkulu babe lesisa esikhulu lapho befundisa abavusiweyo?

⁷ Ngesikhathi sokubusa kukaKhristu kweminyaka eyinkulungwane bonke abantu bakaJehova kuzamele baqhubeke betshintsha impilo zabo ukuze bamthokozise. Yikho bazaba lesisa esikhulu nxa bencedisa abavusiweyo ukuthi balwisane lemicabango kanye lezifiso ezimbi njalo baphile ngendlela uJehova ayifunayo. (1 Phet. 3:8) Akuthandabuzwa ukuthi labo abazavuswa bazafuna ukuba phakathi kwabantu bakaJehova abathobekileyo, abazabe belokhu ‘besebenzela ukusindiswa kwabo.’—Flp. 2:12.

SIZENELISA YINI UKUBAZI LABO ABAVUSIWEYO?

8. Kungani kulengqondo ukucabanga ukuthi abazakwamukela abavusiweyo bazazazi izihlobo labangane babo?

⁸ Kulezizatho ezinengi ezenza sicabangele ukuthi abazakwamukela abavusiweyo bazenelisa ukuzazi izihlobo labangane babo. Ngokwesibonelo, abantu abake bavuswa nguJehova kudala bavuka bengatshintshanga indlela ababeyiyo bengakafi. Babelokhu bebukeka ngendlela ababeyiyo yona, bekhuluma njalo becabanga ngendlela efananayo. Kukhanya yikho lokho uJehova azakwenza nxa esevusa abantu esikhathini esizayo. Khumbula ukuthi uJesu wafanisa ukufa lokulala njalo wafanisa ukuvuswa komuntu ofileyo lokuvuswa komuntu oleleyo. (Mat. 9:18, 24; Joh. 11:11-13) Nxa abantu bevuka ebuthongweni bayabe bengatshintshanga indlela ababukeka labakhuluma ngayo kanye lezinto ezisengqondweni zabo. Khumbula lokho okwenzakala kuLazaro. Wayeselensuku ezine efile yikho wayeseqalisa ukubola. Kodwa uJesu wathi esemvusile odadewabo bahle bamazi futhi akuthandabuzwa ukuthi uLazaro laye wabakhumbula.—Joh. 11:38-44; 12:1, 2.

9. Kungani abafileyo bengasoze bavuswe belemizimba lengqondo epheleleyo?

⁹ UJehova uthembisa ukuthi ngesikhathi sokubusa kukaKhristu kakho ozakuthi: “Mina ngiyagula.” (Isaya. 33:24; Rom. 6:7) Yikho labo abazavuswa bazabe belemizimba eqine saka. Kodwa kabasoze bahle babe ngabapheleleyo ngoba nxa kungaba njalo izihlobo labangane babo abasoze babebazi. Kukhanya angani isono sizakhitshwa ebantwini bonke kancane kancane ngesikhathi sokubusa kukaKhristu kweminyaka eyinkulungwane. UJesu uzabuyisela uMbuso kuYise ngemva kweminyaka le eyinkulungwane. Ngalesosikhathi uMbuso uzabe usenze konke uJehova afuna ukwenze okugoqela ukukhipha isono ebantwini.—1 Khor. 15:24-28; Isam. 20:1-3.

UKUVUSWA KWABAFILEYO KUZENZA NJANI UKUTHI SITHOKOZE?

10. Uzezwa njani nxa sekuvuswa abafileyo?

¹⁰ Akucabange ukuthi kuzabe kunjani ukuphinda ubone izihlobo labangane bakho abafayo. Uzathokoza uze uhleke yini kumbe zizehla ezenjabulo? Uzathokoza kakhulu yini uze uhlabele izingoma zokudumisa uJehova? Akuthandabuzwa ukuthi uzamthanda kakhulu uYihlo olomusa kanye leNdodana yakhe elothando ngenxa yokuvusa kwabo abafileyo.

11. KuJohane 5:28, 29 uJesu wathi kuzakwenzakalani kulabo abalandela izimiso zikaNkulunkulu ezilungileyo?

¹¹ Ake ucabange ukuthi labo abavusiweyo bazezwa njani ngesikhathi behlubula ubuntu obudala njalo belandela izimiso zikaNkulunkulu ezilungileyo. Abazakwenza lokhu bazaphila ePharadayisi kuze kube nini lanini. Kodwa labo abazahlamukela uNkulunkulu abasoze baphile ePharadayisi ukuze bangaphambanisi ukuthula okuyabe kulapho.—Isaya. 65:20; bala uJohane 5:28, 29.

12. Labo abazabe besemhlabeni bazabusiswa njani nguJehova?

¹² Ngesikhathi uMbuso kaNkulunkulu usubusa, bonke abantu bakhe bazabona ukuthi amazwi akuZaga 10:22 aliqiniso. Athi: “Isibusiso sikaJehova siletha inotho, leyonotho ingabi lahlupho.” Umoya kaJehova uzancedisa abantu bakhe ukuthi banothe endabeni zokukhonza okutsho ukuthi bazaqhubeka besiba njengoKhristu futhi kancane kancane isono sizaphela. (Joh. 13:15-17; Efe. 4:23, 24) Nsuku zonke imizimba yabo izaqina babelempilakahle. Ukuphila kuyabe sekumnandi sibili! (Jobe. 33:25) Kodwa ukucabangisisa ngokuvuswa kwabafileyo kungakunceda njani khathesi?

TSHENGISA UKUTHI UYAMBONGA UJEHOVA NGOTHANDO LWAKHE

13. Ngokwalokho okutshiwo kuHubo 139:1-4, ukuvuswa kwabafileyo kuzasitshengisa njani ukuthi uJehova usazi kuhle?

¹³ Sesibonile ukuthi nxa uJehova esevusa abantu abafileyo uzabuyisela okwakusezingqondweni zabo kanye lobuntu babo ukuze babe yilokho ababeyikho khona. Lokhu kutsho ukuthi uJehova uyakuthanda kakhulu okokuthi uyabona njalo kakukhohlwa konke okucabangayo lokuzwayo lokukhulumayo kanye lokwenzayo. Yikho nxa ebengakuvusa bekungasoze kumthwalise nzima ukuthi akubuyisele ube njengoba nje wawunjalo ungakafi. INkosi uDavida yayikwazi ukuthi uJehova umazi kuhle umuntu ngamunye. (Bala iHubo 139:1-4.) Ukuzwisisa ukuthi uJehova usazi kangakanani kusenza sizizwe njani?

14. Kumele sizizwe njani nxa sicabangisisa ngokuthi uJehova usazi kangakanani?

¹⁴ Akumelanga sikhathazeke nxa sicabangisisa ngokuthi uJehova usazi kangakanani. Kungani? Khumbula ukuthi uJehova ulendaba lathi futhi uqakathekisa ngamunye wethu. Uyananzelela konke okwenzakale empilweni zethu okwenza ukuthi sibe yilokho esiyikho khona. Kuyasiduduza ukwazi lokhu ngoba siyakwazi ukuthi asisodwa loba sekutheni. UJehova uhlala elathi njalo uyafuna ukusincedisa.—2 ImiLan. 16:9.

TSHENGISA UKUTHI UYAMBONGA UJEHOVA NGOKUHLAKANIPHA KWAKHE

15. Ithemba lokuvuswa kwabafileyo litshengisa njani ukuthi uJehova uhlakaniphile?

¹⁵ Nxa abantu besesaba ukufa, izitha zabo zingababamba ngamandla ukuthi benze izinto abangeke bazenze nxa bengethuselwanga ngokubulawa. Labo abaqondiswa nguSathane bethusela abantu ngokubabulala ukuze babenze bathengise abangane babo kumbe benze izinto abakwaziyo ukuthi azilunganga. Kodwa thina ngeke basibambe ngamandla ukuthi sikwenze lokho ngoba siyakwazi ukuthi lanxa izitha zethu zingasibulala, uJehova uzasivusa. (Isam. 2:10) Siyaqiniseka ukuthi akulalutho ezingalwenza olungabangela ukuthi siyekele ukukhonza uJehova. (Rom. 8:35-39) UJehova utshengise ukuthi uhlakaniphile sibili ngokusinika ithemba lokuthi abafileyo bazavuswa. Ithemba leli lenza singesabi abalandeli bakaSathane nxa besethusela ngokusibulala befuna senze abakutshoyo. Kanti njalo lisinika isibindi sokuhlala siqotho kuJehova.

16. Yiphi imibuzo ongazibuza yona njalo impendulo zakho zingakunceda njani ubone langabe uyamthemba uJehova?

¹⁶ Uzamthemba yini uJehova ukuthi uzakuvusa nxa izitha zakhe zingakwethusela zisithi zifuna ukukubulala? Ungabakwazi njani ukuthi uzamthemba uJehova ngalesosikhathi? Nanku okunye ongazibuza khona: ‘Izinqumo engizenza nsuku zonke ziyatshengisa yini ukuthi ngiyamthemba uJehova?’ (Luk. 16:10) ‘Indlela engiphila ngayo iyatshengisa yini ukuthi ngiyamthemba uJehova ukuthi uzasigcwalisa isithembiso sakhe sokuthi uzanginakekela nxa ngingafuna kuqala uMbuso wakhe?’ (Mat. 6:31-33) Nxa uphendule imibuzo le ngokuthi ye utshengisa ukuthi uyamthemba uJehova futhi uzenelisa ukumelana laloba yibuphi ubunzima obuzakwehlela esikhathini esizayo.—Zaga. 3:5, 6.

TSHENGISA UKUTHI UYAMBONGA UJEHOVA NGOKUBEKEZELA KWAKHE

17. (a) Ukuvuswa kwabafileyo kutshengisa njani ukuthi uJehova uyabekezela? (b) Singatshengisa njani ukuthi siyambonga uJehova ngokubekezela kwakhe?

¹⁷ UJehova sewabeka ilanga lehola azabhubhisa ngalo umhlaba lo omubi. (Mat. 24:36) Yikho uzabekezela angawubhubhisi kuze kube yilesosikhathi. Uyafisa sibili ukuvusa abafileyo kodwa uyabekezela. (Jobe. 14:14, 15) Umelele isikhathi esifaneleyo sokuthi abavuse. (Joh. 5:28) Silezizatho ezinhle zokumbonga ngokubekezela kwakhe. Ngokwesibonelo, ukubekezela kukaJehova kunike abantu abanengi okugoqela lathi ithuba lokuthi “baphenduke.” (2 Phet. 3:9) UJehova ufuna abantu abanengi baphile kuze kube nini lanini. Ngakho asitshengiseni ukuthi siyambonga ngokubekezela kwakhe. Lokhu singakwenza ngokukhuthala sidinga labo ‘abalesifiso sokuthola ukuphila okungapheliyo’ futhi sibancedise ukuthi bathande uJehova njalo bamkhonze. (ImiSeb. 13:48) Nxa singenza njalo, labo bazancedwa yikubekezela kukaJehova.

18. Kungani kumele sibabekezelele abanye?

¹⁸ UJehova uzabekezela kuze kuphele iminyaka eyinkulungwane engakakhangeleli ukuthi sibe ngabantu abapheleleyo. Uzaqhubeka esithethelela kuze kube yilesosikhathi. Kumele simlingisele, sibone okuhle okwenziwa ngabanye futhi sibabekezelele. Ake sixoxe ngomunye udade olomkakhe owaba lomkhuhlane wokukhathazeka kakhulu njalo wayekela ukungena imihlangano yebandla. Uthi: “Lokhu kwangizwisa ubuhlungu obukhulu. Impilo yaphonguthi phendu futhi konke esasikuhlelile kwaphelela emoyeni.” Lanxa kwenzakala konke lokhu, udade lo waqhubeka embekezelela umkakhe njalo emthanda. Wathemba uJehova futhi kazange athwale imikhono ekhanda. Walingisela uJehova ngokukhangela okuhle okwakusenziwa ngumkakhe. Uthi: “Umkami ulobuntu obuhle njalo wenza konke okusemandleni akhe ukuthi alwisane lokukhathazeka.” Kuqakatheke kakhulu ukuthi sibekezelele abanye emulini lasebandleni abazama ukulwisana lobunzima.

19. Kumele sizimisele ukwenzani?

¹⁹ UJesu lezingilosi bathokoza ngesikhathi umhlaba udalwa. Kodwa kumele ukuthi bazathokoza kakhulu bebona umhlaba usugcwele abantu abangelasono, abathanda uJehova futhi abamkhonzayo. Akucabange ukuthi labo abazabusa loKhristu ezulwini bazathokoza kangakanani bebona ukuthi umsebenzi wabo ubanceda njani abantu. (Isam. 4:4, 9-11; 5:9, 10) Cabanga lokuthi kuzabe kumnandi njani ukuphila nxa sekusehla ezentokozo hatshi ezobuhlungu, sekungasela kugula, usizi lokufa. (Isam. 21:4) Ngakho qhubeka uzimisele ukulingisela uYihlo olothando, ohlakaniphileyo futhi obekezelayo. Nxa ungenza njalo uzahlala uthokoza kungelani lobunzima obukwehlelayo. (Jak. 1:2-4) Simbonga singaqedi uJehova ngesithembiso sakhe sokuthi “abafileyo bazavuswa.”—ImiSeb. 24:15.