Imihlangano Yebandla Eyenziwa Ngezempucuko

Emhlabeni wonke ohulumende abanengi sebefake imithetho yokuthi abantu bangasondelelani futhi bangabuthani. OFakazi bakaJehova bayayilalela sibili imithetho le, kodwa bayadinga izindlela zokungena imihlangano ezingafaki abantu engozini. Baxhumana ngenhlelo ezinjenge-Zoom ukuze benelise ukwenza imihlangano yabo.

IQula Elibusayo lavuma ukuthi eminye iminikelo isetshenziswe ukubhadala ama-account e-Zoom azasetshenziswa ngamabandla ukungena imihlangano yawo sikhathi sonke. Lokhu kuwancede kakhulu amabandla angenelisiyo ukuthola imali yokubhadalela ama-account e-Zoom. Amanye amabandla ayesebenzisa inhlelo zamahara ezingavikelekanga njalo ezingavumeli abantu abanengi ukuthi bahlangane. Ama-account e-Zoom abhadalelwayo aqalisela ku-$15 kusiya phezulu futhi avikelekile, kulula ukuwasebenzisa njalo ayavuma ukuthi kujoyine abantu abanengi. Khathesi ama-account la asetshenziswa ngamabandla aphezu kwe-65 000 emazweni adlula 170.

Ibandla leKairagi eliseManado, eNorth Sulawesi elizweni le-Indonesia, lalo ngelinye lamabandla ayesebenzisa inhlelo zamahara. Kodwa khathesi selisebenzisa uhlelo lwe-Zoom olubhadalelwa yinhlanganiso. Omunye umfowethu osebandleni leli okuthiwa nguHadi Santoso uthi: “Sekulula ukuthi abafowethu labodadewethu abangelalwazi kangako ngokusebenzisa amafoni alezinsuku bangene imihlangano yebandla. Akuselasidingo sokuthi babe belokhu bekhonektha kokuphela, khathesi bajoyina kanye balalele umhlangano uze uyephela.”

Umfowethu okuthiwa nguLester Jijónan ongumdala ebandleni leGuayacanes Oeste eGuayaquil, elizweni le-Ecuador uthi: “Abafowethu labodadewethu abanengi abalamali, yikho kwakunzima ukuthi ibandla libe le-account ye-Zoom ebhadalelwayo, evumela ukuthi wonke umuntu angene umhlangano webandla. Siyayibonga inhlanganiso ngokusivulela i-account ye-Zoom. Khathesi sesisenelisa ukunxusa abanye emihlanganweni yebandla ngoba asisesabi ukuthi sizadlulisa inani elivunyelwa ku-account yamahala.”

Omunye umdala webandla okuthiwa nguJohnson Mwanza osebandleni leNgwerere North eLusaka, eZambia uthi: “Abafowethu labodadewethu bahlala besithi ama-account e-Zoom esiwabhadalelwa yinhlanganiso enza sibe seduze labazalwane bethu futhi enza sibone ukuthi uJehova uyasithanda lokuthi ulendaba lathi.”

Imali egcinelwe ukuncedisa nxa kube lomonakalo yiyo esetshenziswa yinhlanganiso ukubhadala ama-account e-Zoom. Imali le ivela eminikelweni eyenziwa ngabazalwane besekela umsebenzi wokutshumayela esiwenza emhlabeni wonke. Iminikelo eminengi yenziwa ngezempucuko ku-donate.jw.org. Siyalibonga kakhulu ngeminikelo yenu ngoba isetshenziswa ukusiza abazalwane emhlabeni wonke—2 KwabaseKhorinte 8:14.