UMHLABA OGCWELE INHLUPHO

4 | Gcina Ithemba Lakho Liqinile

KUNGANI KUQAKATHEKILE?

Ukukhathazeka ngenhlupho ezisemhlabeni kungenza abantu bacine bengasaphilanga kuhle. Abantu abanengi abehlelwe zinhlupho lezi bacina becabanga ukuthi ngeke ziphele. Kuyini abakwenzayo?

Abanye kabafuni ngitsho ukucabanga ngekusasa.
Abanye banatha utshwala babheme lezidakamizwa ukuze bangatshoni becabanga ngenhlupho zabo.
Abanye bacina bebona ukufa kungcono kulokuphila. Bayazibuza ukuthi: “Ngiphilelani?”

Okumele Ukwazi

Ezinye inhlupho olazo zingabe zingezesikhatshana nje futhi izinto zingatshintsha zibe ngcono.
Lanxa isimo sakho singazange sitshintshe, kukhona ongakwenza ukuze wenelise ukubekezelela ubunzima okubo.
IBhayibhili lisithembisa ukuthi zonke inhlupho ezikhona namuhla zizaphela.

Ongakwenza

IBhayibhili lithi: “Lingaqali ukukhathazeka ngokosuku olulandelayo ngoba usuku olulandelayo luzakuba lezinkathazo zalo. Usuku ngalunye lulenhlupho zalo ezilweneleyo.”—UMathewu 6:34.

Ungakhathazeki ngelakusasa ngoba lokhu kungenza ucine ungasenelisi ukwenza lokho okumele ukwenze namuhla.

Ukuzihlupha ngezinto ezimbi ocabanga ukuthi zingenzakala kungenza ukhathazeke kakhulu futhi uphelelwe lithemba.

KUYINI OKUNGAKUNCEDA? Amacebo Angakunceda

KHANGELA OKUHLE

IBhayibhili lithi: “Zonke izinsuku zabacindezelweyo zilukhuni, kodwa inhliziyo ethokozileyo isendlini.” (IZaga 15:15) Ukukhathazeka kakhulu ngohlupho olalo kungenza ubone angani ngeke lulungiseke. Kodwa ukungakhathazeki kakhulu ngalo kungenza ucabange ngendlela ongalulungisa ngayo.

Ungachithi isikhathi esinengi kakhulu ulalele izindaba.
Ekupheleni kwelanga ngalinye, cabanga ngokuhle okwenzakeleyo.
Bhala phansi izinto ofuna ukuzenza mhlalokho. Umsebenzi omkhulu wenze kancane kancane kulokuzama ukuwenza wonke ngelanga elilodwa. Lokhu kuzakwenza ubone ukuthi usebenze kangakanani ekupheleni kwelanga ngalinye.

CELA UNCEDO

IBhayibhili lithi: ‘Ozihlalela yedwa uthukutheliswa yizeluleko zonke.’ (IZaga 18:1, The Holy Bible in Ndebele) Ngeke wenelise ukuphuma egodini elitshonayo uwedwa, kodwa kubalula ukuthi uphume nxa uthole umuntu okudonsayo.

Cela abangane lezihlobo bakuncedise.
Lawe dinga indlela ongabancedisa ngayo. Ukuncedisa abanye kuzakwenza ungakhathazeki kakhulu ngohlupho lwakho.
Nxa usulahle ithemba futhi ungasakwazi ukuthi uphilelani kungabangcono ukuthi uyebona udokotela ukuze akuncedise. Kwezinye izikhathi ukukhathazeka kakhulu kungabe kutshengisa ukuthi ulohlupho lokuhlulukelwa. Abantu abanengi bancedwe kakhulu yikunatha amaphilisi okuhlulukelwa.a

a I-Vukani! ayikukhetheli indlela okumele welatshwe ngayo.

IBhayibhili Lisinika Ithemba

Umhubi wathandaza kuNkulunkulu wathi: “Ilizwi lakho liyisibane enyaweni zami liyikukhanya kwendlela yami.” (IHubo 119:105) IBhayibhili lifanana njani lesibane?

Nxa kumnyama tshu, isibane siyasinceda ukuthi sibone lapho esingahamba khona. IBhayibhili lalo lilamacebo angasinceda nxa kumele senze isinqumo esinzima.

Isibane singasikhanyisela indlela yethu ukuze sibone lezinto ezikhatshana. IBhayibhili lalo lingasitshengisa ukuthi ikusasa lethu lizabe linjani.

IBhayibhili libhuku elingcwele elisitshela ngembali yabantu kusukela ekuqaleni njalo liyasinika lethemba lesikhathi esizayo. Liyasiphendulela imibuzo elandelayo:

Njani?

Ukuhlupheka kwaqalisa njani? IBhayibhili lithi “isono sangena emhlabeni ngomuntu oyedwa, lokufa kwangena ngesono, ngaleyondlela ukufa kwafika ebantwini bonke ngenxa yokuthi bonke bonile.”—KwabaseRoma 5:12.

Yindaba?

Yindaba ohulumende besehluleka ukulungisa inhlupho zethu? IBhayibhili lithi “umuntu akusikho kwakhe ukuthi aqondise izinyathelo zakhe.” (UJeremiya 10:23) Inhlupho ezisemhlabeni zitshengisa ukuthi amazwi la aliqiniso.

Kuyini?

Kuyini uNkulunkulu azakwenza ukuze alungise isimo esisemhlabeni? IBhayibhili litshengisa ukuthi “uzakwesula zonke izinyembezi emehlweni abo, ukufa ngeke kusabakhona, loba ukulila loba ukukhala loba ubuhlungu, ngeke kusabakhona.”—ISambulo 21:4.