Zihloniphe

KUNGANI KUQAKATHEKILE UKUTHI UMUNTU AZIHLONIPHE?

Abantu abazihloniphayo bayenelisa ukulwisana lenhlupho abahlangana lazo futhi abakhalali masinyane.

Ukuhlolisisa okwenziweyo kutshengisa ukuthi abantu abangazihloniphiyo bajayele ukukhathazeka, bahlulukelwe njalo babe lohlupho lokudla kakhulu kumbe elokuzincitsha ukudla. Abanye bakhona bacina benatha kakhulu njalo basebenzise izidakamizwa.
Abantu abazihloniphayo izikhathi ezinengi abaziqathanisi labanye futhi lokhu kwenza kube lula ukuthi bazwanane labanye abantu njalo babe labangane. Ikanti labo abazingazihloniphiyo bajayele ukuhlala besola yonke into nje, okwenza ukuthi bacine bengelabangane.
Abantu abazihloniphayo abakhalali masinyane lanxa bengaze bahlelwe zinhlupho ezinganani empilweni. Kabavumeli ukuthi ukwehluleka ukwenza ezinye izinto kuhle kubamise ukwenza abafuna ukukwenza. Kodwa labo abangazihloniphiyo babona lenhlupho ezincane ziyinkalakatha yomqanso. Lokhu kubenza bakhalale masinyane besebeyekela ukwenza abafuna ukukwenza.

ONGAKWENZA

Khetha abangane abazakunceda. Woba leqiniso lokuthi abangane bakho bayabahlonipha abanye, balendaba lawe lokuthi bazakukhuthaza.

“Umngane oqotho ulothando ngazo zonke izikhathi, njalo ungumfowenu ozalelwe ukukusiza ngezikhathi zobunzima.”—IZaga 17:17.

Nceda abanye. Nxa ulomusa futhi uhlala usenzela abanye izinto, uzathokoza kakhulu kungelani lokuthi abantu labo bazakwenzela izinto ezifananayo loba hatshi. Iqiniso yikuthi uzathokoza lanxa abanye bengasoze bakubone okuhle okwenzayo.

“Ukupha kuyathokozisa kakhulu ukwedlula ukwamukela.”—ImiSebenzi 20:35.

Fundisa abantwabakho ukuthi bazihloniphe. Lokhu ungakwenza ngokubavumela ukuthi balungise uhlupho abayabe bephakathi kwabo, kusiya ngokuthi bayenelisa yini. Khonokho kuzabanceda babone ukuthi bangalwisana njani lenhlupho abahlangana lazo. Kanti njalo bazenelisa ukuzihlonipha khathesi lalapho sebebadala.

“Fundisa umntwana indlela okumele ahambe ngayo, lanxa esekhulile kasoze asuke kuyo.”—IZaga 22:6.

Owesifazana onguFakazi kaJehova ufundisa omunye iBhayibhili ekhefa.

OKWENZIWA NGOFAKAZI BAKAJEHOVA

Imihlangano oFakazi bakaJehova ababa layo kanye lohlelo lokufunda labantu iBhayibhili kunceda abantu abanengi ukuthi bathuthukise impilo yabo besekusenza ukuthi bazihloniphe.

IMIHLANGANO ESIBA LAYO

Emihlanganweni esiba layo iviki ngayinye siba lentshumayelo ezisekelwe eBhayibhilini ezisinceda sibone ukuthi singenzani ukuze sizihloniphe. Imihlangano yethu ingenwa mahala futhi wonke umuntu ukhululekile ukusivakatshela. Ngokwesibonelo, nanku okunye ozakufunda emihlanganweni yethu.

UNkulunkulu uyasiqakathekisa yini?
Ungenzani ukuze uthokoze?
Ungenzani ukuze uthole abangane beqiniso?

Emihlanganweni yethu uzaphinda uthole abangane beqiniso abalendaba lawe, ‘abazakunanza.’—1 KwabaseKhorinte 12:25, 26.

Nxa ufuna ukwazi okunengi ngemihlangano yethu ngena ku-jw.org ubukele ividiyo emfitshane ethi Kuyini Okwenzakala EWolu YoMbuso?

UHLELO LOKUFUNDA LABANTU IBHAYIBHILI

Sifunda iBhayibhili mahala labantu sisebenzisa ibhuku elithi Ungathokoza Kube Kube Nini Lanini! Ibhuku leli lilamavesi ayisiqokoqela, lichasisa indaba ngendlela elula, lilemibuzo ethinta inhliziyo, lilamavidiyo akhuthazayo kanye lamapikitsha amahle kakhulu. Izifundo ezisebhukwini leli zinceda abantu ukuthi bazihloniphe njalo bathuthukise impilo zabo.

Nxa ufuna ukubona ukuthi ukufunda iBhayibhili laboFakazi bakaJehova kungakunceda njani, ngena ku-jw.org ubukele ividiyo emfitshane elesihloko esithi Kungani Kumele Ulifunde IBhayibhili?