ISIFUNDO 37
IBhayibhili Lithini Ngokusebenza Langemali?
Umsebenzi owenzayo uyake ukuthwalise nzima yini? Uyake ukhathazeke yini ngokuthi uzayithola ngaphi imali eyenela izinto zonke ozidingayo? Kuliqiniso sibili ukuthi kungaba nzima ukuthola isikhathi eseneleyo sokukhonza uJehova ngapha usebenza. Kodwa iBhayibhili lilamacebo angasinceda kakhulu endabeni le.
1. IBhayibhili lithini ngokusebenza?
UNkulunkulu ufuna sikukholise ukusebenza. IBhayibhili lithi “akulanto engcono kulokuthi umuntu . . . awukholise umsebenzi wakhe onzima.” (UmTshumayeli 2:24) UJehova ukhuthele futhi uyathokoza nxa esibona sikhuthele emsebenzini esiwenzayo. Okuhle yikuthi ukumlingisela kuzakwenza lathi sithokoze.
Ukusebenza kuqakathekile sibili, kodwa akumelanga sikuqakathekise ukwedlula ukukhonza uJehova. (UJohane 6:27) Phela yena usithembisa ukuthi nxa singaqakathekisa ukumkhonza, uzasinika esikudingayo empilweni.
2. IBhayibhili lithini ngemali?
Lanxa iBhayibhili lisithi ‘imali iyavikela,’ liphinda lithi ayisoze isenze sithokoze. (UmTshumayeli 7:12) Lisikhuthaza ukuthi singathandi imali kodwa ‘sisuthiseke ngalokho esilakho.’ (Bala uHebheru 13:5.) Nxa singasuthiseka ngalokho esilakho, asisoze sizikhathaze ngokufuna izinto ezinengi njalo asisoze singene ezikweledeni. (IZaga 22:7) Sizabalekela lomkhuba wokubheja kumbe ukufuna ukunotha ngokusebenzisa indlela ezingasifaka emanyaleni.
3. Woba ngophanayo
UJehova nguNkulunkulu ophanayo futhi lathi singamlingisela ngokuba ngabantu ‘abaphanayo labazimisele ukwabelana labanye.’ (1 KuThimothi 6:18) Lokhu singakwenza ngokunikela ngemali ebandleni langokuncedisa abaswelayo, ikakhulu esikhonza labo. UJehova uqakathekisa izizatho ezenza sinikele hatshi ukuthi sinikela ngemalini. Nxa singapha ngenhliziyo yonke sizathokoza kakhulu njalo sithokozise loJehova.—Bala imiSebenzi 20:35.
GEBHA UJULE
Engxenyeni le uzabona ukuthi ungenzani ukuze umsebenzi owenzayo ungakuphambanisi ekukhonzeni. Uzafunda lokuthi kungani kuqakathekile ukusuthiseka ngalokho olakho.
4. Dumisa uJehova ngendlela osebenza ngayo
Nxa singabangane bakaJehova sizazimisela ukwenza umsebenzi wethu ngendlela ezamdumisa. Bukelani IVIDIYO beselixoxa ngemibuzo elandelayo.
Kuyini okuthandileyo ngendlela uJason aziphatha ngayo emsebenzini?
Kuyini akwenzileyo ukuze umsebenzi wakhe ungamphambanisi ekukhonzeni?
Bala uKholose 3:23, 24 beselixoxa ngombuzo lo:
Kungani kuqakathekile ukuthi sisebenze ngenhliziyo yonke?
Ukusebenza kuqakathekile sibili, kodwa akumelanga sikuqakathekise ukwedlula ukukhonza uJehova
5. Ukusuthiseka kuyasinceda
Abantu abanengi lamuhla bafuna ukuba lemali enengi. Kodwa iBhayibhili lithi ukwenza njalo kuyingozi. Bala u-1 Thimothi 6:6-8 beselixoxa ngombuzo olandelayo:
IBhayibhili lisikhuthaza ukuthi senzeni?
Singathokoza lanxa singelazinto ezinengi empilweni. Bukelani IVIDIYO beselixoxa ngombuzo olandelayo.
Kuyini okwenza imuli lezi zithokoze lanxa zingelamali enengi?
Kuthiwani nxa silezinto ezinengi kodwa silokhu singasuthiseki? UJesu walandisa umzekeliso otshengisa ukuthi kuyingozi ukwenza njalo. Bala uLukha 12:15-21 beselixoxa ngombuzo lo:
Ufundeni emzekelisweni kaJesu?—Khangela ivesi 15.
Bala njalo uqathanise iZaga 10:22 lo-1 Thimothi 6:10. Ngemva kwalokho xoxani ngemibuzo le:
Ucabanga ukuthi kuyini okuqakathekileyo phakathi kokuba ngumngane kaJehova lokuba lemali enengi? Kungani usitsho njalo?
Kuyini okungenzakala kithi nxa singathanda imali?
6. UJehova uzasinika esikudingayo
Ukuswela umsebenzi lokungabi lemali eyeneleyo kusinika ithuba lokutshengisa ukuthi silokholo kuJehova. Ukuze ubone ukuthi ungenzani nxa uphelelwe ngumsebenzi kumbe ungelamali, Bukelani IVIDIYO beselixoxa ngemibuzo elandelayo.
Yibuphi ubunzima umfowethu ayephakathi kwabo?
Wenzani ukuze aqhubeke elokholo oluqinileyo ngesikhathi ephakathi kobunzima lobo?
Bala uMathewu 6:25-34 beselixoxa ngombuzo lo:
UJehova ubathembisani labo abaqakathekisa ukumkhonza?
ABANYE BATHI: “Kumele ngisebenze nzima ukuze nginakekele imuli yami, yikho angenelisi ukungena imihlangano yebandla maviki wonke.”
Yiwuphi umbhalo okwenza ungathandabuzi ukuthi uJehova kabatshiyi labo abaqakathekisa ukumkhonza?
ISIFINQO
Kumele sisebenze ukuze sibe lemali yokunakekela imuli zethu, kodwa lokhu akumelanga kusiphambanise ekukhonzeni uJehova.
Ufundeni?
Ungenzani ukuze umsebenzi owenzayo ungakuphambanisi ekukhonzeni?
Ukusuthiseka kuzakunceda njani?
Ungatshengisa njani ukuthi uyakholwa ukuthi uJehova uyabanakekela abantu bakhe?
THOLA OKUNENGI
IBhayibhili lithi ukuba lemali kubi yini? Bala isihloko lesi uzwe okunengi.
“Imali Yimpande Yesono Yini?” (Isihloko esikuwebhusayithi yethu)
Bala isihloko lesi uzwe ukuthi ngokunjani ukupha okuthokozisa uNkulunkulu.
“IBhayibhili Lithini Ngokupha?” (Isihloko esikuwebhusayithi yethu)
Ukubheja kuyingozi yini? Bala isihloko lesi uzwe ukuthi iBhayibhili lithini.
Bala isihloko lesi uzwe ukuthi kuyini okwanceda eyinye indoda eyayilisela futhi ithanda ukubheja ukuthi itshintshe indlela eyayiphila ngayo.
“IBhayibhili Liyamntshintsha Umuntu” (INqabayokulinda, November 1, 2011)