Ikhona Yini Inkolo Ongayithemba Ezindabeni Zezimali?

USibongilea wayelabantwana abanengi njalo wayengalovi ensontweni. Uthi: “Ngatshela umfundisi wami ukuthi ngangifuna ukufunda iBhayibhili.” Kodwa umfundisi kazange afune ukumfundisa. USibongile wacina engasayi ensontweni. Uqhubeka esithi: “Abafundisi bangibhalela besithi lanxa ngingenelisi ukubuya, ngithumele imali kuphela. Ngakubona ukuthi, ‘Kutsho ukuthi kabalandaba lokuthi ngikhona yini ensontweni, abakufunayo yimali yami kuphela.’”

UThandeka wayekuthanda ukukhonza. Wathi: “Ensontweni langakithi umganu wenkongozelo wawuhanjiswa kathathu kuhlandla linye ngalinye lenkonzo, njalo kwakukhangelelwe ukuthi sinikele sonke isikhathi nxa uhanjiswa. Babefuna imali sonke isikhathi. Nganakana ukuthi, ‘Kabalawo umoya kaNkulunkulu.’”

Amansonto asendaweni yakini aqonda ukucela imali ebantwini kumbe asebenzisa izindlela ezicatshileyo zokuyicela yini? Lokhu kuyahambelana yini lokutshiwo liBhayibhili?

IBHAYIBHILI LIFUNDISANI?

UJesu onguye owasungula isiKhristu, wathi: “Lamukelisiwe kungelambadalo, lani phanini kungelambadalo.” (UMathewu 10:8) Umlayezo weBhayibhili uqakatheke kakhulu okokuthi ngeke uthengwe ngemali njalo kumele bonke abawufunayo benelise ukuwuthola.

AmaKhristu okuqala ayezibhadala njani izindleko zebandla?

Umuntu munye ngamunye wayenikela “lokho amise enhliziyweni yakhe ukukunikela, kungabi luhonono loba ngokubanjwa ngamandla, ngoba uNkulunkulu uthanda onikela ngokuthokoza.” (2 KwabaseKhorinte 9:7) Umphostoli uPhawuli wathi: “Sasebenza ebusuku lemini ukuze singabi ngumthwalo lakubani lapho sitshumayela ivangeli likaNkulunkulu kini.” (1 KwabaseThesalonika 2:9) UPhawuli wayelungisa amathente ukuze azisekele enkonzweni yakhe.​—ImiSebenzi 18:2, 3.

OFAKAZI BAKAJEHOVA BONA BENZA NJANI?

OFakazi bakaJehova bajayele ukwenzela imihlangano yabo ezakhiweni ezingaduliyo ezibizwa ngokuthi ngamaWolu oMbuso. Bazibhadala njani izindleko? Ababhodisi imiganu yokuphosela iminikelo njalo kabaniki bantu amamvulophu becela imali. Kodwa noma ngubani oqakathekisa uhlelo lokukhonza angaphosela imali yakhe engabonwa ngumuntu ebhokisini lomnikelo eliseWolu loMbuso.

Akuthandabuzwa ukuthi kudingeka imali ukuze umagazini lo udindwe njalo uthunyezwe. Kodwa awusoze ubone ukhangiswa kumbe kucelwa imali ukuze udindwe. Okuqakathekiswayo yikusakaza iqiniso leBhayibhili.

Ucabangani: Indlela le yokubhadala izindleko iyahambelana lamazwi kaJesu lokwakusenziwa ngamaKhristu okuqala yini?