“Bayathokoza Abaqotho” KuJehova

1-2. (a) Abanye ohulumende babaphatha njani abantu bakaJehova kodwa bona benzani? (b) Kungani singathokoza lanxa sihlukuluzwa? (Khuluma langomfanekiso ongaphandle.)

EMAZWENI angaphezu kwangu-30 eminye imisebenzi yethu ayivunyelwa njalo kwamanye oFakazi abavunyelwa. Kwamanye alawo mazwe iziphathamandla zivalele abafowethu labodadewethu emajele. Icala labo ngelani? Abalacala ngoba kuJehova akulalutho abaluphambanisileyo. Abakufelayo yikubala lokutaditsha iBhayibhili, ukutshumayeza abantu, ukungena imihlangano lokungathathi hlangothi kwezombusazwe. Lanxa izinceku zikaNkulunkulu lezi ezithembekileyo ziphikiswa kabuhlungu, ziqhubeka ziqotho zitshengisa ukuthi zizinikele ngokupheleleyo kuJehova futhi lokhu kwenza zithokoze.

² Mhlawumbe usuke wabona imifanekiso yaboFakazi laba abalesibindi wananzelela ukuthi bayabobotheka. Bayajabula ngenxa yokuthi bayakwazi ukuthi uJehova uyathokoza ngokuthi baqhubeka beqotho kuye. (1 Imilan. 29:17a) UJesu wathi: ‘Bayathokoza asebeke bahlukuluzwa ngenxa yokwenza okulungileyo. Thabani lijabule kakhulu ngoba umvuzo wenu mkhulu emazulwini.’—Mat. 5:10-12.

ISIBONELO ESINGASILANDELA

3. ImiSebenzi 4:19, 20 ithi abaphostoli bakaJesu benzani ngesikhathi behlukuluzwa njalo kungani benza njalo?

³ Abafowethu labodadewethu bahlangana lalokho okwehlela abaphostoli ngesikhathi behlukuluzwa ngenxa yokutshumayela ngoJesu. Kanengi abahluleli bomthethwandaba omkhulu wamaJuda “babaqonqosela ukuthi bangasakhulumi futhi ngebizo likaJesu.” (Imiseb. 4:18; 5:27, 28, 40) Manje abaphostoli benzani? (Bala imiSebenzi 4:19, 20.) Babekwazi ukuthi ‘owayebatshele ukuthi batshumayeze abantu njalo bafakaze’ ngoKhristu wayelamandla kulabahluleli laba. (Imiseb. 10:42) Yikho uPhetro loJohane ababemele abaphostoli bakhuluma ngesibindi bathi babezalalela uNkulunkulu kulokulalela abahluleli laba njalo bathi babengasoze bayekele ukukhuluma ngoJesu. Kwakungathi babuza iziphathamandla lezi besithi, ‘Licabanga ukuthi imithetho yenu ingcono kulekaNkulunkulu?’

4. Ngokwalokho okutshiwo kumiSebenzi 5:27-29, yisiphi isibonelo abaphostoli abasibekela wonke amaKhristu njalo singabalingisela njani?

⁴ Kusukela ngalesosikhathi, isibonelo sabaphostoli besilandelwa yiwo wonke amaKhristu eqiniso, ‘elalela uNkulunkulu umbusi kulokuthi alalele abantu.’ (Bala imiSebenzi 5:27-29.) Ngemva kokutshayelwa ukuba qotho kwabo, abaphostoli baphuma emthethwandaba omkhulu wamaJuda “bethokoza ngoba uNkulunkulu wayekubone kufanele ukuthi baphathwe kubi ngenxa yebizo [likaJesu]” njalo baqhubeka betshumayela.—Imiseb. 5:40-42.

5. Yiphi imibuzo okumele siyiphendule?

⁵ Okwenziwa ngabaphostoli kwenza sibe lemibuzo. Ngokwesibonelo babengamlalela njani uNkulunkulu kulokulalela abantu, ngesikhathi esifananayo ‘bezehlisa kuziphathamandla’? (Rom. 13:1) Thina singabalalela njani “ohulumende leziphathamandla” njengokutsho komphostoli uPhawuli futhi siqhubeke siqotho kuNkulunkulu onguye uMbusi wethu omkhulu?—Tit. 3:1.

‘IZIPHATHAMANDLA’

6. (a) Ngobani ‘iziphathamandla’ okukhulunywa ngazo kuRoma 13:1 njalo kumele sizibone njani? (b) Ababusi bonke balamandla angakanani?

⁶ Bala uRoma 13:1. Evesini le ibala elithi ‘iziphathamandla’ litsho ababusi abalamandla phezu kwabanye abantu. AmaKhristu kumele abahloniphe ababusi laba. Benza kube lokuthula, baba leqiniso lokuthi abantu bayawulandela umthetho futhi ngezinye izikhathi bayabavikela abantu bakaJehova. (Isam. 12:16) Yikho kufanele sibhadale imithelo, sibesabe njalo sibanike lenhlonipho abayifunayo. (Rom. 13:7) Kodwa ohulumende laba balamandla ngenxa nje yokuthi uJehova ubavumele ukuthi babe lawo. UJesu wakwenza kwacaca lokho ngesikhathi ephendula umbusi weRoma uPhontiyu Philathu. Lapho uPhilathu emtshela ukuthi wayelamandla okuthi avikele impilo yakhe loba ambulale, yena wathi kuye, “Ubungeke ube lamandla phezu kwami ngabe ubungawaphiwanga evela phezulu.” (Joh. 19:11) Amandla ababusi labezombusazwe abakhona lamuhla alalapho aphelela khona njengakaPhilathu.

7. Kunini lapho okungamelanga sibalalele ababusi abangabantu futhi kuyini okumele bakwazi?

⁷ AmaKhristu kumele alalele yonke imithetho yabohulumende engaphikisani lekaJehova. Kodwa ngeke sibalalele nxa sebefuna senze lokho okungafunwa nguNkulunkulu loba nxa besivimbela ukuthi senze lokho okufunwa nguNkulunkulu. Ngokwesibonelo bangafaka umthetho wokuthi amajaha kumele angene esisotsheni.b Kanti njalo bangafaka umthetho ongasivumeliyo ukuthi sisebenzise iBhayibhili lethu kanye lamabhuku asekelwe eBhayibhilini futhi bangasalisa ukutshumayela lokuhlangana ndawonye ukuze sikhonze. Nxa ababusi bengasebenzisa kubi amandla abo ngokuhlukuluza abalandeli bakaKhristu, bazakuba lecala kuNkulunkulu. UJehova ubakhangele.—Umtshu. 5:8.

8. Yiwuphi umehluko okhona phakathi kweziphathamandla ‘loNkulunkulu oPhakemeyo’?

⁸ Ibala elithi isiphathamandla litsho umuntu olamandla phezu kwabanye abantu kodwa akutsho ukuthi ulamandla endaweni yonke kumbe ukwedlula wonke umuntu. Yikho lanxa ohulumende kuthiwa ‘bayiziphathamandla,’ ukhona olamandla ukwedlula bona. Izikhathi ezine eBhayibhilini uJehova uNkulunkulu ubizwa ngokuthi ‘unguNkulunkulu oPhakemeyo.’—Dan. 7:18, 22, 25, 27.

‘UNKULUNKULU OPHAKEMEYO’

9. Kuyini okwabonwa ngumphrofethi uDanyeli emibonweni?

⁹ Umphrofethi uDanyeli wabona imibono eyayitshengisa ukuthi uJehova ulamandla phezu kwazo zonke iziphathamandla. Waqala wabona izilo ezine ezinkulu ezazimela imibuso eyabusa kudala egoqela iBhabhiloni, iMede lePhesiya, iGrisi, leRoma lombuso obusa umhlaba wonke khathesi, iBritain leMelika. (Dan. 7:1-3, 17) UDanyeli waphinda wabona uJehova uNkulunkulu ehlezi esihlalweni sakhe sobukhosi enkundleni esezulwini. (Dan. 7:9, 10) Lokho umphrofethi lo othembekileyo abona uJehova esekwenza kumele kube yisixwayiso kubabusi lamuhla.

10. Ngokwalokho okutshiwo kuDanyeli 7:13, 14, 27, uJehova unika obani amandla okubusa njalo lokho kutshengisani ngaye?

¹⁰ Bala uDanyeli 7:13, 14, 27. UNkulunkulu uthathela ohulumende amandla awanike abanye abafaneleyo njalo abalamandla kulabo. Ngobani labo? ‘Ngonjengendodana yomuntu’ uJesu Khristu ‘labangcwele bakaNkulunkulu oPhakemeyo’ abayi-144 000 abazabusa “kuze kube nini lanini.” (Dan. 7:18) Kuyakhanya ukuthi uJehova ‘unguNkulunkulu oPhakemeyo’ ngoba nguye yedwa olamandla okukwenza lokho.

11. Kuyini okwabhalwa nguDanyeli okutshengisa ukuthi uJehova ulamandla phezu kwababusi?

¹¹ Umbono owabonwa nguDanyeli uhambelana lalokho ayeke wakutsho. Wathi: ‘UNkulunkulu wasezulwini ukhipha amakhosi abeke amanye.’ Waphinda wathi ‘oPhezukonke ulamandla phezu kwemibuso yabantu, uyinika loba ngubani afuna ukumnika.’ (Dan. 2:19-21; 4:17) Zibe khona sibili izikhathi lapho uJehova akhiphe khona ababusi wafaka abanye.

12. Nika izibonelo zamakhosi uJehova awasusa ezikhundleni. (Khangela umfanekiso.)

¹² UJehova utshengisile sibili ukuthi ulamandla ukwedlula iziphathamandla. Ake sibone izibonelo ezintathu. UFaro waseGibhithe wenza abantu bakaJehova baba yizigqili njalo wayelokhu esala ukubakhulula. Kodwa uNkulunkulu wabakhulula watshabalalisa uFaro eLwandle Olubomvu. (Eks. 14:26-28; Hubo. 136:15) Inkosi yeBhabhiloni uBhelishazari yenza idili ‘yaziphakamisa yamelana leNkosi yamazulu.’ ‘Yadumisa onkulunkulu besiliva labegolide’ kulokuthi idumise uJehova. (Dan. 5:22, 23) UNkulunkulu wayijezisa indoda le eyayiziphakamisa. “Ngalobobusuku” uBhelishazari wabulawa, umbuso wakhe wasunikwa amaMede lamaPhesiya. (Dan. 5:28, 30, 31) Inkosi yePhalestina uHerodi Agripha Wokuqala wabulalisa umphostoli uJakhobe wasefaka umphostoli uPhetro ejele ehlose ukumbulala. Kodwa uJehova kazange amvumele uHerodi ukuthi akwenze lokho. “Ingilosi kaJehova yahle yamtshaya” wafa.—Imiseb. 12:1-5, 21-23.    

13. Nika izibonelo ezitshengisa ukuthi uJehova wancedisa abako-Israyeli ukuthi banqobe amakhosi ezizwe ezimanyeneyo.

¹³ UJehova uphinde watshengisa ukuthi ulamandla ukwedlula amakhosi ezizwe ezimanyeneyo. Wancedisa abako-Israyeli ukuthi banqobe izizwe ezimanyeneyo zamakhosi aseKhenani angu-31 lokuthi bathathe ingxenye enkulu yeLizwe Lesithembiso. (Josh. 11:4-6, 20; 12:1, 7, 24) UJehova waphinda wancedisa ama-Israyeli ukuthi atshaye abhuqe iNkosi uBhenihadadi lamakhosi eSiriya angu-32.—1 Amakho. 20:1, 26-29.

14-15. (a) INkosi uNebhukhadinezari loDariyu bathini ngobukhosi bukaJehova? (b) Umhubi wathini ngoJehova lesizwe sakhe?

¹⁴ UJehova usetshengise kanengi ukuthi unguNkulunkulu oPhakemeyo. Inkosi yeBhabhiloni uNebhukhadinezari yazitshaya isifuba izigqaja ‘ngamandla ayo lobukhulu bayo’ kulokuthi ivume ukuthi uJehova nguye okumele adunyiswe. Ngakho uNkulunkulu wenza ukuthi ihlanye. Kwathi ingqondo sezibuyile uNebhukhadinezari ‘wamdumisa oPhezukonke’ njalo wavuma ukuthi ‘umbuso kaJehova ngumbuso ongapheliyo.’ Waphinda wathi “kakho ongamvimba.” (Dan. 4:30, 33-35) UDanyeli walingwa futhi kwakhanya ukuthi uqotho kuNkulunkulu. UJehova esemkhululile emgodini wezilwane iNkosi uDariyu yathi: ‘Abantu kabamesabe njalo bamhloniphe uNkulunkulu kaDanyeli ngoba unguNkulunkulu ophilayo, okhona kuze kube nini lanini. Umbuso wakhe awusoze utshabalaliswe loba sekutheni futhi lobukhosi bakhe ngobaphakade.’—Dan. 6:7-10, 19-22, 26, 27.

¹⁵ Umhubi wathi: “UJehova uwafadalalisile amacebo ezizwe, wenze amaqhinga ezizwe angaphumeleli.” Waphinda wathi: “Siyathokoza isizwe esenza uJehova abe nguNkulunkulu waso, isizwe asikhethileyo ukuthi sibe ngesakhe.” (Hubo. 33:10, 12) Lokhu kumele kusenze sifise ukuhlala siqotho kuJehova.

IMPI YOKUCINA

16. Kuyini esingathandabuziyo ukuthi uJehova uzakwenza ngesikhathi ‘sokuhlupheka okukhulu’ futhi kungani singakuthandabuzi lokho? (Khangela umfanekiso.)

¹⁶ Sesixoxile ngalokho uJehova akwenzayo kudala. Pho kuyini esingakhangelela ukuthi akwenze esikhathini esizayo? Siyaqiniseka ukuthi uzazikhulula izinceku zakhe eziqotho ngesikhathi ‘sokuhlupheka okukhulu.’ (Mat. 24:21; Dan. 12:1) Uzazivikela nxa sezihlaselwa ngendlela elesihluku yizizwe ezimanyeneyo ezibizwa ngokuthi nguGogi waselizweni laseMagogi. Lanxa izizwe lezi zingagoqela wonke amalunga angu-193 enhlanganiso yezizwe ezimanyeneyo i-United Nations, ngeke zenelise ukulwa loNkulunkulu oPhakemeyo lebutho lakhe elisezulwini. UJehova uthi: “Ngizazikhazimulisa sibili, ngenze zonke izizwe zingazi, zazi lokuthi ngingcwele. Lapho-ke abantu bazakwazi ukuthi mina nginguJehova.”—Hez. 38:14-16, 23; Hubo. 46:10.

17. IBhayibhili lithi kuyini okuzakwenzakala emakhosini omhlaba lakulabo abaqhubeka beqotho kuJehova?

¹⁷ Ukuhlasela kukaGogi kuzabangela ukuqala kwempi ye-Amagedoni lapho uJehova azabhubhisa khona ‘amakhosi omhlaba wonke.’ (Isam. 16:14, 16; 19:19-21) Kodwa “abathembekileyo yibo kuphela abazahlala emhlabeni, njalo abamsulwa yibo abazasala kuwo.”—Zaga. 2:21, amabala angaphansi.

KUMELE SIQHUBEKE SIQOTHO

18. AmaKhristu amanengi eqiniso azimisele ukwenzani futhi kungani? (UDanyeli 3:28)

¹⁸ Okweminyaka eminengi amaKhristu eqiniso abezimisele ukubotshwa lokufaka ukuphila kwawo engozini ngenxa yokuthi ayamthanda uJehova uMbusi wawo. AmaKhristu la azimisele ukuhlala eqotho kuJehova. AnjengamaHebheru amathathu aqhubeka ethembekile kuNkulunkulu oPhakemeyo owawasindisa ngokuwakhulula esithandweni somlilo esivuthayo.—Bala uDanyeli 3:28.

19. Kuyini uJehova azakukhangela nxa esahlulela abantu bakhe njalo kuyini okumele ukwenze?

¹⁹ Umhubi uDavida wakhuluma ngokuqakatheka kokuhlala siqotho kuNkulunkulu. Wathi: “UJehova uzakwahlulela izizwe. Ngahlulela awu Jehova ukhumbule izenzo zami ezilungileyo, lokuthi ngiqotho kuwe.” (Hubo. 7:8) Waphinda wathi: “Kwangathi ubuqotho bami lokulunga kwami kungangivikela.” (Hubo. 25:21) Okungenza uphumelele empilweni yikuhlala uthembekile kuJehova njalo ungavumeli lutho luphambanise ubuqotho bakho kuye loba kungaze kwenzakaleni. Ungenza njalo uzazizwa njengomhubi owabhala wathi: ‘Bayathokoza abaqotho, abalandela umthetho kaJehova.’—Hubo. 119:1, amabala angaphansi.